Newsroom Fjalime të ministrit Fjala e përshëndetëse e ministres së Mbrojtjes në ceremoninë e hapjes së Vitit Akademik 2018 - 2019 në AFA
Fjala e përshëndetëse e ministres së Mbrojtjes znj. Olta Xhaçka mbajtur në ceremoninë e hapjes së Vitit Akademik 2018 - 2019 në Akademinë e Forcave të Armatosura (AFA), ceremoni, e cila u zhvillua në mjediset e garnizonit "Skënderbej"
Të nderuar gjeneralë,
të nderuar studentë dhe pedagogë të Akademisë së Forcave të Armatosura,
të nderuar pjesëmarrës,
përshëndetje të gjithëve,
sot po hapim dyert e auditorëve të Akademisë së Forcave të Armatosura për të filluar vitin akademik 2018 - 2019.
Megjithëse evente të tilla janë bërë të zakonshme për institucionet tona arsimore ushtarake, përsëri çdo herë të re ato mbartin emocionet e veta.
Dita e sotme përbën një eveniment të veçantë për 171 studentët që do të ndjekin studimet këtë vit akademik në të gjitha programet që zhvillohen në Akademinë e Forcave të Armatosura, duke filluar nga kursi ku përgatiten oficerët e rinj deri tek Kursi i Lartë i Sigurisë dhe Mbrojtjes (KLSM), ku përgatiten gjeneralët e ardhshëm.
Sot ky është një mozaik i mrekullueshëm dhe një ndërthurje breza oficerësh, të cilët gjatë shërbimit në detyra të ndryshme të Forcave të Armatosura, kthehen dhe rikthehen atje nga e nisën, në auditorët e Akademisë për të thelluar dijet, për të vijuar ecurinë në karrierë si dhe për t’i shërbyer më mirë Forcave të Armatosura, vendit dhe Aleancës.
Është kënaqësi të shoh sot, se oficerëve tanë i janë bashkuar edhe oficerë nga forcat e armatosura të vendeve Aleate dhe mike si Britania e Madhe, Gjermania, Italia, Greqia, Kroacia, Mali i Zi, Maqedonia, Gjeorgjia dhe Kosova, të cilët kanë zgjedhur auditorët e Akademisë sonë jo vetëm për të thelluar njohuritë e tyre, por edhe për të shkëmbyer përvojat e ushtrive dhe kulturave të vendeve nga vijnë. Ky kurs është gjithashtu edhe një mundësi e shkëlqyer për të lidhur dhe forcuar miqësitë.
Është shumë kënaqësi t’ju shikosh së bashku, si në auditorët e Akademisë ashtu si edhe në teatrot e operacioneve, duke kryer detyra nga më sfidueset.
Tashmë KLSM e ka krijuar fizionominë e vet dhe ne po punojmë që ta zhvillojmë edhe më tej. Do të doja të vija në dukje se 171 studentët e pranishëm sot në sallë nuk janë të vetmit që do të ndjekin studimet ushtarake, por janë edhe shumë të tjerë që po i vijojnë këto studime në akademitë më prestigjioze të aleatëve tanë, si SHBA, Itali, Turqi, Greqi, Kosovë.
Dita e sotme përbën një eveniment veçanërisht për 59 kandidatët e rinj për oficerë, të cilët sapo kanë zgjedhur të bëjnë pjesë të jetës së tyre, karrierën e bukur ushtarake, kanë vendosur t’i përkushtohen një prej profesioneve më fisnike dhe më të nderuar, aq edhe me sakrifica. Mënyra më e mirë për të garantuar të ardhmen është ta ndërtosh vetë atë dhe ju sot po vendosni gurin e parë në të ardhmen tuaj dhe të ardhmen e Forcave tona të Armatosura.
Ju falënderojmë për zgjedhjen tuaj dhe ju urojmë mirëseardhjen në auditorët tanë!
Para pak kohësh, po këtu u diplomuan 43 të oficerë të rinj nga Akademia e Forcave të Armatosura; 43 qytetarë të devotshëm, 43 të rinj plot ëndrra dhe pasion, të cilët iu shtuan radhëve të Forcave të Armatosura dhe tashmë kanë filluar t’i përdorin në praktikë njohuritë që kanë marrë në këta auditorë.
Ashtu si ata, edhe ju do t’i nënshtroheni një programi të veçantë trajnimi dhe edukimi dhe do ta meritoni titullin “Oficer”, një titull që jam e bindur që do t’ju hapë dyert e jetës dhe do t’ju krijojë mundësi të shumta gjatë karrierës tuaj.
Edukimi dhe rritja e profesionalizmit është një proces i pandërprerë i strategjisë sonë të arsimit dhe edukimit ushtarak. Prania e studentëve të Kursit të Komandës dhe Shtabit, Kursit të Lartë të Oficerit dhe Kursit të Lartë të Sigurisë dhe Mbrojtjes është dëshmi e qartë e këtij procesi.
Ju i jeni nënshtruar një përzgjedhjeje rigoroze si oficerët më të mirë, të projektuar për të vijuar promovimin në karrierë, prandaj prej jush kërkohet që të vlerësoni maksimalisht këtë mundësi dhe ta shfrytëzoni në interes të thellimit të njohurive tuaja, jo vetëm nëpërmjet përvetësimit të programit, por edhe nëpërmjet ndarjes të eksperiencave të krijuara ndër vite, të shërbimit në Forcat e Armatosura dhe sidomos në fushën e operacioneve ku keni marrë pjesë.
Si në çdo profesion, procesi i nxënies në auditor është i ndërlidhur me praktikën në terren dhe asesi të ndara. Por në rastin e FA ka një veçori dhe veçoria qëndron në faktin se terreni (fusha e operacioneve) nuk i toleron lehtësisht gabimet dhe ato mund të kenë pasoja të mëdha.
Prandaj, nga të gjithë ju, studentët dhe stafi akademik, kërkohet një angazhim maksimal në të gjitha veprimtaritë mësimore, nga leksionet e diskutimet, tek zbatimi konkret në stërvitjet simuluese e praktike në terren për të gjitha skenarët dhe situatat e angazhimit të Forcave të Armatosura. Ndaj, për këtë arsye, unë nxis Komandën e Doktrinës dhe Akademinë të bëjnë pjesë të programit të tyre për njohjen me punën, stërvitjet, angazhimet dhe zhvillimet e reja në strukturat e tjera të Forcave të Armatosura. Njëkohësisht, inkurajoj edhe drejtuesit e këtyre strukturave të mbajnë lidhje dhe bashkëpunim të ngushtë me Akademinë, për të bërë pjesë të studimeve të Akademisë edhe problematika të përgjegjësisë së tyre, që kërkojnë zgjidhje. Pra është një proces i pandarë që ushqen njëri-tjetrin.
Institucionet arsimore ushtarake duhet të jenë laboratori i përpunimit të mendimit teorik ushtarak, vendi ku duhet të përpunohen idetë për zgjidhjen e problemeve të ndryshme. Për këtë, pa diskutim që na nevojitet një vizion i ri për arsimimin dhe edukimin ushtarak, me synim që ai të jetë sa më cilësor, më konkurrues dhe atraktiv dhe me më shumë vlera. Ne nuk përgatisim thjesht oficerë, por ne përgatisim edhe specialistë të të gjitha fushave për të cilat Forcat e Armatosura kanë shumë nevojë, si inxhinierë, informaticienë, financierë, mjekë, etj. Ne përgatisim personel që të na përfaqësojë në mënyrën më profesionale dhe më dinjitoze në strukturat e NATO, në shtabet ndërkombëtare, në operacionet e NATO, BE dhe OKB, si dhe stërvitje dhe aktivitete të shumta të përbashkëta që kemi me Aleancën. Ky spektër angazhimesh, por edhe këto mundësi që krijohen e që sa vjen e do të shtohen, kërkojnë nga Akademia në kurrikulat e saj, në studimet dhe diskutimet të gjejnë sa më shumë vend në lidhje me këto tematika të reja në lidhje me këto detyra dhe përgjegjësi. Ndaj kjo është sfida juaj afatshkurtër dhe afatmesme nëse do ta quajmë kështu.
Nga ana tjetër, edukimi dhe rritja e profesionalizmit të burimeve njerëzore do të mbetet një nga prioritetet tona kryesore dhe për këtë qëllim po punojmë për të garantuar edukim sipas standardeve bashkëkohore, si dhe për të zhvilluar politika të cilat sigurojnë dhe garantojnë ecurinë në karrierë dhe meritokracinë në radhët e Forcave të Armatosura. Pa diskutim që qëllimi ynë është të planifikojmë të ardhmen e Forcave tona të Armatosura dhe do të investojmë në funksion të këtij objektivi të gjitha energjitë tona në arsimimin dhe edukimin e tyre.
Këto kurse që po fillojnë sot janë guri i themelit i formimit të oficerëve, janë guri i themelit të formimit të lidershipit të Forcave të Armatosura dhe pa diskutim të së ardhmes së saj.
Ndaj, nuk më mbetet veçse t’ju uroj suksese, një vit sa më të mbarë akademik. T’ju them faleminderit të gjithëve kryesisht miqve tanë nga vendet aleate që janë bërë pjesë e Kursit të Lartë të Sigurisë dhe shpresoj shumë që ne të justifikojmë besimin që ata kanë investuar tek ne dhe t’ju siguroj të gjithëve se e ardhmja juaj, karriera juaj në FA është prioriteti kryesor i yni dhe i imi si titullar i institucionit dhe të gjithë së bashku do bëjmë maksimumin për të garantuar më të mirën e mundshme.
Faleminderit gjithsecilit dhe një Vit sa më të mbarë Akademik!
