Newsroom Fjalime të ministrit Fjala e ministres së Mbrojtjes në ceremoninë e dorëzimit të pajisjeve të reja kundër zjarrit nga Shtetet e Bashkuara për Forcat e Armatosura të Shqipërisë
Fjala e ministres së Mbrojtjes në ceremoninë e dorëzimit të pajisjeve të reja kundër zjarrit nga Shtetet e Bashkuara për Forcat e Armatosura të Shqipërisë
Të nderuar pjesëmarrës,
Është vërtet një kënaqësi për mua që jam sot këtu, që jemi mbledhur te gjithë sot këtu, me miqtë tanë të Ambasadës Amerikane.
Dua të falënderoj shumë të Ngarkuarën me Punë të Ambasadës, e përmes saj aleatin tonë strategjik SHBA, por edhe Komandën Amerikane në Europë, e padyshim taksapaguesit amerikanë, për këtë dhuratë bujare që mundëson forcimin e kapaciteteve të mbrojtjes civile shqiptare.
Jam vërtetë shumë e lumtur për marrëdhënien e shkëlqyer që kemi arritur të ndërtojmë mes nesh. Është diçka e rrallë, kur një aleancë, kur një marrëdhënie mes shtetesh, nuk mbështetet thjesht në interesa të përbashkëta ekonomike, politike apo ushtarake, por edhe në një admirim e miqësi gjenuine mes dy popujsh.
Një miqësi që buron nga fakti që popujt tonë ndajnë të njejtat vlera e të njejtin vizion për shoqërinë dhe shtetin ku duan të jetojnë.
Besoj që flas në emër të gjithë shqiptarëve kur them që i detyrohemi një borxh shumë të madh mirënjohje miqve tanë amerikanë, që na janë gjendur vazhdimisht në momentet më kyçe të historisë sonë, të historisë së Shqipërisë. Historia e Shqipërisë do të kishte qenë shumë e ndryshme pa këtë miqësi e pa këtë mbështetje.
Duke filluar që nga zanafilla e shtetit shqiptar dhe presidenti Wilson e duke vazhduar deri tek përpjekja për të ndërtuar sot një Shqipëri moderne dhe europiane.
Nuk e teprojë aspak kur them që kanë qenë miqtë tanë amerikanë, por dhe ata europianë, që jo vetëm na kanë mbështetur e nxitur në përpjekjet tona, por edhe na kanë orientuar e treguar vazhdimisht drejtimin e duhur që kur shqiptarët filluan të ecin në rrugën e panjohur të ndërtimit të një shteti demokratik të ngritur mbi themelet e sundimit të ligjit.
Dhe kjo është arsyeja që SHBA gëzojnë respektin që gëzojnë ndër shqiptarët, përtej përkatësive ideologjike apo politike.
Falë kësaj mbështetje sigurisht që Shqipëria ka ecur shumë dhe s’kam asnjë dyshim, që falë kësaj mbështetje dhe vendosmërisë së qeverisë shqiptare, e sidomos të qytetarëve të thjeshtë, do t’ia dalim sëbashku ta çojmë deri në fund me sukses ndërtimin e një Shqipërie më të mirë, më moderne dhe ku të sundojë ligji e drejtësia.
Por sigurisht, si ministre e Mbrojtjes besoj që më takon të bëj një falënderim të veçantë për ndihmën e jashtëzakonshme që SHBA i kanë dhënë FA. Duke filluar nga mbështetja vendimtare për anëtarësimi në NATO e duke vazhduar sigurisht me ndihmën e vazhdueshme që SHBA na kanë dhënë për të modernizuar FA e për të shtuar kapacitetet tona.
Ne kemi një bashkëpunim të shkëlqyer që sa vjen e thellohet dhe në fakt, vetëm pak muaj na ndajnë nga eventi i rëndësishëm i radhës që është stërvitja rajonale për emergjencat civile “Joint Reaction 19” në kuadër të Iniciativës Adriatic Charter A5, e cila do të zhvillohet këtë tetor në Tiranë, por ndërtimi i kapaciteteve për mbrojtjen civile ëshë një kopetencë e re që i është shtuar Ministrisë së Mbrojtjes, si pjesë e një reforme të plotë të Mbrojtjes Civile që u ndërmor bazuar në rekomandimet e Komandës Amerikane në Europë në 2014. Është një reformë për të cilën është punuar shumë dhe që do të gjejë zbatimin e saj me hyrjen në fuqi të projektligjit “Për mbrojtjen civile” që pritet të miratohet brenda këtij muaji në Kuvendin e Shqipërisë.
Për fat të keq, sidomos gjatë dekadave të fundit shteti shqiptar, qeveritë, politika, ka pasur një qasje që mund të përshkruhet saktë vetëm duke përdorur atë shprehjen “ku rafsha mos u vrafsha.”
Sepse ndërkohë që Shqipëria renditet si një nga 10 vendet me risk më të lartë ekonomik nga fatkeqësitë natyrore, por edhe me një shkallë të lartë risku për jetën e shëndetin e qytetarëve nga tërmetet, zjarret, përmbytjet, rrëshqitjet e tokës e orteket, gatishmëria e strukturave dhe institucioneve gjatë pjesës dërrmuese të tranzicionit ka qenë shumë e dobët për shkak të rrëmujës, kompetencave të paqarta, neglizhencës, autoriteteve e pushteteve që përpiqeshin per fat të keq t’i kalonin përgjegjësinë njëra - tjetrës në kushtet kur edhe ligji nuk i ndante saktë apo qartë këto përgjegjësi.
Nuk ka asnjë dyshim që sot, Mbrojtja Civile është më e përgatitur dhe më e aftë sesa ka qenë ndonjëherë në 3 dekadat e fundit për të mbrojtur vendin, komunitetet, qytetarët nga fatkeqësitë natyrore. Përballimi i situatës së dimrit me bllokimet nga dëbora e sidomos përballimi i situatës së krijuar në Korçë nga tërmetet ishin dëshmia më e mirë jo vetëm e përkushtimit të burrave e grave të Mbrojtjes Civile, por edhe i përgatitjes e koordinimit më të mirë dhe i rritjes së kapaciteteve logjistike dhe profesionale.
Sepse sigurisht që çdo strukturë, çdo organizatë, sado efikase e sado mirë e organizuar qoftë ajo, nuk mund të jetë kurrë e suksesshme pa resurset e pajisjet e duhura. Situata me zjarret e ka treguar më së miri sesa e vërtetë është kjo. Terreni i vështirë, thatësira, zonat e izoluara kanë bërë që shpesh për përballimin e këtyre situatave të mos mjaftojë thjeshtë përkushtimi e guximi i burrave e grave, që në fakt janë për tu admiruar se bëjnë kanë bërë vërtet një punë heroike.
Prandaj kjo mbështetje në kuadër të Programit për Asistencën Humanitare është kaq e çmuar dhe kaq e mirëpritur sot që jemi në prag të sezonit të thatë e të nxehtë kur frekuenca e zjarreve ka qenë zakonisht më e madhe. Nga sot, Mbrojtja Civile, FA janë më të përgatitura për të përballuar të papriturat e tekat e motit duke mbrojtur jo vetëm jetët e qytetarëve, pronat e tyre, por edhe pasuritë natyrore, pronën e përbashkët të gjithve ne.
Ndaj dhe njëherë nga zemra faleminderit shumë aleatit tonë strategjik, faleminderit shumë miqëve tanë amerikanë për ndihmën e pa çmuar dhe të pa kursyer që vazhdojnë t’i japin FA, që vazhdojnë t’i japin modernizimit të kapaciteteve tona përmes kësaj ndihme bujare dhe ne jemi gjithnjë këtu për të bërë më të mirën që kjo ndihmë bashkë me profesionalizmin dhe me dedikimin e strukturave tona të përkthehet në një punë shumë të mirë për mbrojtjen civile të vendit tonë, shumë faleminderit edhe një herë.
