Newsroom Përfundojnë kurset e oficerëve, Peleshi: Së shpejti mësimi në anglisht, AFA sipas modelit të West Point
Shtatëdhjetë e pesë oficerë të Forcave të Armatosura dhe Forcës së Sigurisë së Kosovës përfunduan kurset e gradave në Akademinë e Forcave të Armatosura (AFA). Ushtarakët shqiptarë ndoqën për rreth një vit Kursin e Lartë të Oficerit (KLO) dhe Kursin e Komandës dhe Shtabit të Përgjithshëm (KKSHP).
Në ceremoninë e diplomimit ishte i pranishëm ministri i Mbrojtjes Niko Peleshi, shefi i Shtabit të Përgjithshëm të FA gjeneralmajor Bajram Begaj, zëvendësshefja e SHP gjeneralmajor Manushaqe Shehu, komandanti i AFA gjeneral brigade Albert Mullai, komandantë forcash etj.
Ministri Peleshi ndau me të pranishmit përshtypjet e mira që kishte lënë përgatitja, profesionalizmi dhe niveli i ushtarakëve shqiptarë gjatë stërvitjes “Defender Europe 21”. Më tej zoti Peleshi shpalosi planet për rritjen e mëtejshme të nivelit të arsimimit të ushtarakëve shqiptarë, duke marrë shembull një ndër akademitë ushtarake më prestigjoze të botës, West Point në SHBA.
“Dua të ndaj me ju ambicien tonë për t’i dhënë një dimension shumë të fortë Akademisë së FA në bashkëpunim me aleatët tanë në NATO e veçanërisht me partnerin tonë strategjik SHBA, me të cilët jo vetëm unë personalisht, por edhe vetë kryeministri në të gjitha takimet që ka patur me nivelet më të larta të NATO-s, por edhe Departamentit të Shtetit ka ngritur si kërkesë dhe si ftesë për bashkëpunim ristrukturimin dhe fuqizimin e Akademisë së FA. Ajo çka ju intereson drejt për së drejti janë 4 kurset e nivelit të lartë të cilat duam t’i ngremë gjithashtu në një nivel tjetër. Kemi formuluar ambicie që brenda 3 vitesh të hapen këto kurse dhe do duhen të jenë në anglisht. Duam t’i paketojmë kurset në një Kolegj të Mbrojtjes duam t’i japim përmasë rajonale. Duam t’i shërbejmë edhe vëllezërve tanë në Kosovë, por pse jo edhe në Maqedoninë e Veriut, Malin e Zi, apo dhe më gjerë se kaq. Së shpejti do të kemi një vizitë në West Point besoj edhe vet kryeministri do të jetë me ne aty për të jetësuar modelimin e Akademisë FA sipas modelit të West Point.” - deklaroi ministri Peleshi.
Kursin e Lartë të Oficerit e ndoqën 19 ushtarakë, ndërsa në Kursin e Komandës dhe Shtabit të Përgjithshëm u diplomuan 56 të tillë. Veç njohurive shtesë në shkencat ushtarake, KLO dhe KKSHP u shërbejnë ushtarakëve për marrjen e gradave nënkolonel dhe kolonel.
