Të rinjtë e Akademisë së Forcave të Armatosura (AFA) do të përfitojnë nga lehtësitë që ofron karta e studentit. Ministri i Mbrojtjes Niko Peleshi së bashku me kryetarin e Bashkisë së Tiranës Erion Veliaj shpërndanë këto karta për studentët që nisin vitin akademik në këtë akademi, ku, për herë të parë, siç theksoi edhe ministri i Mbrojtjes shtohen edhe dy degë të reja bachelor.
Ministri i Mbrojtjes Niko Peleshi ndërsa shprehu mirënjohjen për vëmendjen e Bashkisë së Tiranës ndaj të rinjve që kanë zgjedhur të bëhen pjesë e Akademisë së Forcave të Armatosura vuri në dukje se në vitin e dytë të kësaj akademie interesi i të rinjve ka qenë i jashtëzakonshëm.
“Kemi patur rreth 1000 aplikime për rreth 60 vende te bachelori këtë vit. Kemi një risi në akademi, përveç diplomës në shkenca ushtarake: duke nisur nga ky vit do të kemi edhe dy diploma të reja; Teknologji Informacioni në fushën e Mbrojtjes dhe Navigacion dhe Komandim Detar në fushën e Mbrojtjes. Pra, jemi duke u zgjeruar, jemi duke u transformuar, sipas një modeli kampion që është West Point”, u shpreh ministri Peleshi.
Përmes kartës së studentit, Bashkia e Tiranës ofron sot 1450 shërbime të ndryshme që u krijojnë lehtësi dhe oportunitete falas, ose me çmim të reduktuar mijëra të rinjve në kryeqytet, ndaj ministri Peleshi theksoi se: “Forcat e Armatosura kërkojnë prestigj. Ndaj vizita juaj këtu dhe përfshirja e këtyre të rinjve këtu në komunitetin e madh të të rinjve të Tiranës që gëlon është një lloj prestigji që u japim këtyre të rinjve, një lloj krenarie, por edhe një lloj shërbimi që u bëjmë këtyre të rinjve, sepse ata janë model. Bëjnë një punë të përkushtuar, jo të lehtë, me shumë sakrificë. Vetëm në fundjavë kanë kohë të lirë dhe natyrisht që u vlejnë shumë shërbimet e Kartës së Studentit, sepse transporti publik dhe frekuentimi i institucioneve kulturore, qoftë edhe atyre private u shërben. Këta janë studentët e vetëm në Shqipëri për të cilët shteti paguan, akomodimi është falas, ushqimi është falas, dhe veç tyre kanë edhe një pagesë për shërbimet ditore, por gjithsesi karta është investimi edhe simbolik, edhe real”.
Kreu i Bashkisë tha se deri më tani kartën e kanë aksesuar 70% e studentëve, ndërsa ftoi që edhe studentët që ende nuk e kanë marrë ta sigurojnë atë në mënyrë që të përfitojnë nga shërbimet publike dhe private që mbulon, duke shtuar se ndihet i lumtur që Akademia e Forcave të Armatosura po transformohet sipas standardeve të West Point Army: “Si dikush që është rritur nga dy prindër ushtarakë e di që është një ndër vendet elitë dhe ishte muzikë për veshët e mi, kur dëgjoj nga Niko që edhe ai edhe kryeministri do vazhdojnë të thellojnë raportin me West Point”, - deklaroi Veliaj.
© Ministria e Mbrojtjes 2024 - Të gjitha të drejtat e rezervuara.