Newsroom Fjalime të ministrit Fjala e ministres Xhaçka me rastin e 97 vjet Xhenio dhe Artileri
Fjala e plotë e ministrit të Mbrojtjes në ceremoninë e posaçme të organizuar në Batalionin e Xhenios (bxh) të KM me rastin e 97 - vjetori të krijimit të Batalionet e Xhenios dhe të Artilerisë.
Të nderur miq, veteranë, komandantë të njësive tona të Xhenios dhe Artilerisë!
Historia ka bërë që përvjetori i dy festave të reparteve të shquara të Forcave tona të Armatosura, sikurse janë ato të Xhenios dhe Artilerisë, natyrshëm, të vijë i dubluar. Gjithsesi, kjo nuk relativizon aspak rëndësinë e të dyjave.
Përveç ndjesisë pozitive që më jep pjesëmarrja në këtë eveniment, më duhet të pohoj se, nëse ka një forcë që i jep kuptim atributit “ushtri e qytetarëve të saj”, kjo është Arma e Xhenios.
97 vjet më parë, në janar të vitit 1921, kjo armë nisi rrugën e saj përmes punës, sakrificave, në shërbim të jetës dhe sigurisë së popullit në kushtet e paqes.
Veprimtaria juaj ka shënuar rubrika të pafundme kontributi, ku puna juaj ka ndikuar drejtpërsëdrejti në përmirësimin e jetës së qytetarëve. Në cilësinë e ministrit të Mbrojtjes garantoj se Forcat e Armatosura do të jenë pranë komunitetit në çdo ditë të vitit, duke iu ndodhur pranë çdo njeriu, kryesisht më të dobtëve e më të pafuqishmëve, për t’ua bërë jetën më të lehtë dhe për të përballuar bashkërisht vështirësitë. Vetëm në 3 muajt e fundit, efektivët e Batalionit Xhenio i kanë ardhur në ndihmë mbi 25 mijë banorëve në zona problematike duke ndërtuar 12 ura. Por jo vetëm kaq. Njësitë dhe repartet xheniere kanë marrë pjesë në riparimin e rrugëve, tharjen e kënetave, ndërtimin e kanaleve bonifikuese, argjinaturave, hidrovorëve, ujësjellësve, eliminimin e pasojave të fatkeqësive natyrore si tërmetet dhe përmbytjet, pa harruar edhe ndërtimin e tuneleve dhe bazave tona ushtarake.
Përballimi me sukses i emergjencave civile në ditët e para të muajit dhjetor ishte treguesi më i mirë se, Forcat e Armatosura janë në krye të detyrës në çdo moment me atdhedashuri edhe me përkushtim të jashtëzakonshëm ndaj punës.
Krahas kontributit në ndërtimin e urave në kohë rekord, efektivët e Komandës Mbështetëse shpërndanë mbi 800 ton produkte ushqimore dhe blegtorale. 6 bashki, më shumë se 5 mijë familje u asistuan nga efektivët e FA për të kapërcyer pasojat e përmbytjeve.
Sot dua të vlerësoj edhe efektivët e kompanisë për eliminimin e materialeve të rrezikshme EOD, kontributi i të cilëve, i vlerësuar nga drejtues të misioneve në vendet ku ne aktualisht jemi të pranishëm si Letonia apo Mali, është një tjetër provë e profesionalizmit të ushtrisë shqiptare.
Ndaj sot, dua t’u them “Faleminderit” me kokën lart, ju, të nderuar efektivë të pranishëm në këtë ceremoni, por edhe çdo efektivi të Forcave tona të Armatosura, që po na ndrisin faqen në kohë lufte dhe paqeje, në mot me diell e me stuhi, me një shpërndarje gjeografike që tanimë i tejkalon kufijtë tanë. Me këtë rast, ne kujtojmë sot oficerët, ushtarët, civilët, të gjithë ata që i kanë kushtuar jetën mbrojtjes dhe rimëkëmbjes së atdheut.
Të nderuar motra dhe vëllezër nën uniformë!
Sot festojmë edhe 97 - vjetorin e krijimit të Batalionit të Artilerisë, e cila, si tërësi e armëve të rënda të zjarrit dhe trupave ushtarake e pajisur me to, simbolizon reagimin tonë të strukturuar si shtet, qysh prej ditës së krijimit të Ushtrisë Shqiptare.
Shekulli që shkoi, me gjithë kompleksitetin dhe problematikën që solli, mbarti në vetvete një historik të natyrshëm për të gjitha armët e ushtrisë sonë. Krijimi dhe zhvillimit i mbrojtjes së atdheut është i lidhur me zhvillimin e mjeteve sulmuese tokësore, ajrore dhe detare.
Të dashur miq,
Sot jemi në kushtet e ristrukturimit të shekullit të ri, i cili gjithashtu paraqet jo pak sfida dhe rreziqe karshi një sigurie të paqëndrueshme në mbarë botën. Përgjatë viteve të fundit kemi bërë përpjekje, duke shënuar rezultate konkrete në modernizimin e mbrojtjes sonë.
Rikonfirmoj se, qeveria shqiptare dhe Ministria e Mbrojtjes është e angazhuar në një proces modernizimi të FA, me synim rritjen dhe përmirësimin cilësor të kapaciteteve operacionale të strukturave tona ushtarake dhe, veçanërisht, të atyre strukturave që janë pjesë e mbrojtjes kolektive të NATO.
Mbetem besimplotë se, investimi në të ardhmen e Forcave të Armatosura e bën Shqipërinë një vend më të sigurt për të ardhmen e brezave që do të vijnë.
Me urimin për të qenë gjithmonë në krye të zbatimit të detyrave me cilësi dhe në kohën e duhur, si ministre e Mbrojtjes, unë shpreh bindjen se artiljerët dhe xhenierët e Forcave tona të Armatosura do të punojnë me përkushtim dhe përgjegjësi të plotë për realizimin e misionit kushtetues dhe detyrave që do t’u ngarkohen duke e ngritur edhe më lart emrin e nderuar të ushtrisë shqiptare.
Gëzuar dhe urime!
