Ministri i Mbrojtjes Niko Peleshi ishte këtë të enjte në Dajç të Shkodrës, ku si shkak i prurjeve të shumta ka pasur një çarje të pazakontë të argjinaturës, e cila rrezikonte përmbytjen e banesave përreth. Pasi u njoh me situatën nga afër, ministri i Mbrojtjes u shpreh se "koordinimi i menjëhershëm i Agjencisë Kombëtare të Mbrojtjes Civile me strukturat e tjera qendrore dhe vendore ka mundësuar fillimin e punës për riparimin e argjinaturës. Në këto momente që flasim është bllokuar kalimi i ujit e po punohet për forcimin e plotë të pjesës së dëmtuar. Sot është dita kur banorët e Shkodrës duan pune jo llafe, nuk është politika ajo që ndal ujin, por puna!"- u shpreh zoti Peleshi.
Në prani edhe të kryetares së bashkisë së Shkodrës, ministri i Mbrojtjes, Niko Peleshi bëri të ditur se në rast se fondet e pushtetit vendor nuk do të mjaftojnë për përballimin e situatës së krijuar nga përmbytjet, atëherë do të vihet në dispozicion sipas ligjit mbështetja e qeverisë qendrore.
"Kjo nuk është çështje kush e ka topin. Kjo kërkon vetëm bashkëpunim. Sapo të kalojmë situatën e përmbytjeve, pushteti vendor, i lutem Voltanës dhe të gjitha bashkive të tjera të bëjnë vlerësimin e dëmeve", u shpreh ministri i Mbrojtjes, ndërsa dha mesazhin se të gjitha familjet e dëmtuara do të mbështeten.
Në bashkinë e Shkodrës Forcat e Armatosura janë të angazhuara që prej 3 javësh, kryesisht me transportin e banorëve në fshatin Obot me mjete të larta dhe mjete lundruese. Gjithashtu, efektivët e batalionit të I të këmbësorisë në Vaun e Dejës kanë ndihmuar edhe në evakuimin e gjësë së gjallë.
VIDEO
© Ministria e Mbrojtjes 2024 - Të gjitha të drejtat e rezervuara.