Newsroom Fjalime të ministrit Fjala e ministres Kodheli me rastin e marrjes së detyrës së SHSHP të FARSH
Fort të nderuar të pranishëm,
Sot është një tjetër ditë e rëndësishme për Forcat e Armatosura të Republikës së Shqipërisë, gjeneral Bardhyl Kollçaku sapo ka marr zyrtarisht detyrën e Shefit të Shtabit të FA. Ky është një nga momentet më të rëndësishëm për strukturës tonë ushtarake si dhe për strukturën e mbarëvajtjes për gjithë burrat e gratë që punojnë në këtë ambient të rëndësishëm sigurie. gjeneral Kollçaku është produkt i natyrshëm i karrierës së një ushtaraku shqiptarë. Ky ushtarak i kompletuar me 35 vite nën uniformë, ka mbajtur detyra të rëndësishme në strukturat tona, por edhe në shtabet ndërkombëtare.
Batalioni i Mbështetjes i Shtabit të Përgjithshëm, b2k, Drejtoria e Politikave Strategjike, Drejtoria e Planifikimit dhe Agjencia e Sigurisë dhe Inteligjencës së Mbrojtjes janë disa nga stacionet më të rëndësishme të karrierës së tij. OKB dhe NATO kanë pasur ushtarakun Kollçakun në strukturat e tyre dhe kjo, është vetëm një pasqyrë e shkurtër e karrierës së shefit të ri të Shtabit.
Të nderuar pjesëmarrës, si ministër i Mbrojtjes jam përpjekur gjatë për të kthyer në normalitet Forcat tona të Armatosura. E nisëm këtë rrugëtim me gjeneral Bazon në shtator të vitit 2013, por edhe me shumë ushtarakë dhe civilë të tjerë. Na u desh një paketë e qartë reformash për këtë strukturë korrupsioni aktiv dhe reputacioni negativ. Katër vite më parë në këtë strukturë nuk vlente karriera, profesionalizmi, aftësitë, por edhe vështrimi i ministrit ishte pothuajse më i mjaftueshmi për të pasur një karrierë sa më të shkëlqyer. Një menaxhim personeli jashtë çdo imagjinate dhe parashikimi, katër vite më parë; një situatë financiare e goditur rëndë nga borxhet e akumuluara ndër vite; një bazë ligjore e cila i përkiste një periudhe të viteve 2003 - 2005, ndërkohë që Shqipëria kishte ditë që kishte hyrë në NATO. Përmendur të gjitha këto dhe shumëçka e pathëne thelbin e realitetit të cilën ju të nderuar ushtarakë përpiqeshit t’i mbijetonin sistemit. Madje në këtë realitet dhe t’i shërbenit shumë mirë vendit.
E kam thënë edhe më parë që përgjigjet e dilemave të mia i gjeta absolutisht mes jush që në orët e para. U takova me burra e gra me uniformë, të cilët vazhdonin të luftonin për dinjitetin e tyre. Mes jush të nderuar miq me uniformë gjeta zgjidhje për përmirësimin e situatës.
Forcat e Armatosura në thelb janë të bazuara në rregull, janë të bazuara në traditë dhe në nder. Këto elementë të kombinuar me ruajtjen e vlerave demokratike dhe me kontrollin civil mbi atë ushtarakë i gjeta të cenuara rëndë dhe përsëri e theksoj, zgjedhjet i gjeta thjeshtë dhe vetëm mes jush ushtarakëve dhe ushtarakeve të FA tona. Por kjo përpjekje katër vjeçare pati rrugës edhe pengesa të qëllimshme; për mbi 10 muaj FA u lanë qëllimisht pa shef shtabi. Gjej rastin të falënderoj gjeneral Bazon për punën e tij të palodhshme dhe për bashkëpunimin me mua si ministër i Mbrojtjes. Ndërkaq falënderoj kryeministrin Rama dhe presidentin Meta për gatishmërinë e treguar për dekretimin e gjeneral Kollçakut. Normaliteti i Republikës së Shqipërisë duhet të jetë dhe është për fat të mirë sot mbi dëshirat personale. Sot po tregojmë se ky vend është një vend normal, i rregullt, dinjitoz dhe aleat i strukturës më të rëndësishme politiko-ushtarake, NATO.
Urimet janë për të gjithë trupën e ushtarakëve. Njerëz të sakrificës, vetëmohimit dhe të dashurisë për atdheun. Kjo është hera e fundit që marr pjesë në një aktivitet kaq të zgjeruar me ju në cilësinë e ministrit të Mbrojtjes. Në këto katër vite jam përpjekur dhe kam përjetuar një eksperiencë unike. Kam njohur njerëz, gra dhe burra nga të cilët kam mësuar shumë. Kam mësuar se ushtarakët janë njerëz të sakrificës, vetëmohimit, njerëz që e duan atdheun, e duan flamurin, por kam parë padyshim edhe shembuj të këqij. Shërojini ato pak plagë që keni dhe mos harroni se kundërshtari juaj nuk është në llogoren përballë.
Dua të falënderoj shumë njerëz me emër mbiemër dhe detyrë. Për fat të keq nuk do të mund ta mbërrij ta bëj dot këtë gjë, sepse lista është realisht shumë shumë e gjatë. Gjithsesi faleminderit të gjithëve ju të cilët në Ministrinë e Mbrojtjes bëtë të mundur të kemi këtë realitet, që është krejt i ndryshëm nga realiteti i mëparshëm, që të jetë një ndër realitetet më të mira të mirëqeverisjes së këtij vendi. Treguam në këto 4 vite se mund ti modernizonim FA, mund të përdornim më mirë burimet në dispozicion, mund të merrnim pjesë në çdo mision dhe stërvitje të aleancës në tokë, det dhe në ajër. Kemi bërë të mundur forcimin e përfaqësimit tonë ushtarak në Afganistan, Kosovë, Letoni, Bosnje, Mali, detin Egje. Kudo ku kemi shkuar, ju na keni nderuar ndaj ju falënderoj nga zemra.
Njerëzisht e kam të vështirë të ndahem prej jush...
