Ministrja e Mbrojtjes, znj. Mimi Kodheli gjatë vizitës së saj në Maqedoni sot u ndal në Tetovë, ku takoi kreun e PDSH, z. Menduh Thaçi.
Znj. Kodheli e njohu z. Thaçi me diskutimet që zhvilloi me krerët më të lartë maqedonas, me të cilët theksoi nevojën e implementimit të drejtë dhe të menjëhershëm të Marrëveshjes së Ohrit.
Znj. Kodheli dhe z. Thaçi diskutuan gjithashtu edhe lidhur me arsimimin e shqiptarëve në tërësi dhe pjesëmarrjen e angazhimin e femrës shqiptare në veçanti, në të gjithë aktivitetet dhe strukturat vendimmarrëse në vend.
Ministrja Kodheli kërkoi që shqiptarët e Maqedonisë të jenë më të bashkuar dhe të përkrahin njëri - tjetrin. “Vetëm bashkimi real i faktorit shqiptar në Maqedoni do të rrisë forcën e përfaqësimit dhe do të garantojë më shumë qytetarët e thjeshtë në të drejtat dhe liritë e tyre kushtetuese”, theksoi znj. Kodheli. Ministrja e Mbrojtjes tha se duhet punuar më shumë në këtë drejtim, ashtu siç shpresoj - vijoi ajo – “se përpjekjet tuaja edhe në nivel institucional do të jenë garantë të barazisë së trajtimit të shqiptarëve”.
Bashkëbiseduesit vlerësuan se integrimet euroatlantike të vendit dhe rajonit janë me interes të veçantë për shqiptarët.
Ministrja e Mbrojtjes znj. Mimi Kodheli vizitoi në shtëpinë e tij kryetarin e BDI z. Ali Ahmeti.
