Arsimi i lartë ushtarak duhet të jetë pjesë integrale e arsimit të lartë publik. Ky ishte objekti kryesor i konferencës shkencore të mbajtur, më 30 shtator në auditorin e Ministrisë së Mbrojtjes, me temë: ‘Bashkërendimi civil ushtarak në fushën akademike - sfidë e shekulli të 21-të’. Ky aktivitet akademik erdhi si një bashkëpunim mes Fakultetit të Mbrojtjes dhe Sigurisë në AFA dhe Departamentit të Shkencave Politike të Universitetit Barleti.
Zëvendësministrja e Mbrojtjes Dallëndyshe Bici, teksa përshëndeti punimet e konferencës vuri theksin në rëndësinë që ka Akademia e FA në projektin për modernizimin dhe profesionalizimin e FA.
Dy ishin shtyllat kryesore, ku u përqendruan edhe panelet e konferencës: reformat arsimore në kuadër të ndërkombëtarizimin dhe qasja e rretheve akademike si kontributorë në fushën e Mbrojtjes dhe Sigurisë me punime dhe projekte konkrete.
Konferenca shërbeu si një forum për shkëmbimin e ideve dhe përvojave të ndryshme ndërmjet pjesëmarrësve edhe në konsolidimin e partneriteteve me institucionet arsimore, shkencore dhe kërkimore brenda vendit.
Në kushtet e një mjedisi sigurie kur teknologjia dhe informacioni janë parësore u debatua rreth hartimit të politikave të reja në fushën e kurrikulave në arsimin ushtarak me qasje nga arsimi civil.
Në përfundim të konferencës kryetarja e Bordit shkencor prof. asoc. dr. Zamira Çavo dhe rektori/komandanti i ADA gjeneral brigade dr. Albert Mullai shpërndanë certifikatat për pjesëmarrësit.
© Ministria e Mbrojtjes 2024 - Të gjitha të drejtat e rezervuara.