Në datën 14 tetor 2020, në cilësinë e vendit që mban kryesimin e Sekretariatit të Iniciativës të SEDM (South - East Europe Defence Ministerial), në Ministrinë e Mbrojtjes, u zhvillua Takimi i përvitshëm i Ministrave te Mbrojtjes së Europës Juglindore, i cili u zhvillua nëpërmjet video – konferenës nëpërmjet portalit të SEDM.
Me pjesëmarrjen e 13 vendeve anëtare, komandantit të Forcës Shumëkombëshe Paqeruajtëse e Europës Juglindore (SEEBRIG) si dhe përfaqësues të lartë nga organizata të tjera ndërkombëtare dhe rajonale si UNDP SEESAC, RCC dhe RACVIAC, ky takim u drejtua nga zëvendësministri i Mbrojtjes, z. Petro Koçi, në cilësinë e kryetarit të Sekretariatit të SEDM.
Kryetari i Sekretariatit të SEDM. z. Koçi u shpreh në fillim të këtij takimi lidhur me situatën e krijuar nga pandemia COVID-19 dhe theksoi përkushtimin e vendeve të rajonit për të forcuar më tej efektivitetin dhe efikasitetin e kësaj iniciative përmes një bashkëpunimi të shtuar midis vendeve anëtare në këtë situate të vështirë.
Ai prezantoi projektet dhe aktivitetet e zhvilluara me sukses gjatë kryesimit të Iniciativës së SEDM nga vendi ynë që nga ministeriali i vjetshëm me fokusin kryesor promovimin e sigurisë dhe mbrojtjes.
Ai nënvizoi më tej faktin se Iniciativa e MPFSEE/Forca Shumëkombëshe Paqeruajtëse e Europës Juglindore (SEEBRIG) është një histori suksesi, pasi ka kontribuar shumë në sigurinë dhe stabilitetin rajonal, në besimin reciprok dhe forcimin e marrëdhënieve të fqinjësisë së mirë midis vendeve të Europës Juglindore.
Komandanti i Forcës Shumëkombëshe Paqeruajtëse e Europës Juglindore (SEEBRIG) prezantoi në detaje aktivitetet e zhvilluara nga brigada per vitin 2020 si dhe analizoi zhvillimin e kapaciteteve dhe angazhimet e ardhshme të SEEBRIG.
Pjesëmarrësit mirëpritën arritjet e SEEBRIG dhe konfirmuan kontributin e kësaj brigade për sigurinë dhe stabilitetin rajonal, duke u shndërruar në një platformë unike ushtarake për bashkëpunim dhe trainim të ndërsjelltë.
Më tej, Ministeriali vijoi me pozicionet e vendeve mbi detyrimet e kësaj iniciative në të ardhmen dhe mbi angazhimin e përbashkët për promovimin e sigurisë, paqes dhe stabilitetit në rajon.
Si një nga prioritetet kryesore të Iniciativës u thekusa nga të gjitha vendet anëtare angazhimi për forcimin e fqinjësisë së mirë ndërmjet vendeve të rajonit si dhe bashkëpunimi në kuadër të trajnimeve dhe stërvitjeve të përbashkëta.
Vendet anëtare të SEDM konfirmuan zhvillimin e mëtejshëm të bashkëpunimit në nivel politik dhe ndërqeveritar nëpërmjet aktiviteteve dhe projekteve të përbashkëta të SEDM.
Në takim u miratuan disa dokumente lidhur me projektet në kuadër të SEDM, që lidhen me ndërlidhjen e spitaleve ushtarake (Interconnection of Military Hospitals Project), Portalin e Iniciativës së SEDM (SEDM Portal) dhe u aprovuan Plani Vjetor dhe Buxheti i Brigadës së SEEBRIG për vitin 2021, të cilat do të shërbejnë si bazë për zhvillimin e aktiviteteve të përbashkëta dhe projekteve gjatë vitit të ardhshëm.
Takimi i Ministerialit u mbyll me miratimin e Deklaratës së Përbashkët (Joint Statement) të ministrave të Mbrojtjes të vendeve të Europës Juglindore.
Ky ishte Ministeriali i dytë i SEDM-it i drejtuar nga Shqipëria, gjatë kryesimit 2019-2021.
© Ministria e Mbrojtjes 2024 - Të gjitha të drejtat e rezervuara.