Ministri i Mbrojtjes z. Niko Peleshi gjatë pjesëmarrjes së tij në Samitin e NATO në Bruksel , pati mundësinë të zhvillojë një takim dy palësh me ministren e Mbrojtjes të Malit të Zi, znj. Olivera Injac.
Gjatë këtij takimi, dy ministrat e mbrojtjes diskutuan mbi bashkëpunimin dy palësh në fushën e Sigurisë dhe Mbrojtjes, duke vënë theksin se ky bashkëpunim do të vijojë të jetë një nga prioritet kryesore dhe do të intensifikohet më shumë në të ardhmen.
Z. Peleshi u shpreh se politika e jashtme e Shqipërisë është e orientuar dhe thellësisht e angazhuar në promovimin e fqinjësisë së mirë, bashkëpunimit dhe integrimit të rajonit tonë. Shqipëria është dhe do të vijojë të jetë një partner i besueshëm si edhe do të vazhdojë kontributin e saj në forcimin e sigurisë, stabilitetit dhe sigurimin e paqes në rajon dhe më gjërë.
Më tej ministri Peleshi shtoi se Shqipëria dhe Mali i Zi janë partnerë në organizatën politiko - ushtarake më të madhe në botë, siç është NATO, dhe misioni kryesor në kuadër të këtij partneriteti është mbështetja e vendeve të tjera Ballkanit në rrugën e tyre të integrimit euroatlantik. Mbështetja e “’Politikës së dyerve të hapura’ të NATO është i vetmi mjet i cili realizon qëllimin e përbashkët për një rajon sa më të sigurt”, - u shpreh ministri Peleshi.
Në fund të takimit, të dy ministrat, shprehën angazhimin e tyre se përforcimi i bashkëpunimit dypalësh, rajonal, si edhe orientimi euroatlantik janë komponentët kryesore në zhvillimin e mëtejshëm të rajonit të Ballkanit.
