Në kuadër të Procesit të SEDM, i cili kryesohet nga Shqipëria për periudhën 2019 - 2021, në Ministrinë e Mbrojtjes, nëpërmjet një video-konference (VTC), u zhvilluan Takimi i 44-të i Komitetit Koordinues të Ministerialit të Mbrojtjes së Evropës Juglindore (SEDM-CC) dhe Takimi i 45-të i Komitetit Drejtues Politiko-Ushtarak/Forcës Paqeruajtëse Shumëkombëshe të Evropës Juglindore (PMSC/MPFSEE).
Këto dy takime u realizuan me mbështetjen e portalit të SEDM me anë të VTC, si rezultat i situatës aktuale të krijuar nga pandemia.
Përfaqësues nga 14 vende anëtare të SEDM (Shqipëria, Bosnja-Hercegovina, Bullgaria, Kroacia, Greqia, Italia, Maqedonia e Veriut, Mali i Zi, Rumania, Sllovenia, Serbia, Turqia, Ukraina dhe Gjeorgjia), komandanti i Brigadës së Evropës Juglindore (SEEBRIG HQ) si dhe vëzhgues nga organizatat ndërkombëtare dhe rajonale, respektivisht UNDP SEESAC dhe RACVIAC, morën pjesë në këto takime, që u drejtuan nga drejtori i Sekretariatit të SEDM-CC/PMSC, z. Gjergji Methoxha.
Zoti Methoxha theksoi në fjalën e tij se procesi i SEDM, si procesi i angazhimit të vendeve të Evropës Juglindore në nivel ministeriali, ka treguar në gjithë këto vite se është një sukses i bashkëpunimit dhe integrimit rajonal në fushën e mbrojtjes, duke forcuar lidhjet e bashkëpunimit dhe bashkëveprimit ndërmjet vendeve të SEDM dhe duke kontribuar në të mirë të paqes dhe stabilitetit rajonal.
Në takimin e SEDM-CC u diskutuan zhvillimet mbi projektet në kuadër të SEDM, respektivisht mbi punën e bërë mbi projektin për ndërlidhjen e spitaleve ushtarake (“Interconnection of Military Hospitals Project”), mbi promovimin e lidereve gra në fushën e mbrojtjes dhe sigurisë (“Female Leaders in Security and Defense (FLSD) Project”) si dhe në zhvillimin e mëtejshëm të Portalit të SEDM (“SEDM Permanent Portal”).
Në takimin e PMSC, u diskutuan çështjet lidhur me zhvillimin e kapaciteteve dhe angazhimeve të SEEBRIG/Forcës Paqeruajtëse Shumëkombëshe të Evropës Juglindore si dhe u morën vendime për të gjitha çështjet që lidhen me aktivitetet e ardhshme të Brigadës në kuadër të bashkëpunimit në fushat e sigurisë dhe të mbrojtjes rajonale.
Në klimën e bashkëpunimit vendet shprehën vullnet dhe vendosmëri për forcimin e mëtejshëm të bashkëpunimit rajonal.
