Rreth 80 fëmijë të familjeve të prekura nga tërmeti që janë strehuar në një nga hotelet e zonës së Golemit, kaluan një pasdite të veçantë nën tingujt e muzikës së luajtur nga fëmijët e ushtarakëve.
Fëmijët e ushtarakëve që ndjekin kurset pranë Ministrisë së Mbrojtjes përgatitën një program artistik për të zbavitur sadopak fëmijët, banesat e të cilëve janë dëmtuar ose shkatërruar nga tërmeti i 26 nëntorit.
Në koncertin, ku ishte e pranishme edhe ministrja e Mbrojtjes Olta Xhaçka, morën pjesë edhe fëmijët që ndjekin kurset sportive pranë Ministrisë së Mbrojtjes, të cilët dhuruan topa për bashkëmoshatarët e tyre.
Artistët e rinj u pritën me duartrokitje jo vetëm nga bashkëmoshatarët, por edhe nga prindërit e tyre.
Aktvitetit iu bashkuan edhe nxënësit dhe mësuesit e shkollës 9-vjeçare “Edith Durham” në Tiranë, të cilët kishin përgatitur pako me dhurata dhe materiale shkollore për bashkëmoshatarët e prekur nga tërmetit.
Ministrja Xhaçka uroi fëmijët e prindërit për festat, që ky vit i ka gjetur në kushte më të vështira, por i siguroi që shumë shpejt çdo familje do të ketë shtëpinë e re, pas fillimit të procesit të rindërtimit të shtëpive të dëmtuara nga tërmeti i një muaji më parë.
VIDEO
© Ministria e Mbrojtjes 2024 - Të gjitha të drejtat e rezervuara.