Deklaratë e përbashkët për mediat e ministrit të Mbrojtjes të Shqipërisë dhe Kosovës

 

Deklaratë për mediat e ministrit të Mbrojtjes të Republikës së Shqipërisë Olta Xhaçka:

I nderuar zoti Ministër,

zonja dhe zotërinj,

jam vërtetë e lumtur që pres sot ministrin e Mbrojtjes së Republikës së Kosovës, z. Anton Quni. Dua t’ i uroj atij dhe të gjithë miqve të tjerë nga Kosova mirëseardhjen. Është gjithmonë një kënaqësi kur kemi mundësinë të ulemi e të flasim së bashku për të çuar përpara jo vetëm interesat e shqiptarëve kudo në rajon, por edhe sigurinë, stabilitetin dhe zhvillimin e mbarë rajonit.

Para së gjithash, dua ta uroj kolegun Quni për detyrën e tij të re. E di që ai vjen në këtë post në një moment plot sfida për Kosovën. Një moment realisht jetik për të ardhmen e Kosovës dhe pozicionin e saj në rajon, por unë nuk kam asnjë dyshim që kolegu Quni, ashtu si dhe qeveria e drejtuar nga kryeministri Hoti dhe mbarë klasa politike në Kosovë, do të dinë ta shfrytëzojnë më së miri këtë moment kaq të rëndësishëm për Kosovën, qytetarët e saj dhe shqiptarët kudo që ndodhen. Jam po ashtu e sigurt, që ata kanë të gjithë kapacitetet jo vetëm për t’ u përballur me sfidën e negociatave, por edhe për të çuar përpara integrimin e Kosovës në strukturat euroatlantike.

Z. Ministër,
dua t’ju siguroj ju dhe përmes jush qeverinë dhe vëllezërit tanë kosovarë, që mbështetja jonë do të jetë e pakursyer në çdo aspekt. Sot në rajonin tonë ka paqe e stabilitet. Pavarësisht sfidave e vështirësive që kemi akoma përpara është bërë një progres i jashtëzakonshëm. Fakti që sot Mali i Zi dhe Maqedonia e Veriut janë anëtarë me të drejta të plota të NATO sigurisht që është një garanci më shumë për konsolidimin e mëtejshëm të stabilitetit dhe paqes që kërkojnë të gjithë popujt e rajonit. Dua të nënvizoj këtu diçka që e kam thënë në çdo forum ndërkombëtar, që kryeministri Rama e ka përsëritur në çdo rast që ka pasur dhe që është prej kohësh pozicioni zyrtar i Shqipërisë.

Përpjekja për të stabilizuar e zhvilluar rajonin tonë, nuk mund të jetë kurrë e suksesshme pa integrimin e plotë të Kosovës në strukturat Euro-Atlantike. Duke filluar padyshim me anëtarësimin në NATO dhe duke vazhduar më pas me integrimin në Bashkimin Europian.

Jemi të gjithë të vetëdijshëm që ka shumë punë për të bërë për të arritur këto objektiva madhore strategjike dhe dua ta garantoj ministrin që qoftë në rrafshin politik e diplomatik, qoftë në atë teknik ne do të jemi krah për krah vëllezërve tanë duke ndarë të gjithë eksperiencën e Shqipërisë me integrimin në NATO.

Për më tepër, i kam shprehur kolegut Quni angazhimin tim personal dhe angazhimin e kryeministrit Rama, për hapjen e një kapitulli të ri dhe shumë intensiv bashkëpunimi në fushën e Mbrojtjes, i cili fillon me negocimin në një kohë sa më të shkurtër të një marrëveshjeje të re bazë mes dikastereve tona, që shpresoj ta firmosim gjatë vizitës sime të ardhshme në Kosovë.

Edhe njëherë, ju falënderoj që jeni sot këtu dhe jam e bindur që me këtë vizitë fillon një kapitull i ri dhe shumë intensiv në bashkëpunimin mes Shqipërisë dhe Kosovës në fushën e Mbrojtjes.

VIDEO

Deklaratë për mediat e ministrit të Mbrojtjes të Republikës së Kosovës Anton Quni:

Është një ndër momentet e veçanta të mia, po ashtu edhe e bashkëpunëtorëve të mi që gjenden me mua që t’ i kalojmë këto momente së bashku duke i trajtuar disa tema dhe çështje, që janë të interesit të përbashkët.

Ashtu siç biseduam dje, sot dhe besoj që edhe në të ardhmen do i trajtojmë, ne jemi përballë një armiku që nuk njeh gjenerata, mosha, besime, regjione, etni siç është COVID – 19. Është e natyrshme që ne, si një organizatë e re ushtarake, së bashku me ju në rrafshin qeverisës, politikë por edhe në atë profesional, t‘ i shkëmbejmë të gjitha përvojat se si të menaxhojmë këtë situatë me kapacitetet ushtarake duke iu asistuar autoriteteve civile.

Normal se janë edhe tema të tjera të interesit të përbashkët, siç jeni të njoftuar, ne, si Forca e Sigurisë së Kosovës, si një organizatë tani me një mision të ri ushtarak, në vitin e dytë të fazës së parë të tranzicionit në kuadër të planit gjithëpërfshirës të tranzicionit, kemi nevojë për ndihmën e partnerëve strategjikë, por është e nënkuptueshme që kjo ndihmë pritet nga ata me të cilët ne i ndajmë interesat e përbashkëta, shqetësimet e përbashkëta, pasi për shumë dekada ne e kemi një rrugëtim të përbashkët.

Është mirë që partnerët tanë strategjikë janë të përbashkët si për Shqipërinë, si për Kosovën, por kur flasim për nivelin e besimit, përkundër marrëdhënieve shumë të mira që i kemi me SHBA, me Gjermaninë, me Turqinë, Kroacinë, Britaninë e Madhe dhe shumë shtete të tjera mike, është e natyrshme që ndihma më e madhe pritet nga vëllezërit dhe motrat e Shqipërisë, që të na përkrahin në gjitha këto procese të zhvillimit të Forcave të Sigurisë së Kosovës. Profilizimi i tyre, ngritjes së kapaciteteve që edhe ne, në të ardhmen të jemi kontribues të rendit, qetësisë, paqes për të gjithë qytetarët në Kosovë, në regjion, por duke shkuar edhe më larg për gjithë njerëzimin ku ka nevojë për pjesëmarrjen e djemve dhe vajzave në uniformë.

Prandaj e them me tërë bindjen se ju jeni udhërrëfyesi jonë drejt integrimeve euroatlantike në rrafshin e sigurisë dhe në rrafshin ushtarak dhe, me plot bindje e them se, ne ju konsiderojmë si ambasadorin më të mirë që edhe Forcat e Sigurisë së Kosovës nesër të jenë krah për krah me të gjitha ato forcat që zhvillojnë aktivitete të ndryshme për t’u ndihmuar të gjithë atyre qytetarëve që kanë nevojë për siguri dhe për paqe.

Unë nuk e di që ka ndonjë adresë më të mirë ku ne mund të kërkojmë bashkëpunimin se sa Ministria e Mbrojtjes e Republikës së Shqipërisë.

Unë ju falënderoj shumë që përkundër situatës së krijuar nga COVID – 19, ju me bashkëveprimtarët, me kolegët, me stafin ushtarak keni gjetur kohë që t’ i trajtojmë disa çështje, të cilat janë në interes të përbashkët të Shqipërisë dhe Kosovës, por jo vetëm në kuadër të këtyre dy shteteve, por në emër të interesit të përbashkët edhe të njerëzimit. Sado që ka kauza të tilla që mund të rrisin dilemat, rezerva dhe t’u rrit bashkëpunimi jonë mund të rrezikojë interesat nacionale të ndonjë etnie apo të ndonjë kombi, ne mundemi me siguru se në bashkëpunimin tonë, në miqësinë tonë ashtu të ndërtuar me kulturën tonë, historinë, traditat tona, konventat ndërkombëtare, i marrim zotimet se ne do të jemi shumë përgjegjës karshi gjitha komuniteteve, karshi gjitha interesave të kombeve europiane dhe si kombi i qytetëruar dhe dy shtete të civilizuara, ne duhet të marrim përgjegjësitë tona që të japim kontribut me të gjitha kapacitetet ushtarake, të jemi në shërbim të qytetarëve kudo që ata janë dhe kanë nevojë për ne.

Unë pres që sa më shpejt të jeni mysafire e jona në Kosovë.

Arti ushtarak është art pa kufi ashtu siç është universi dhe galaksia. Është e natyrshme që nuk kemi arritur t’ i trajtojmë të gjitha temat, por besoj që në të ardhmen e afërt në Kosovë të diskutojmë edhe për shumë çështje që do të jenë në interes të përbashkët tonin edhe të regjionit.

Faleminderit shumë për interesimin, konsideratën dhe respektin dhe për tërë angazhimin që po bëni gjatë kësaj situate edhe për gjitha fushat dhe nevojat.




Apliko tani! Bëhuni pjesë e FA 16 tetor 2023 - 09 janar 2024 Nisin rekrutimet për ushtarë/detarë në Forcat e Armatosura, Ministria e Mbrojtjes e konsideron thelbësore për Forcat e Armatosura rekrutimin e ushtarëve me një profil sa më të lartë, në kushtet e një profesionalizmi....
Vijnë në Shqipëri helikopterët e parë Black Hawk Janar 2024 Kanë mbërritur në Shqipëri dy helikopterët Black Hawk, si pjesë e parë e porosisë së bërë nga vendi ynë dhe mbështetur nga fondet e ndihmës...
Direktiva e Mbrojtjes 2024Janar 2024 Dokumenti bazë mbi planet dhe programet e punës e të veprimtarive të MM, të FA në përmbushje të misionit kushtetues, si dhe detyrimeve si vend anëtar i NATO...
11 vende të lira pune; Peleshi thirrje ekspertëve: Aplikoni! Janar 2024 Ministri i Mbrojtjes Niko Peleshi ka bërë thirrje për aplikime nga ekspertët e fushave të Teknologjisë së Informacionit dhe Inxhinierisë për 11 vende të reja pune në Qendrën e....
Përurohen mjediset e reja të Muzeut të Forcave të Armatosura Dhjetor 2023 Muzeu i Forcave të Armatosura do të jetë tashmë në mjediset e tij të reja në Bërzhitë. Në ceremoninë e inaugurimit të hapësirave të reja morën pjesë ministri i Mbrojtjes Niko Peleshi, ministri për Evropën dhe Punët e Jashtme Igli Hasani...
Ministeriali i Mbrojtjes së Nismës SHBA-Karta e Atlantikut Nëntor 2023 Në takimin e Ministrave të Mbrojtjes të vendeve të NATO-s në Bruksel, ministri i Mbrojtjes Niko Peleshi mes të tjerave vuri theksin mbi zhvillimet në Veri të Kosovës....
Ministeriali i Mbrojtjes i vendeve të NATO, Bruksel Tetor 2023 Në takimin e Ministrave të Mbrojtjes të vendeve të NATO-s në Bruksel, ministri i Mbrojtjes Niko Peleshi mes të tjerave vuri theksin mbi zhvillimet në Veri të Kosovës....
Shqipëria merr sërish drejtimin e Brigadës së Europës Juglindore Gusht 2023 Ministri i Mbrojtjes, Niko Peleshi ka bërë me dije me anë të një postimi në mediat sociale që nga sot Shqipëria merr drejtimin e Brigadës së Europës Juglindore (SEEBRIG)....
Përmbyllet “Defender Europe ’23” në Shqipëri Qershor 2023 Për mëse një muaj mbi 24 mijë trupa nga 26 vende NATO e partnere nëpërmjet skenarëve strategjikë e operacionale në tokë, ajër e det demonstruan fuqinë në...
Revista Mbrojtja Nr. 01 (2024) Janar 2024Numri i fundit i revistës "Mbrojtja"...
Gazeta Ushtria 08 mars 2024Numri i fundit i të përjavshmes gazeta "Ushtria"...






Arkivi Lajmeve
Mars 2024
Ma En Pr Sh Di
26 27 28 29 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31