Gjashtë autoambulancat e para me të gjitha pajisjet e një urgjence lëvizëze kanë mbërritur si ndihmë nga Turqia për Ministrinë e Mbrojtjes dhe Forcat e Armatosura. Në ceremoninë e organizuar në Komandën Mbështetëse ishte e pranishme edhe vetë ministrja e Mbrojtjes Olta Xhaçka.
Ndërsa vlerësoi kontributin e shtetit turk, ministrja Xhaçka tha se “që sot këto autoambulanca do të jenë pjesë operacionale e Forcave të Armatosura në kuadër të Emergjencave Civile, por ato, në rast nevoje, mund t’í atashohen rast pas rasti Spitalit të Traumës për përballimin e nevojave urgjente në raste aksidentesh apo urgjencave të tjera mjekësore, duke qenë se për shkak të situatës së krijuar nga COVID-19, në këtë spital po kryhen një pjesë e mirë e shërbimeve mjekësore që deri dje kryheshin në Qendrën Spitalore Universitare “Nënë Tereza””.
Sipas ministres Xhaçka, këto autoambulanca janë vetëm fillimi i transformimit të Emergjencave Civile. Ajo shtoi se efiçenca e reagimit është përmirësuar ndjeshëm me bashkimin e Emergjencave Civile me Forcat e Armatosura, dëshmi për këtë në fakt janë episodet e tmerrshme të këtyre dy viteve, tërmetet, përmbytjet.
“Po i japim fund një tradite 30 - vjeçare të të mos investuarit në forcimin e kapaciteteve reaguese të shtetit në rastin e emergjencave civile, veçanërisht duke pasur parasysh që jemi një ndër vendet më të rrezikuara prej fatkeqësive natyrore dhe emergjencave në përgjithësi”, - tha më tej Xhaçka.
“Qytetarët kanë nevojë të kenë një shtet serioz në krah në rast nevoje dhe ky është absolutisht detyrimi dhe prioriteti ynë. Jo më veprime të improvizuara, por një forcë reaguese të mirëtrajnuar, të mirëpajisur në mënyrën më të mirë të mundshme. Sapo kemi nisur dhe une jam shumë krenare të pohoj se po i japim Forcave të Armatosura dhe Emergjencave Civile më në fund imazhin dhe vëmendjen që meritojnë”.
Të pranishëm në ceremoni ishin edhe shefi i Shtabit të Përgjithshëm të Forcave të Armatosura, gjeneral brigade Bardhyl Kollçaku, drejtori i Agjencisë Kombëtare të Mbrojtjes Civile, Haki Çako e përfaqësues të Ambasadës Turke.
Këto 6 autoambulanca janë në vetvete një miniurgjencë, pasi brenda tyre janë që nga respiratorët për rrugët e frymëmarrjes, kompletet e imobilizimit për frakturat, aparatet ORL apo të gjitha mjetet e mjekimit apo të ndihmës së shpejtë.
Gjeneral brigade Bajram Bega sqaroi se këto autoambulanca kanë brenda të gjitha pajisjet që i duhen një mjeku për të kryer detyrën.
Ministria e Mbrojtjes e Shqipërisë po koordinohet edhe me aleatët e tjerë, veçanërisht Italinë për trajnimin e njësive operacionale me teknikat më të reja të ndërhyrjes së shpejtë.
Në Komandën Mbështetëse brenda pak javësh do të mbërrijnë edhe qindra uniforma, çadra e pajisje që do të modernizojnë më tej sistemin e emergjencës civile të Shqipërisë.
VIDEO
© Ministria e Mbrojtjes 2024 - Të gjitha të drejtat e rezervuara.