Newsroom Nis nga Elbasani rekrutimi për ushtarë/detarë, Peleshi fton të rinjtë të bëhen pjesë: Kemi rritur dinjitetin e FA 
Nis nga Elbasani procesi i rekrutimit për ushtarë/detarë në Forcat e Armatosura. Pjesë e aktivitetit ishin edhe ministri i Mbrojtjes Niko Peleshi, shefi i Shtabit të Përgjithshëm gjeneralmajor Bajram Begaj, kreu i bashkisë së Elbasanit dhe deputetë të qarkut.
Gjatë fjalës së tij ministri Niko Peleshi e cilësoi tejet të rëndësishme këtë fushatë. “Ne, sot i shikojmë në sy të gjithë të rinjtë dhe të rejat të cilëve ju drejtojmë ftesën për t’u bërë pjesë e FA, sepse kemi arritur t’i japim një drejtim dinjitoz duke filluar nga paga. Siç e dini kemi një rritje prej 30%, një rritje të sheshtë, që do të thotë rritje nga ushtari i parë tek gjenerali; një rritje 30% të pagës që do të thotë: ai që sot rekrutohet në ushtri merr një pagë më shumë se 50 mijë lekë të reja, që në momentin e parë dhe pastaj, nuk është vetëm kjo: së pari të jesh kontributor në FA do të thotë që të bësh pjesë në atë fasho të qytetarëve shqiptarë, të cilët janë sot për sot më të kuotuarit në opinionin publik sipas të gjitha sondazheve, pyetësorëve, institucioni ku qytetarët besojnë më tepër janë FA”, - theksoi ministri Peleshi.
Më tej në fjalën e tij ai shtoi se FA kanë një prezantim dinjitoz në misionet e NATO-s prej më shumë se 20 vitesh në zona si Afganistani, Iraku, Kosova, Bosnja, Afrika apo Letonia.
“FA me të vërtetë është krenari dhe ne sot përmes këtij eventi që po fillojmë në Elbasan dhe do të shkojmë në të gjithë Shqipërinë duam ta sjellim më pranë publikut atë çka janë FA, mundësitë që ofrojnë dhe mbi të gjitha krenarinë dhe nderin që të shërbesh në të”, - tha ministri i Mbrojtjes.
Duke ftuar djemtë dhe vajzat të bëhen pjesë e FA përmes këtij procesi rekrutimi, ministri Peleshi tha se ata kanë mundësi të ngrihen në karrierë dhe të përfitojnë nga trajnimet brenda dhe jashtë vendit. “Djem, vajza dhe ushtarakë, të cilët në varësi të shkollimit të tyre dhe të dëshirës për të ecur në karrierë nuk bëhet fjalë vetëm për të filluar dhe shërbyer deri në fund të jetës së tyre profesionale si ushtar bazë, por kanë mundësi të ngrihen si Ushtari Parë, Ushtari Dytë, Ushtari Tretë, Ushtari Katërt dhe pastaj, nëse kanë një shkollë të mesme është linja tjetër e karrierës, apo ata që kanë një shkollë të lartë duan të përfitojnë nga kurset e oficerit, kurse të shumta brenda vendit jashtë vendit, SHBA apo vende të tjera aleate të NATO-s kanë mundësinë që të arrijnë pse jo edhe në gradat më të larta të vendit. Sot për sot, do të thoja, sistemi ka shpërblimin më dinjitoz edhe në terma page, por edhe në terma morale”, tha z.Peleshi.
Fushata e rekrutimit ka nisur edhe në Tiranë dhe do të vijojë deri më 20 janar 2022. Rreth 400 vende të lira janë sot pranë FA për ushtarë dhe detarë aktivë. Procesi është i hapur për të gjithë të rinjtë apo të rejat nga 18 deri në 27 vjeç me arsim 9 - vjecar, të mesëm apo të lartë.
