Pak pas mesnate ka përfunduar radha në Kakavijë, aty ku prej ditësh qytetarët kanë qenë në pritje, në radhë të gjata, duke u krijuar kështu një situatë e tensionuar.
Ministrja e Mbrojtjes Olta Xhaçka bën me dije se gjatë 24 orëve të fundit, kaluan në Kakavijë 3.325 shtetas dhe 1.629 mjete. Në orën 00.40 përfundoi operacioni, ku kaloi dhe qytetari i fundit, duke i dhënë fund kësaj situate të pazakontë.
Ndërkohë ministrja e Mbrojtjes shprehu mirënjohjen për të gjitha strukturat e angazhuara në këtë operacion në këto ditë të vështira.
Gjatë këtyre ditëve, Forcat e Armatosura janë angazhuar papushim për të ndihmuar udhëtarët në pikën kufitare të Kakavijës. Mbi 200 efektivë të Forcave të Armatosura u kanë shërbyer gjatë gjithë natës qytetarëve të bllokuar, duke shpërndarë ujë e ushqime.
“Mirënjohje të thellë për të gjitha strukturat e angazhuara në këto ditë të vështira. Mirënjohje për efektivët e Forcave të Armatosura, Policisë së Shtetit, mjekëve e infermierëve dhe drejtues e punonjës të pushtetit vendor, të cilët me këmbëngulje, durim e punë në grup ia dolën!”, - shkruan Xhaçka.
Nga sot në Kakavijë nuk do të kalojnë më shumë se 750 persona, kurse në Kapshticë jo më shumë se 300 qytetarë. Sakaq qytetarët duhet të zbatojnë rregullat e reja.
© Ministria e Mbrojtjes 2024 - Të gjitha të drejtat e rezervuara.