Efektivët e Forcave të Armatosura do të rrisin prezencën e tyre në tregje, veçanërisht aty ku janë vënë re grumbullime më të mëdha. Tregu i Kombinatit është një prej këtyre pikave problematike, e cila u inspektua të shtunën nga ministrja e Mbrojtjes Olta Xhaçka, kryetari i Bashkisë së Tiranës, Erjon Veliaj dhe drejtues të Policisë së Shtetit.
Ndërsa është sqaruar për efektivët që do të jenë në terren plani i masave që do të zbatohet në vijim, ministrja Xhaçka shprehu gadishmërinë për të vazhduar aksionin për ruajtjen e sigurisë së shëndetit të qytetarëve që bëjnë pazar në këtë treg.
“Dyfish përgjegjshmëri për t'u kujdesur që të gjithë të respektojmë masat, qoftë për shëndetin tonë, qoftë atë të tjetrit. Sa na takon, ne do të jemi gjithë kohës në mbështetje, do të rrisim prezencën tonë jo vetëm me check – point, por edhe me prezencë në tregje, aty ku ka dyndje të madhe të qytetarëve që bëjnë pazarin përgjatë orarit të lejuar.”, - u shpreh Xhaçka.
Nga ana e tij, kryebashkiaku i Tiranës, Erion Veliaj teksa prezantoi masat që do të merren për mbarëvajtjen e këtij tregu u shpreh: “Rregulat që hyjnë në fuqi janë: Check Point i ushtrisë, nuk do të lejojë më makina të futen në treg dhe të ngushtojë rrugën në këtë sipërfaqe. Tek pjesa e banesave ku fillon tregu dhe ku katet e para përdoren si dyqane, do të hyjë në fuqi kalimi vetëm me një drejtim”.
Veliaj paralajmëroi ashpërsim të masave më tej deri në mbyllje të tregut, nëse edhe rregullat e reja nuk respektohen.
VIDEO
© Ministria e Mbrojtjes 2024 - Të gjitha të drejtat e rezervuara.