Nëntetarja e Policisë Ushtarake Luiza Gega u shpall atletja evropiane e muajit janar nga Federata Evropiane e Atletikës.
Vlerësimi për sportistenö që është pjesë edhe e Forcave të Armatosura shqiptare, erdhi pas përformancës së jashtëzakonshme në Turin Botëror të Sallave të Mbyllura në Karlsruhe të Gjermanisë, ku theu rekordin kombëtar në garën e 3000 metrave.
Duke e konsideruar këtë arritje si të rëndësishme për sportin shqiptar, nëntetare Gega ia dedikon këtë vlerësim punës, trajnerit Taulant Stërmasi, por edhe atyre që e mbështesin, mes të cilëve edhe Forcat e Armatosura të Shqipërisë.
“Shpallja e atletes së muajit nga Federata Evropiane e Atletikës sigurisht që është një privilegj i madh. Është hera e parë për mua, por dhe që një sportist shqiptar të nominohet për një çmim të tillë dhe aq më tepër ta fitojë atë. Kjo është një stërvitje vërtet intensive, e lodhshme, imja dhe e trajnerit, por edhe sigurisht e atyre që më mbështesin, që nuk janë pak të them të drejtën.”- shprehet nëntetare Gega.
Dy nga garat më të mëdha sportive të këtij viti, Lojërat Olimpike, Tokyo 2020 dhe Kampionati Evropian i Atletikës, Paris 2020, për të cilat sportistja shqiptare tregon objektivat e saj.
“Sigurisht që është vështirë, por që objektivi im kryesor fillimisht është hyrja në finale dhe më pas pozicionimi sa më i mirë. Shpresoj shumë të arrij të gjashtëshe, do ishte sukses i madh për mua.”
Gjatë muajit shkurt nëntetare Luiza Gega u shpall për herë të shtatë radhazi kampione e Ballkanit në Kampionatin Ballkanik të Sallave të Mbyllura në Stamboll.
