Newsroom Ministrja Xhaçka konfirmon: Kakavija e Kapshtica të hapura deri në orën 22:00, të hënën , asnjë nuk kalon pa formular e test negativ
Ministrja e Mbrojtjes, Olta Xhaçka, e cila po ndjek nga afër të gjithë situatën e krijuar në pikën doganore të Kakavijës bëri të ditur se është arritur dakordësia me palën greke që edhe pika e Kapshticës të qëndrojë e hapur deri në orën 22:00 të mbrëmjes së kësaj të diele. “Risjellim në vëmendje që nesër nis kufizimi i ri nga pala greke duke vendosur kuota dhe kërkesa për formular dhe test negativ”, u shpreh ministrja Xhaçka. Ajo u bën thirrje qytetarëve që duke filluar nga e hëna e 17 gushtit asnjë të mos paraqitet në të dy pikat doganore në Kakavijë e Kapshticë pa formularin dhe testin negativ.
Gjatë këtyre ditëve, Forcat e Armatosura janë angazhuar pa pushim për të ndihmuar udhëtarët në pikën e Kakavijës, për tu lehtësuar pritjen në radhët e gjata që u krijuan, për shkak të vendosjes së kufizimeve nga shteti Grek për marrjen e masave të mospërhapjes së pandemisë së Covid 19.
Mbi 200 efektivë të Forcave të Armatosura u kanë shërbyer edhe gjatë gjithë natës qytetarëve të bllokuar në Kakavijë, duke shpërndarë ujë e ushqime.
