Numri i vajzave që shërbejnë në Forcat e Armatosura është në rritje ndërkohë që vitin e kaluar mbi 35% e oficerëve të rinj të graduar janë gra, duke shënuar rritje me 5% krahasuar me vitin 2018.
Këto ishin konstatimet e ministres së Mbrojtjes Olta Xhaçka në Konferencën “Axhenda për gratë, paqen dhe sigurinë në Shqipëri”, e organizuar nga Prezenca e OSBE në Shqipëri dhe Ministria e Shëndetësisë dhe Mbrojtjes Sociale, në 20 - vjetorin e miratimit të Rezolutës 1325 të Organizatës së Kombeve të Bashkuara.
Ministrja Xhaçka e konsideroi përfshirjen e vajzave në Forcat e Armatosura si çështje strategjike dhe vuri në dukje rritjen e numrit të tyre në strukturat e mbrojtjes. “Për FA kjo nuk është thjesht një çështje e të drejtave të grave. Është edhe një çështje strategjike. Duke përjashtuar gratë, praktikisht i mohojmë vetes të paktën gjysmën e ushtarakëve të talentuar që mund të ofrojë shoqëria shqiptare. Unë jam shumë krenare që trendi i viteve të fundit i përfshirjes së grave e vajzave në FA është pozitiv. Është në kahun e duhur. Sot 18.2% e personelit civil e ushtarak të FA janë gra e vajza. Ndërkohë që një shifër që më bën shumë optimiste është ajo e oficerëve të rinj të graduar për 2019 - 2020, ku plot 35.4% janë gra e vajza! Një rritje me 5% krahasuar me vitin 2018!” - theksoi ministrja Xhaçka.
Nga ana e saj, ministrja e Shëndetësisë dhe Mbrojtjes Sociale, Ogerta Manastirliu shprehu krenari për gratë dhe vajzat që shërbejnë në Forcat e Armatosura dhe Policinë e Shtetit duke e vlerësuar si shumë të rëndësishëm bashkëpunimin mes burrave dhe grave në këtë fushë.
Kreu i Prezencës së OSBE në vendin tonë, ambasadori Bernd Borchard vlerësoi progresin që Shqipëria ka bërë për të fuqizuar gratë në fushën e sigurisë dhe mbrojtjes dhe theksoi vendosmërinë e Prezencës që ai kryeson për mbështetje të vazhdueshme për të ecur më tej në këtë fushë.
Rezoluta 1325 e OKB-së kërkon nga palët në një konflikt të parandalojnë shkeljet e të drejtave të grave, të mbështesin pjesëmarrjen e grave në negociatat e paqes dhe në rindërtimin pas konfliktit dhe të mbrojnë gratë dhe vajzat nga dhuna seksuale gjatë kohës së luftës.
VIDEO
© Ministria e Mbrojtjes 2024 - Të gjitha të drejtat e rezervuara.