Newsroom Situata e zjarreve, ministri Peleshi falënderon BE dhe shtetet anëtare për mbështetjen
Mbështetja e Mbretërisë së Holandës dhe Republikës Çeke nëpërmjet Mekanizmit të Mbrojtjes Civile të BE ka rezultuar thelbësore në përballimin e situatës së zjarreve të krijuar në vendin tonë gjatë muajit gusht.
Në një aktivitet të organizuar në pjesën ushtarake të Aeroportit Ndërkombëtar "Nënë Tereza", ministri i Mbrojtjes Niko Peleshi e nisi fjalën e tij duke shprehur ngushëllimet për humbjen e dy jetëve, të cilat i konsideroi të pazëvendësueshme.
Në prani të kreut të Seksionit Politik të Delegacionit të BE në Tiranë Alexis Hupin, ambasadorit të Republikës Çeke Jaroslav Ludva,zëvendësambasadorit holandez Rogier Nouwen, ministri Peleshi falënderoi qeveritë e këtyre vendeve për ndihmën e dhënë dhe ofroi një panoramë për gjendjen e përgjithshme gjatë kësaj periudhe.
"Pavarësisht se jemi në mes të punës, e çmoj shumë të rëndësishme që mirënjohjen tonë ta ndajmë me publikun për ata partnerë që na janë gjendur në një kohë shumë të shkurtër nga koha që iu drejtuam Mekanizmit Evropian të Mbrojtjes Civile. Kështu, dua të falënderoj BE dhe mekanizmat e tij, Zyrën e Delegacionit të BE në Tiranë për një përgjigje të shpejtë në ndihmë të Shqipërisë për të përballuar këtë situatë të pazakontë të zjarreve që ka përfshirë rajonin tonë. Jemi ende në mes të emergjencave të zjarreve sidomos në pjesën e veriut të Shqipërisë. Tashmë mund të themi se kemi disa arritje të rëndësishme, disa suksese për të shpëtuar parqe, fshatra dhe mbi të gjitha jetë njerëzish. Kemi shpëtuar me sukses Parkun Kombëtar të Llogorasë, një nga mushkëritë më të rëndësishme të vendit, por sot jemi ende në mes të shumë vatrave të zjarrit në pjesën e veriut, kryesisht në qarkun e Kukësit, Lezhës dhe të Shkodrës, pra në bashkinë e Pukës, Mirditës, Kukësit kemi ende vatra. Llogarisim 3 mijë hektarë dëmin e deritanishëm në sipërfaqe të gjelbra. Është një shifër e konsiderueshme, por lajmi i mirë është se pjesa më e madhe prej 2.300 hektarësh ka qenë shkurre, ndërkohë që pjesa tjetër ka qenë pishë, ah dhe bimësi tjetër." - u shpreh zoti Peleshi.
Zëvendësambasadori i Mbretërisë së Holandës në vendin tonë vlerësoi bashkëpunimin me autoritetet shqiptare dhe njoftoi se dy helikopterët holandezë "Chinook" dhe ekuipazhet e tyre do të vijojnë të ndihmojnë në shuarjen e zjarreve deri në fund të muajit gusht.
Helikopterët holandezë dhe ai çek, që prej datës 6 gusht i janë bashkuar përpjekjeve të Forcave të Armatosura dhe autoriteteve të tjera lokale për përballimin e situatës së krijuar nga zjarret.
