Shqipëria ka përmbyllur kryesimin e Sekretariatit të Iniciativës së Ministrave të Mbrojtjes të Europës Juglindore (South-Eastern Europe Defence Ministerial - SEDM), me takimin e përvitshëm të zhvilluar më 10 qershor 2021 të zëvendësshefave të Shtabeve të Përgjithshme të Iniciativës së SEDM.
Zëvendësministri i Mbrojtjes, z. Petro Koçi, në cilësinë e kryetarit të Sekretariatit të SEDM, i cili drejtoi përmes video-konferencës këtë takim vlerësoi këtë iniciativë si një histori suksesi dhe dëshmi të zhvillimit dhe forcimit të bashkëpunimit rajonal në fushën e mbrojtjes dhe sigurisë në Evropën Juglindore.
Ai nënvizoi më tej faktin se bashkimi i forcave ushtarake dhe krijimi i Forcës Shumëkombëshe Paqeruajtëse të Europës Juglindore (SEEBRIG), ka kontribuar dhe forcuar më tej sigurinë dhe stabilitetin rajonal, në besimin reciprok dhe forcimin e marrëdhënieve të fqinjësisë së mirë.
Zëvendësministri Petro Koçi prezantoi projektet dhe aktivitetet e zhvilluara me sukses gjatë kryesimit të Iniciativës së SEDM nga vendi ynë që nga takimi i vjetshëm i zëvendësshefave të Shtabeve të Përgjithshme të vendeve anëtare të SEDM.
Komandanti i Forcës Shumëkombëshe Paqeruajtëse të Europës Juglindore (SEEBRIG), gjeneral brigade Aristeidis Iliopoulos prezantoi në detaje aktivitetet e zhvilluara nga Brigada për periudhën qershor 2020 - 2021 si dhe analizoi zhvillimin e kapaciteteve dhe angazhimet e ardhshme të SEEBRIG.
Zëvendësshefat e Shtabeve të Përgjithshme të Iniciativës së SEDM mirëpritën arritjet e SEEBRIG dhe vlerësuan kontributin e kësaj Brigade për sigurinë dhe stabilitetin rajonal, duke u shndërruar në një platformë unike ushtarake për bashkëpunim dhe trajnim të ndërsjellë.
Më tej, takimi vijoi me pozicionet e vendeve duke theksuar angazhimin për forcimin e fqinjësisë së mirë ndërmjet vendeve të rajonit si dhe rritjen e bashkëpunimit ushtarak në kuadër të trajnimeve dhe stërvitjeve të përbashkëta.
Takimi u mbyll me miratimin e Deklaratës së Përbashkët (Joint Statement) të zëvendësshefave të Shtabeve të Përgjithshme të vendeve anëtare të SEDM.
Zëvendësshefat e Shtabeve të Përgjithshme të Iniciativës së SEDM falënderuan kryetarin e Sekretariatit të SEDM dhe shprehen vlerësimet e tyre për kryesimin me sukses të Sekretariatit të SEDM nga Shqipëria për periudhën 2019 - 2021.
© Ministria e Mbrojtjes 2024 - Të gjitha të drejtat e rezervuara.