Peshkatarët shqiptarë dhe malazezë, por edhe policitë kufitare të të dy vendeve do ta kenë më të lehtë të orientohen dhe të dallojnë vijën kufitare gjatë lundrimit në liqenin e Shkodrës.
Komisioni i përbashkët për rindërtimin dhe riparimin e shenjave në vijën e kufirit shtetëror Shqipëri-Mali i Zi, ku bëjnë pjesë Shërbimi Hidrografik i Forcës Detare, Instituti i Gjeografisë dhe Infrastrukturës Ushtarake dhe Policia Kufitare, vendosën në mirëkuptim të plotë me palën malazeze 6 bova (shenja të reja dalluese në liqen).
Vendosja e bovave u krye fizikisht nga një helikopter "Cougar" i Forcës Ajrore.
Kufiri mes Shqipërisë dhe Malit të zi në liqenin e Shkodrës përcaktohet nga 21 bova, të cilat për shkak të kushteve atmosferike dhe mungesës së mirëmbajtjes ishin dëmtuar dhe nuk ekzistonin prej vitesh.
Sipas marrëveshjes mes dy qeverive, pala shqiptare është përgjegjëse për instalimin dhe mirëmbajtjen e 11 bovave, ndërsa pala malazeze për 10 të tilla.
Dy vitet e fundit pala jonë ka bërë rivendosjen e 8 shenjave të reja ujore në kufirin me Malin e Zi në liqenin e Shkodrës, ndër të cilat 3 me sinjal ndriçues për natën.
© Ministria e Mbrojtjes 2024 - Të gjitha të drejtat e rezervuara.