Kremtohet 70-vjetori i Çirimit të atdheut nga pushtuesit nazifashistë. Ceremonia e rastit është organizuar në sheshin qendror të garnizonit “Skënderbej”. Ishin të pranishëm: presidenti i Republikës së Shqipërisë dhe komandanti i Përgjithshëm i FA, z. Bujar Nishani, kryetari i Kuvendit, z. Ilir Meta, kryeministri, z. Edi Rama, ministrja e Mbrojtjes, znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, ministra të kabinetit qeveritar, deputetë, gjeneralë, ushtarakë të Forcave të Armatosura, veteranë të LANÇ, autoritete të pushtetit vendor, përfaqësues të komunitetit fetar etj. Gjithashtu nderonin me pjesëmarrjen e tyre ambasadorë dhe përfaqësues të tjerë të trupit diplomatik të akredituar në vendin tonë, atashe ushtarakë dhe ushtarakë të tjerë të të huaj me mision në vendin tonë etj.
Në sheshin qëndror të garnizonit “Skënderbej” ishin rreshtuar 21 kuadrate trupash ushtarake nga të gjitha komandat dhe strukturat e Forcave të Armatosura, një kuadrat nga Policia e Shtetit dhe një kuadrat nga Garda e Republikës.
Pas paraqitjes së forcës që iu bë presidentit të Republikës dhe komandantit të Përgjithshëm të FA, z. Bujar Nishani, fjalën e mori ministrja e Mbrojtjes, znj. Mimi Kodheli. “Jemi këtu për të përkujtuar 29 Nëntorin, këtë ditë të shënuar të historisë së popullit tonë, kur forcat partizane të ndihmuara nga aleatët tanë britanikë dhe amerikanë, përzunë okupatorin e fundit nazifashist nga Shqipëria. Për pesë vite të gjata, Shqipëria ishte futur në një hije të zymtë të pushtimit të huaj. Edhe Evropa po ashtu vuante nga skllavëria. Kombe të lira ishin nënshtruar, miliona njerëz vuanin. Dhe shqiptarët, shtatëdhjetë vjet më parë finalizuan një përpjekje heroike kundër tiranisë, e paparë më parë në historinë moderne të Shqipërisë”, është shprehur ministrja Kodheli.
Më tej znj. Kodheli theksoi se, përpara nesh është një grup veteranësh të Luftës, njerëz të cilët e kanë parë armikun në sy. Ata aty, janë burrat që luftuan okupatorin, janë trimat që çliruan atdheun, janë heronjtë që i dhanë fund luftës. Mes tyre është trimëria e labit, guximi i skraparlliut, mençuria e korçarit dhe burrëria e kuksianit, këmbëngulja e krutanit dhe intelektualizmi i shkodranit, por dhe i të gjithë shqiptarëve anembanë vendit. Ju e patë vdekjen në sy dhe nuk u kthyet pas. Respekti e mirënjohja jonë është me ju dhe pa kushte. “Ka disa gjëra për të cilat ia vlen të vdesësh. Një prej tyre është liria e atdheut. Dhe ata djem e vajza në lulen e rinisë e ëndërronin lirinë e Shqipërisë. Ata luftuan kundër tiranisë, për një të ardhme më të mirë për vendin tonë”, është shprehu ajo.
Në vijim të fjalës së saj ministrja Kodheli tha: “Aleatët tanë të sotëm, që i rigjetëm pas disa dekadash ndarje të sforcuar, nuk do të na kishin radhitur mes tyre më 1945, nëse më 29 nëntor 1944 Shqipëria nuk do të ishte çliruar nga bijtë e saj. Ata që duan të lexojnë për të rishkruar, të urdhërojnë. Hapni vëllimet e plota të akteve të Konferencës së Paqes së Parisit të 1946. Do të kuptoni se Lufta Nacionalçlirimtare ishte aq shumë vendimtare sa që më 1946, Shqipëria të mbante të pacënuar integritetin e saj territorial. Në kohën kur, e përçudnuar nga fashizmi që i dha fund pavarësisë së saj, që i shtiu në dhé 8% të popullsisë së saj, Shqipëria rrekej të rimëkëmbej, fuqi me sy të zgurdulluar nga orekse arkaike kërkonin ta ricopëtonin, si njëherë e një kohë. Nacionalçlirimtarja dhe ky 29 nëntor kaq shumë i diskutuar, ishin garancia se kombi shqiptar nuk ishte kolaboracionisti i radhës, por luftëtari i parë në radhën e atyre popujve që rrokën armët kundër barbarisë”.
Duke folur për arritjet e shënuara në këto vite të demokracisë, ministrja Kodheli nënvizoi se, Shqipëria është një anëtare e denjë e NATO, Aleancës më të fuqishme të demokracive në botë. Forcat tona të Armatosura kanë valëvitur flamurin kuqezi në të gjitha krizat ku vlerat fondamentale të lirive dhe të drejtave të njeriut janë nëpërkëmbur. Nga Afganistani në Bosnje, nga Iraku në Çad, nga Gjeorgjia në Kosovë, ushtarakët tanë, me idealin e lirisë dhe demokracisë kanë luftuar përkrah aleatëve tanë të natyrshëm për ta bërë botën një vend më të mirë për të jetuar. “Gjithmonë në të tilla raste thuhet se puna nuk mbaron këtu, se përvjetorë të tjerë na presin dhe se ditë më të mira do të vijnë. E natyrisht që asgjë nuk mbaron këtu, por varet se si ne të gjithë së bashku, do ta bëjmë Shqipërinë një vend më të mirë, për fëmijët tanë dhe të ardhmen e kombit. Dhe unë do ringjall një parullë të luftës, pa komplekse nostalgjie e as ndrydhje për rënie në gabim ideologjik. Të punojmë për përparimin e Shqipërisë pa dallim feje, krahine e ideje”, ka përfunduar ministrja e Mbrojtjes Mimi Kodheli.
Më pas, para tribunës nga Truproja e Nderit e Forcave të Armatosura u performua një skenar veprimesh rreshtore me armë dhe koreografi mjaft të gjetur, ndërsa në një lartësi të ulët fluturuan një skuadrilje helikopterësh Cougar të Bazës Ajrore të Farkës.
Më herët, krerët më të lartë të shtetit kanë bërë homazhe dhe kanë vendosur kurora me lule pranë monumentit “Nënë Shqipëri” në varrezat e Dëshmorëve të Atdheut. Një kurorë me lule vendosi ministrja e Mbrojtjes, znj. Mimi Kodheli dhe shefi i Shtabit të Përgjithshëm i FA-së, gjeneralmajor Jeronim Bazo. Fjala e plotë e ministres Kodheli në kremtimin 70-vjetorit të Çlirimit të atdheut 70-vjetorit të Çlirimit të atdheut
© Ministria e Mbrojtjes 2024 - Të gjitha të drejtat e rezervuara.