Newsroom Kuvendi miraton projektligjin “Për ratifikimin e “Marrëveshjes për mbështetje teknike ndërmjet KM të RSH dhe AMP të NATO për realizimin e Projekteve të Kuçovës, të financuara nga PI të NATO për Sigurinë, vitet 2019-2022
Dua t’ju them shumë shkurtimisht dy fjalë për projektligjin që votojmë sot, pasi besoj që tashmë të gjithë kolegët njihen me përmbajtjen e këtij projektligji, njihen me projektin për modernizimin e Bazës së Kuçovës dhe besoj që e mbështesin atë po aq fuqimisht sa unë.
Konkretisht, projektligji “Për ratifikimin e “Marrëveshjes për mbështetje teknike ndërmjet Këshillit të Ministrave të Republikës së Shqipërisë dhe Agjencisë së Mbështetjes dhe Prokurimit të NATO-s për realizimin e Projekteve të Kuçovës, të financuara nga Programi i Investimeve të NATO-s për Sigurinë, vitet 2019-2022” i hap rrugë zbatimit të projektit për modernizimin e Bazës së Kuçovës dhe shndërrimin e saj në një bazë ajrore taktike të NATO.
Nuk ka asnjë dyshim që ndërtimi i kësaj baze, punimet për të cilën do të fillojnë brenda një kohe shumë të shkurtër, ka një rëndësi të jashtëzakonshme për ne.
Së pari, sepse kjo bazë e vendos Shqipërinë në hartën e interesave strategjike të NATO-s. Vendi merr një rëndësi strategjike që nuk e ka pasur më prej shumë e shumë dekadash. Dhe dua t’ju kujtoj po ashtu që ky është jo vetëm investimi më i madh por edhe e vetmja bazë ajrore e NATO-s në rajonin tonë.
Në terma ushtarakë, Baza e Kuçovës do të jetë një Bazë Taktike e Dislokueshme, që do të ketë të gjithë infrastrukturën dhe kapacitetet e nevojshme për të mbështetur 24 orë në 7 ditë të javës, misionet NATO-s, qofshin këto misione stërvitore në kohë paqeje, apo misione luftarake në kohë krize. Më konkretisht baza do të mbështesë dislokimin e 6 avionëve luftarakë taktikë dhe të avionëve të transportit.
Së dyti, funksionimi i Bazës së Kuçovës do të ketë një ndikim të rëndësishëm përsa i përket modernizimit dhe fuqizimit të Forcave Ajrore Shqiptare. Ne kemi hedhur disa hapa të rëndësishëm në këtë drejtim, në bashkëpunim sigurisht me aleatët, duke ngritur sistemin e vëzhgimit të hapësirës ajrore, në bashkëpunim me Lockheed Martin, gjigandin e industrisë ushtarake botërore dhe amerikane, apo duke i shtuar flotës sonë, disa helikopterë Blackhawk, që do të na lejojnë dalëngadalë të hedhim disa hapa të rëndësishëm drejt ringritjes së Forcës Ajrore, e cila më shumë se çdo forcë tjetër e ushtrisë tonë, ka vuajtur nga degradimi dhe shkatërrimi.
Falë Bazës së Kuçovës, tashmë forcat tona, do të kenë mundësi shumë më të mëdha bashkëpunimi dypalësh apo trajnimi, çka më parë ka qenë thjesht e pamundur.
Së treti, përtej dimensionit ushtarak dhe strategjik, kjo bazë do të ketë edhe një impakt shumë të madh në ekonominë dhe zhvillimin e të gjithë zonës së Kuçovës. Dhe nuk e kam fjalën thjesht dhe vetëm për investimin e fazës së parë, që arrin deri në 50 milionë Euro, dhe do të krijojë mundësi punësimi dhe ekonomi në mbarë zonën e Kuçovës por edhe më gjerë. E kam fjalën edhe për impaktin që kjo bazë do të ketë në planin afatgjatë, falë qarkullimit të efektivëve dhe personelit mbështetës, që do të vendosen aty duke krijuar një kërkesë të vazhdueshme për shërbime, produkte e kështu me radhë.
Por personalisht, ajo që më bën realisht krenare, është fakti që aleatët, zgjodhën Shqipërinë për ndërtimin e një baze ajrore, siç e thash, e vetmja në rajonin tonë.
E di që gjërat harrohen shpejt, por besoj që e mbani mend që deri 7 apo 8 vjet më parë, FA shqiptare përmendeshin ende për ryshfetet që u kërkoheshin ushtarakëve në misione, për dyshime për nxjerrje sekretesh apo për kërkimet e thesareve me mjetet e ushtrisë. E pra besoni që në atë kohë Shqipëria mund të kishte qenë një opsion i besueshëm për të bërë një investim strategjik të kësaj natyre?
Unë mendoj jo, por besoj që fakti që për ndërtimin e kësaj baze u zgjodh Shqipëria, flet shumë qartë për standardin që kanë arritur sot FA dhe për besimin që kanë sot aleatët tek Shqipëria. Dhe dua ta theksoj, që edhe pse ky është investimi më i madh e më spektakolar, ky nuk është aspak investimi i vetëm që kanë bërë aleatët tek FA sepse gjatë dy viteve të fundit kemi parë realisht një nivel rekord mbështetje, sidomos nga aleatët tanë amerikanë, por jo vetëm.
Arsyeja për këtë është e thjeshtë. Aleatët tanë e shohin, ashtu siç e shohin edhe të gjithë efektivët e FA, që sot ushtria shqiptare ka hedhur hapa të jashtëzakonshëm drejt modernizmit dhe profesionalizimit, dhe operon me standarde të krahasueshme me ato të aleatëve tanë.
Dhe këtë nuk e them unë, por e thonë aleatët. E thonë për kontingjentet shqiptare në Afganistan, në Kosovë, në Mali. E thonë për kontributin tonë në Irak apo në Letoni.
Baza e Kuçovës është një projekt afatgjatë, ndikimi i së cilës do të ndihet për shumë e shumë vite në të ardhmen. Por po kaq afatgjatë është edhe transformimi që po ndodh sot në FA ku sot po konsolidohet një sistem karriere meritokratik, ku po investohet tek arsimi dhe dija si kurrë më parë në 30 vitet e fundit, dhe ku, po investohet si asnjëherë më parë tek ata që janë çelësi i vërtetë i suksesit të rindërtimit të FA, që janë burrat dhe gratë, djemtë dhe vajzat që mbajnë veshur uniformën e FARSH.
Sigurisht që nuk dua të mohoj që ka ende shumë dhe shumë punë për të bërë për të rindërtuar FA dhe për ta çuar atë plotësisht në nivelin që i takon ushtrisë së një vendi anëtar të NATO-s. Por është e qartë që tanimë FA janë në një proces reformimi dhe modernizimi që po krijon një momentum të mirë që unë besoj që do të përshpejtohet edhe më shumë falë investimeve të rëndësishme strategjike si kjo e Bazës së Kuçovës.
Ndaj ju ftoj që ta votojmë së bashku.
