Ceremonia e aktivizimit të Komandës e ndërrimit të komandantëve të SEEBRIG si dhe festimi i 21-Vjetorit në Kumanovë, Maqedoni e Veriut

e mërkurë, 02 shtator 2020 11:28

Fotogaleria

Në kuadrin e Iniciativës të SEDM, që kryesohet aktualisht nga Shqipëria, u zhvillua në datën 26 gusht 2020 në Kumanovë, Maqedonia e Veriut, ceremonia e aktivizimit të Komandës së SEEBRIG/Forcës Paqeruajtëse Shumëkombëshe të Europës Juglindore (MPFSEE), ceremonia e ndërrimit të komandantëve të SEEBRIG si dhe e festimit të 21-Vjetorit të Komandës së SEEBRIG.

Zëvendësministri i Mbrojtjes njëkohësisht kryetar i SEDM-CC/PMSC, z. Petro Koçi, presidenti i Republikës së Maqedonisë së Veriut, sh.t.z. Stevo Pendarovski, kryeministri z. Oliver Spavoski, ministri i Mbrojtjes znj. Radmila Shekerinska, shefi i SHPFA të Maqedonisë së Veriut, gjenerallejtënant Vasko Gjurchinovski, zëvendësministra të Mbrojtjes dhe zëvendësshefa të SHPFA nga vendet e Forcës Paqeruajtëse Shumëkombëshe të Europës Juglindore (MPFSEE), ambasadorë dhe atashe të Mbrojtjes nga vendet anëtare të PMSC, autoritete locale dhe personeli i Komandës së SEEBRIG së bashku me familjet e tyre morën pjesë në këtë ceremoni.

Ministri i Mbrojtjes të Maqedonisë së Veriut, znj. Radmila Shekerinska, kryetari i SEDM-CC/PMSC z. Petro Koçi, komandanti në detyrë i SEEBRIG, gjeneral brigade Tudorica Petrache dhe komandanti i ri i SEEBRIG, gjeneral brigade Aristeidis Iliopouos, mbajtën fjalën e rastit duke nënvizuar këtë moment të rëndësishëm.
Kryetari i SEDM-CC/PMSC, shprehu vlerësimet dhe falënderimet për autoritetet ushtarake dhe civile të Maqedonisë së Veriut për mbështetjen dhe për kushtet dhe infrastrukturën e krijuar për Komandën e re të SEEBRIG në Kumanovë, e cila do të jetë “shtëpia e SEEBRIG” për gjashtë vitet e ardhshme.

Ai nënvizoi faktin se Iniciativa e MPFSEE ose e njohur ndryshe si Forca Shumëkombëshe Paqeruajtëse e Europës Juglindore (SEEBRIG) është një histori suksesi, pasi ka kontribuar shumë në sigurinë dhe stabilitetin rajonal, në besimin reciprok dhe forcimin e marrëdhënieve të fqinjësisë së mirë midis vendeve të Europës Juglindore.
Gjatë ceremonise, komandanti i SEEBRIG u vlerësua nga kryetari i SEDM-CC/PMSC, z. Petro Koçi, me medaljen “SEEBRIG Accomplishment Medal” për shërbimin dhe realizimin me sukses të detyrave të ngarkuara.

Disa momente kryesore në historikun e SEEBRIG janë:

• 31 gusht 1999, në bazë të marrëveshjes së nënshkruar u aktivizua SEEBRIG në Plovdiv, Bullgari.
• Maj 2001 u deklarua gatishmëria operacionale e brigadës në operacionet e drejtuara nga OKB, OSBE dhe operacionet paqeruajtëse të drejtuara nga NATO.
• Prill 2003, PMSC deklaroi se SEEBRIG është gati të marrë pjesë në operacionet paqeruajtëse (PSO) të drejtuara nga NATO e BE.
• 2003-2007 Komanda e SEEBRIG u dislokua në Konstanca, Rumani.
• Prill dhe tetor 2004, ekipi i vlerësimit deklaroi Kapacitetet Operacionale Fillestare (IOC) dhe Kapacitetet e Plota Operacionale (FOC).
• 2006, SEEBRIG mori pjesë në operacionet në mbështetje të paqes në Afganistan.
• 2007-2011, Komanda e SEEBRIG u dislokua në Stamboll, Turqi.
• 2011-2020, Komanda e SEEBRIG u dislokua në Larisa, Greqi.
• 2020-2026, Komanda e SEEBRIG dislokohet ne Kumanovë, Maqedonia e Veriut.