Përreth një javë oficerë të Forcave të Armatosura të Shqipërisë dhe përfaqësues të Shtabit të Përgjithshëm dhe Komandës Amerikane në Europë, zhvilluan vizita njohëse në bazat apo rajonet stërvitore të vendit, ku është parashikuar të zhvillohet stërvitja “Defender Europe 2021”.
Stërvitja ndërkombëtare “Defender Europe 2021” pritet të zhvillohet pranverën e ardhshme dhe do shtrihet thuajse në të gjitha bazat tokësore, detare apo ajrore të Shqipërisë, nga veriu në jug. Për këtë qëllim, grupi i punës i Forcave të Armatosura dhe përfaqësuesit ushtarakë amerikanë zhvilluan vizita njohëse në të gjitha këto baza ku është parashikuar të zhvillohet stërvitja.
Ushtarakët amerikanë u njohën me kapacitetet që logjistikën që ofrojnë Forcat e Armatosura, si dhe panë vetë në terren mundësitë që ofrojnë bazat ushtarake të Shqipërisë për mbarëvajtjen e kësaj stërvitjeje të pazakontë për nga përmasat në territorin tonë.
Stërvitja “Defender Europe 2021” u cilësua nga ministrja e Mbrojtjes Olta Xhaçka si një nga stërvitjet më të mëdha, që është zhvilluar ndonjëherë në Shqipëri.
Siç u shpreh ajo gjatë prezantimit të projektbuxhetit të Mbrojtjes për vitin 2021 në Komisionin e Sigurisë, kjo stërvitje “është e para e këtij lloji në vendin tonë dhe do të marrin pjesë mbi 8.000 trupa amerikane, që do të dislokohen në disa rajone të vendit dhe në disa reparte të Forcave tona të Armatosura.”
© Ministria e Mbrojtjes 2024 - Të gjitha të drejtat e rezervuara.