70 efektivë të Batalionit të Tretë të Këmbësorisë (b3k) së Forcës Tokësore dhe 5 mjete të Forcave të Armatosura i janë bashkuar sot aksionit për zbatimin e planit të veprimit për pastrimin rrënjësor të Shqipërisë, që nisi nga Vlora.
Të pranishëm në ditën e parë të këtij aksioni që nisi nga "Pylli i Sodës" ishin kryeministri Edi Rama, ministri i Mbrojtjes Niko Peleshi, ministrja e Turizmit dhe Mjedisit Mirela Kumbaro e prefekti i Vlorës Flamur Mamaj.
Në flalën e tij, ministri i Mbrojtjes i ftoi të gjithë qytetarët, institucionet e caktuara nga ligji, por veçanërisht pushtetin vendor të mbajnë pastër territorin. "Sot të gjithë kanë momentin të tregojnë dashurinë për atdheun. Ka ardhur momenti që pas kaq vitesh, mbetjet urbane të mos asociohen më me vendin tonë. është një problematikë që dëmton imazhin e vendit, dëmton turizmin dhe ekonominë e vendit", - u shpreh ministri Peleshi. Duke vënë në dukje faktin se Forcat e Armatosura janë të pranishëm në këtë plan ashtu si edhe në shumë raste të tjera emergjencash civile, ministri Peleshi theksoi se motori i këtij sistemi është dhe duhet të jetë pushteti vendor.
Nga ana e tij kryeministri Edi Rama, duke mbështetur fjalët e ministrit Peleshi se një mjedis i papastër dëmton ekonominë e vendit, theksoi se "asnjë bashki nuk do të lejohet të bëjë asgjë tjetër nëse nuk garanton të gjitha burimet financiare të nevojshme për pastrimin dhe nëse nuk garanton që ato burime përkthehen në një rezultat konkret". Ai kërkoi edhe ndihmën e Solicisë së shtetit për të ndaluar çdo krim ndaj mjedisit.
Ndërsa ministrja e Turizmit dhe Mjedisit dhe prefekti i Vlorës falenderuan Forcat e Armatosura për angazhimin e tyre në këtë plan veprimi kombëtar për pastrimin rrënjësor të vendit.
© Ministria e Mbrojtjes 2024 - Të gjitha të drejtat e rezervuara.