Rekrutët e rinj të Forcave të Armatosura përfunduan periudhën “e gjelbër” të Stërvitjes Individuale Bazë në Shkollën e Trupës në Bunavi. Si asnjëherë më parë, i gjithë programi stërvitor po zhvillohet duke respektuar me përpikmëri masat kundër COVID-19.
Në këtë fazë të parë të stërvitjes, vajzat dhe djemtë janë njohur me rregullat dhe njohuritë fillestare për Forcat e Armatosura.
Me përfundimin e fazës së parë ka nisur edhe faza e dytë, ajo “blu”, e cila thellon njohuritë dhe përgatitjen e rekrutëve përpara se ata t’i nënshtrohen periudhës më të vështirë.
Periudha e fundit, e ashtuquajtur “e kuqe”, do të jetë sprova e vërtetë e rekrutëve të rinj, para se ata të titullohen e betohen si ushtarë të Forcave të Armatosura. Periudha “e kuqe”, kërkon nga rekrutët të tregojnë përgatitje të lartë fizike dhe sidomos psikologjike.
Stërvitja Individuale Bazë ka qëllim transformimin gradual të qytetarëve për rreth 11 javë nga civilë në ushtarë profesionistë të Forcave të Armatosura.
© Ministria e Mbrojtjes 2024 - Të gjitha të drejtat e rezervuara.