Newsroom 13 Tetori, Dita Ndërkombëtare e Ndërgjegjësimit ndaj Fatkeqësive, aktiviteti “Të gjithë bashkë për Mbrojtjen Civile”
Për të dytin vit radhazi, Agjencia Kombëtare e Mbrojtjes Civile në kuadër të “Ditës Ndërkombëtare për Zvogëlimin e Riskut ndaj Fatkeqësive”, në bashkëpunim me Kryqin e Kuq shqiptar, Programi për Zhvillim i Kombeve të Bashkuara (UNDP), World Vision Albania, prefekturat, bashkitë, si dhe Ministrinë e Arsimit dhe Shëndetësisë, risjell në 12 shkolla të vendit, aktivitetin me temë “Të gjithë bashkë për Mbrojtjen Civile”.
Marrë shkas nga thirrja e Asamblesë së Përgjithshme të Kombeve të Bashkuara në vitin 1989, për të pasur një ditë ku vëmendja e shoqërisë në rang global të përqendrohej tek mundësia dhe aftësia që kanë njerëzit apo komunitetet në mbarë botën, që të zvogëlojnë ekspozimin e tyre ndaj fatkeqësive, 13 tetori u shënua në kalendar, si një ditë që shërben për të rritur ndërgjegjësimin dhe rëndësinë e frenimit të riskut ndaj këtyre fatkeqësive.
Fatkeqësitë natyrore nuk kanë kufij, kërkojnë veprime të vërteta dhe konkrete mbi klimën apo ngrohjen globale dhe politika të dakortësuara, prandaj dhe edicioni i vitit 2021 fokusohet në objektivin e 6-të të Kuadrit Sendai, që ka të bëjë me "bashkëpunimin ndërkombëtar për vendet në zhvillim për të zvogëluar riskun dhe humbjet nga katastrofat", nëpërmjet motos ”Të gjithë bashkë”.
Disa shkolla 9-vjeçare, në qytete si Tiranë, Durrës, Vlorë, Lezhë, do të mirëpresin këtë aktivitet, i cili do të shtrihet edhe në shumë sheshe të këtyre vendeve, për të vijuar gjatë ditës me diskutime të hapura dhe shpërndarjen e broshurave informuese pranë tendave në prani të përfaqësuesëve të AKMC-së, organizatave partnere, Ministrisë së Arsimit dhe Shëndetësisë, si dhe pushtetit vendor.
Shqipëria, vitet e fundit është përballur me një sërë fatkeqësish, si tërmetet, pandemia COVID-19, përmbytjet, e fundit ishte situata me zjarret masive të kësaj vere (2021). Të gjitha këto fatkeqësi evidentojnë se çfarë angazhimi në kapacitete njerëzore, institucionale, teknike dhe financiare kërkohen për raste të tilla emergjente, ku nuk mund të mungojë dhe asistenca ndërkobëtare në rast përshkallëzimi të situatës, pa llogaritur kostot e dëmeve me pasoja në jetë njerëzish, të gjësë së gjallë, pronës dhe ambjentit. Edhe pse situata e zjarreve evidentoi gatishmërinë e institucioneve, strukturave operacionale, vullnetare dhe efikasitetin e mekanizmit të mbrojtjes civile në Shqipëri, sërish kjo nuk mjafton për sfidat e së ardhmes në kuadër të ndryshimeve klimatike. Prandaj kërkohet më tepër ndërgjegjësim, angazhim dhe veprim i gjithsecilit nga ne, në mënyrë që të parandalohen rreziqe me pasoja më të mëdha.
Për të përcjellë tek brezat e rinj një kulturë parandaluese, reaguese dhe ripërtëritëse - përballë ngjarjeve ekstreme të motit dhe rreziqeve të tjera me theks të veçantë edhe tek vetë motoja e kësaj dite që ”vetëm së bashku” mundemi, vlen të theksohet edhe roli dhe kontributi i organizatave partnere në fushën e zvogëlimit të riskut nga fatkeqësitë, të cilat i janë bashkuar këtij aktiviteti.
Programi për Zhvillim i Kombeve të Bashkuara (UNDP), në Shqipëri, aktualisht po kontribuon me forcimin e kapaciteteve rikuperuese të shpejta (RESEAL), në nivel qendror dhe vendor. Gjithashtu, do të ndihmoj AKMC-në në rritjen e kapaciteteve, përgatitjen e dokumentave strategjik kombëtar dhe asistencën e përgatitjes te atyre në nivel lokal. Një fokus të veçantë ka edukimi dhe standardizimi i kurrikulave për edukimin e brezave të ardhshëm në këtë fushë.
World Vision, në Shqipëri, aktualisht është e angazhuar përmes projektit Ndërtimi i ripërtëritjes dhe aftësive për “Reduktimin e Riskut ndaj Fatkeqësive (RRF)“, me një fokus në komunitet dhe shkolla, i mbështetur nga UNICEF, SDG Acceleration Fund, nëpërmjet financimit të qeverisë holandeze.
Kryqi i Kuq shqiptar, me një shtrirje në të gjithë Shqipërinë, me rreth 2500 vullnetarë aktivë dhe 90.000 mijë anëtarë, kontribuon gjithashtu në vazhdimësi, ku një nga programet më të rëndësishme të kësaj organizate është përgatitja dhe përgjigjja në raste fatkeqësish, si dhe ndërgjegjësimi. Vulosja e një kulturë ndërgjegjësimi në këtë fushë edhe për vitet që do të vijnë, kërkon angazhimin e të gjithëve së bashku me veprime të shtuara, parandaluese për mbrojtjen tonë dhe të planetit si një detyrë mbi të gjitha civile.
