Newsroom Gjeneral brigade Ilir Xhebexhia komandanti i ri i Forcës Detare, Xhaçka: Një nga ushtarakët më të talentuar
Pas më shumë se një viti, Forca Detare ka komandantin e saj të ri. Gjeneral brigade Ilir Xhebexhia u prezantua në krye të Flotës shqiptare nga ministrja e Mbrojtjes Olta Xhaçka dhe shefi i Shtabit të Përgjithshëm të FA, gjeneralmajor Bajram Begaj.
Ministrja Xhaçka e konsideroi gjeneral brigade Xhebexhian ushtarakun e duhur në krye të Forcës Detare, i cili do të ndihmojë në modernizimin dhe transformimin e kësaj force. “Jam e lumtur, që më në fund po plotësojmë një vakum në komandën e Forcës Detare duke i dhënë kësaj force jo thjesht një komandant, por një nga efektivët më të talentuar. Unë jam shumë e sigurt, që gjeneral Xhebexhia ka jo vetëm formimin, por edhe vizionin e duhur për të vënë në lëvizje në këtë forcë të njëjtin proces modernizimi e profesionalizimi që tashmë është në rrugën e duhur në mbarë FA.
FA po përjetojnë sot transformimin më të thellë në tri dekadat e fundit. Është një transformim që ka prekur e po prek çdo element të FA, por që kryefjalë të tij ka pasur investimin tek burimet njerëzore, tek djemtë e vajzat e burrat e gratë që mbajnë sot uniformën e Forcës Detare, Tokësore e Ajrore. Është një investim që ka ecur në paralel në disa drejtime. Vetëm prej pak ditësh ka filluar puna për të ngritur sistemin e ri të vëzhgimit detar, ndërkohë që po punohet po ashtu edhe për pajisjen me armatime të anijeve të modernizuara të klasit Iliria. Janë këto investime që i kanë lejuar FD të kryejë me sukses disa misione deri pak vite më parë të paimagjinueshme, siç ishte ai në detin Egje.” - theksoi ministrja Xhaçka.
Gjeneral brigade Ilir Xhebexhia deri tani ka shërbyer si zëvendëspërfaqësues ushtarak i Republikës së Shqipërisë në NATO, atashe ushtarak në Mbretërinë e Belgjikës dhe jorezident në Republikën e Francës.
VIDEO
