Newsroom Fjalime të ministrit Fjala e ministres së Mbrojtjes Olta Xhaçka me rastin e prezantimit të Flotës së re të Emergjencave Civile
Më lejoni ta filloj fjalën time me një falënderim nga zemra për popullin mik turk, për qeverinë turke e sigurisht edhe për shkëlqesinë e tij Ambasadorin, për bashkëpunimin e shkëlqyer që kemi pasur për lidhjen dhe zbatimin e marrëveshjes për grantin.
Ne kemi një fjalë: miku i mirë duket në kohë të vështira. Dhe besoj që kjo fjalë përshkruan më së miri raportin e marrëdhëniet mes dy popujve, dy vendeve e dy qeverive tona.
Faza e parë e grantit të qeverisë turke na ka mundësuar të bëjmë shumë për pajisjen e strukturës së Mbrojtjes Civile me mjetet dhe pajisjet e nevojshme për të kryer detyrën e tyre. Vetëm pak ditë më parë, Kuvendi miratoi projektligjin që i hap rrugë thithjes së pjesës së dytë të grantit, falë së cilës ky proces modernizimi do të vazhdojë edhe më tej.
Dua ta theksoj që Shqipëria sidomos gjatë viteve të fundit ka marrë një mbështetje të jashëtzakonshme nga aleatët dhe NATO për modernizimin e Forcave të saj të Armatosura.
Projekti për modernizimin e Bazës së Kuçovës, është jo thjesht një projekt modernizues, por është mbi të gjitha një projekt që i jep Shqipërisë një rëndësi strategjike për Aleancën që nuk e ka pasur prej dekadash. E që për më tepër do t’i japë një hov të ri edhe zhvillimit ekonomik të zonës. Aktualisht, jemi në fazën përmbyllëse të miratimit te projekteve dhe më datë 15 korrik 2020, Komiteti i Investimeve i NATO ka miratuar dokumentin që autorizon NSPA të fillojë procedurat për implementimin e projekteve të Kuçovës.
Jemi gjithashtu në përfundim të fazës së parë të projektit të Sistemit të Integruar të Vëzhgimit të Hapësirës Ajrore, një tjetër projekt me rëndësi strategjike në arkitekturën e sigurisë së NATO, por sigurisht edhe për sigurinë e fluturimeve ajrore komerciale në vendin tonë.
Po kështu, falë bashkëpunimit me SHBA, kemi filluar të modernizojmë Forcën tonë Ajrore. Pak më parë, kemi nënshkruar kontratën e pranimit për pajisjen e Forcës Ajrore shqiptare me helikopterë Black Hawk, helikopterët, asistencë e qeverisë së SHBA. Pra, mes helikopterëve Black Hawk, që shumë shpejt do të jenë pjesë e Forcës tonë Ajrore, investimit në Bazën e Kuçovës, sistemin e radarëve pas marrëveshjes me kompaninë amerikane Lockeed Martin, investimin për rritjen e kapaciteteve operacionale të Policisë Ushtarake, etj, falë mbështetjes së aleatëve e veçanërisht atyre amerikanë, kemi hedhur hapa shumë të rëndësishëm drejt modernizimit dhe rritjes së kapaciteteve të FA.
Por shumë punë është bërë edhe për rritjen e kapaciteteve në përballimin e emergjencave. Dhe miratimi i projektligjit do t’i hapë rrugë përthithjes së një fondi prej 2,3 milion dollarësh, faza e dytë e grantit turk, për blerjen e mallrave dhe shërbimeve nga Ministria e Mbrojtjes. Sepse ashtu si në fazën e parë të grantit të akorduar nga Turqia për Ministrinë e Mbrojtjes edhe ky fond do të përdoret në funksion të përballimit të emergjencave civile me të cilat përballet vendi.
Brenda pak ditësh mbushet plot një vit që nga momenti kur Kuvendi miratoi ligji për Mbrojtjen Civile, i hartuar me mbështetjen e aleatëve, i cili solli një revolucion të vërtetë në formën e organizimit, në rritjen e kapaciteteve dhe profesionalizmit dhe në aftësinë tonë për të përballuar emergjencat.
Sot, kur nuk është mbushur ende viti nga fillimi i punës për ngritjen e kësaj strukture kaq të rëndësishme, e them me krenari që ia kemi dalë të ngremë një strukturë vërtet efikase, por ç’është më e rëndësishmja, edhe të pajisur me mjete nga më modernet e profesionalet.
Duke filluar me 6 ambulancat moderne, që janë në fakt minispitale lëvizëse të pajisura me të gjitha pajisjet e nevojshme, që nga respiratorët, kompletet e imobilizimit për frakturat apo edhe shumë aparatura të tjera për ndihmë të parë të specializuar, të adhura nga Turqia.
Duke vazhduar me rritjen e kapaciteteve për shuarjen e zjarreve, pajisjet për heqjen e ujërave pas përmbytjeve, mbi 100 çadra me sipërfaqe nga 25 deri në 100 metra katrorë, e deri tek 1250 uniformat e reja të branduara me logon e FA dhe EC, nga ku 500 palë uniforma të posaçme kundër shiut, 400 palë kundër zjarreve në pyje, që janë një nga sfidat tona të përvitshme, 250 palë uniforma kërkim shpëtimi dhe 100 uniforma për zjarrëfikës profesionistë.
Sigurisht, një vit më parë kur miratuam ligjin për Mbrojtjen Civile as nuk e kisha imagjinuar që pas 12 muajsh do të kishim arritur jo vetëm të ngrinim në këmbë një strukturë të tillë, por edhe të mbulonim një pjesë kaq të rëndësishme të nevojave të saj për pajisje e kapacitete teknike. Sepse ngritja e strukturave të Mbrojtjes Civile parashikohej të ishte një plan disa vjeçar. Kalimi i funksionit të emergjencës civile tek Ministria e Mbrojtjes në janar 2018 sigurisht ishte një sfidë për të gjithë ne. Ishte një sfidë sepse trashëguam një strukturë me vetëm 7 vetë, që më shumë bënin centralin telefonik dhe nuk thellohej aspak në hartimin e planeve e strategjive.
Jo vetëm struktura, por edhe i gjithë konstelacioni ligjor e institucional që rregullonte përballimin e emergjencave ishte i koklavitur, pa asnjë ndarje konkrete të përgjegjësive e penaliteteve. Dhe ç’është më e rëndësishmja e gjithë kjo strukturë udhëhiqej nga një filozofi reagimi ndaj fatkeqësive e nuk kishte asnjë përpjekje për t’iu paraprirë atyre me përgatitje, analiza risku, ndërhyrje. Ishte pra, një strukturë krejtësisht jashtë kohe dhe krejtësisht e paaftë për të përballuar sfidat gjithnjë në rritje që i vinë jetës dhe mirëqenies së qytetarëve nga fatkeqësitë natyrore.
Të gjithë jemi dëshmitarë sesa janë shtuar këto sfida, sesa i paparashikueshëm është bërë moti, e problemet që sjell ai duke filluar që nga zjarret masive në pyje e kullota e deri tek përmbytjet apo bllokimet e rrugëve nga dëbora.
Ligji i ri e vendos theksin tek parandalimi i fatkeqësive dhe ndan përgjegjësi të qarta për pushtetin vendor, siç është përcaktimi 4% i buxhetit vjetor të bashkive për emergjencat, dhe mbi të gjitha krijoi Agjencinë Kombëtare të Mbrojtjes Civile (AKMC); pra, nga drejtoria me 7 veta, kemi sot një Agjenci me 120 persona që bën menaxhimin dhe koordinimin.
Por sigurisht, 1 vit më parë, nuk e kisha menduar kurrë që brenda një viti do të na duhej të përballeshim me kaq shumë sfida e emergjenca të paprecedent. Duke filluar nga tërmeti tragjik i 26 Nëntorit, e duke vazhduar me pandeminë COVID - 19 lufta me të cilën ende nuk ka mbaruar.
Çdokush që ka studiuar historinë ushtarake e di që për çdo forcë të armatosur në botë një nga sfidat më të mëdha është pikërisht përballja me të papriturat. Ajo që e dallon një forcë të armatosur profesioniste e të aftë është pikërisht aftësia për t’u përshtatur me sfidat e për t’u bërë ballë sa më mirë të papriturave. Dhe besoj që nuk ka sot dëshmi më të qartë e më të pakundërshtueshme të profesionalizmit e nivelit të organizimit që kanë arritur sot Forcat e Armatosura, sesa aftësia që ato kanë treguar për të përballuar të papriturat që na ka rezervuar natyra apo dora e zotit.
Unë jam krenare për punën e çdo burri e çdo gruaje në uniformë që e ka bërë të mundur këtë performancë kaq të mirë. Jam krenare që falë punës së tyre, por edhe falë mbështetjes së miqve e partnerëve e të vetë kryeministrit, që ka qenë nga mbështetësit kryesorë të transformimit të emergjencave civile, qytetarët shqiptarë mund të jenë sot të sigurt që pavarësisht emergjencës apo fatkeqësisë, ata nuk do të jenë kurrë vetëm në momentin e tyre të nevojës.
Faleminderit!
