Newsroom Fjalime të ministrit Fjala e ministres së Mbrojtjes Olta Xhaçka me rastin e rihapjes së studimeve universitare në Akademinë e FA
Përshëndetje të gjithëve,
kur filluam diskutimet për ringritjen e Akademisë së FA, dita kur kjo akademi do të hapte dyert për studentët e saj të parë, dukej shumë e largët. Është e vështirë të imagjinosh sesa shumë punë, sa shumë përkushtim e vendosmëri është dashur nga të gjithë ata që punuan për të realizuar këtë projekt, për të ardhur tek kjo ditë.
Dhe dua të marr një moment t'i falënderoj sërish për gjithçka kanë bërë.
Nga gjithë gjëmat që kanë përjetuar FA gjatë dekadave të tranzicionit, mbyllja e Akademisë së FA është për mua më e pakuptueshmja. Nuk e kam kuptuar dot kurrë sesi dikush, një ministër, një qeveri, një forcë politike, mund të fliste në njërën anë për ringritjen e ushtrisë, e nga ana tjetër të mbyllte Akademinë. E aq më pak mundem ta kuptoj sesi kjo mund të ndodhte vetëm një vit pasi Shqipëria ishte pranuar si anëtare e NATO. I them këto, jo sepse dua të merrem me mënyrën sesi janë rrënuar FA në të shkuarën, por sepse dua ta bëj të qartë për të gjithë ata që kanë punuar për hapjen e akademisë, për ata që do të japin mësim në akademi dhe sidomos për ata që do të ndjekin studimet këtu, se çfarë rëndësie të jashtëzakonshme ka ky institucion për FA.
Nëse ne duam të ndërtojmë një forcë moderne, nëse duam të ndërtojmë një forcë profesioniste dhe mbi të gjitha nëse duam të ndërtojmë një forcë të ngritur jo mbi mikun e tarafin e mbështetjen politike, por mbi meritokracinë, rruga kalon nga Akademia. Është e pamundur të ndërtojmë një forcë të standardeve të NATO nëqoftëse na duhet vazhdimisht të mbështetemi tek bujaria e partnerëve dhe aleatëve për të përgatitur oficerët tanë. Sigurisht që specializimet, studimet, kualifikimet, trajnimet me aleatët do të vazhdojnë dhe, këtu gjej rastin të falënderoj nga zemra mbi të gjitha Shtetet e Bashkuara, Turqinë, Greqinë, Italinë e Anglinë, të cilat na kanë ndihmuar shumë për të plotësuar këtë boshllëk të madh, që e ka bërë akoma më të vështirë procesin e modernizimit e profesionalizimit të FA, por është e pamundur të ndërtojmë një forcë të aftë për t'u përballur me sfidat e sigurisë me të cilat na përball epoka ku jetojmë, të aftë për të përmbushur pritshmëritë e aleatëve ndaj FA, nëqoftëse nuk kemi mundësinë të përgatisim vit pas viti, në një institucion të mirëfilltë e të akredituar të arsimit të lartë, djemtë e vajzat më të mirë e më të talentuar për të shërbyer në FA!
E kam thënë shumë herë dhe e përsëris edhe këtu: armatimet, infrastruktura, pajisjet, sistemet, të gjitha kanë rëndësi. Por të gjitha këto janë pesë me hiç nëqoftëse ne nuk investojmë tek njerëzit tanë!
Unë jam e bindur që disa vjet nga sot, kur nga kjo Akademi të kenë dalë disa breza oficerësh e drejtuesish, ne do të hedhim vështrimin pas dhe do ta identifikojmë këtë moment, si një nga momentet kyçe të ringritjes së FA dhe jam e bindur po ashtu, që ata të rinj e të reja, që fillojnë sot arsimimin në Akademinë e FA do të jenë nesër ata që do të marrin stafetën e modernizimit e profesionalizimit të FA duke e bërë këtë proces të konsoliduar e të pakthyeshëm.
Akademia na krijon sot një mori mundësish që deri dje as nuk i mendonim dot, jo vetëm për përgatitjen e kuadrove drejtuese, por edhe për afrimin drejt FA të të rinjve dhe të rejave më të talentuara. Sepse, është një gjë t'u kërkosh djemve e vajzave, që kanë mbaruar shkollën me nota të shkëlqyera të bëhen pjesë e një strukture problematike, me mundësi karriere të paqarta, dhe është tjetër gjë t'i ftosh ata të bashkohen me FA, kur rruga e tyre kalon nga studimet në një institucion të akredituar të arsimit të lartë, i vetmi në fushën e Sigurisë dhe Mbrojtjes, kur struktura ku i fton të kontribuojnë ngrihet mbi bazat e meritokracisë dhe kur diploma që ti u ofron u jep mundësi të jashtëzakonshme punësimi e karriere jo vetëm në FA e Shqipëri, por kudo në strukturat e NATO!
Unë jam vërtet krenare që sot Akademia më në fund rikthehet prapë duke plotësuar një boshllëk, që e kemi ndjerë jo pak e që ka krijuar jo pak kosto për FA. Por sfida e vërtetë, në fakt, fillon vetëm tani, sepse sado e vështirë ishte rihapja e Akademisë, menaxhimi i saj profesional dhe kthimi i saj në një histori suksesi, ka për të qenë një sfidë jo e lehtë. Ama i kemi të gjithë mundësitë. Kemi kuadrot dhe profesionistët, që dinë ta bëjnë më së miri atë që pritet nga Akademia, por kemi edhe mundësi shumë të mëdha për të përfituar mbështetjen e aleatëve, për të zgjeruar programet e saj e për ta ngritur atë në nivelin e një akademie të një vendi të NATO.
Mezi e kishim pritur këtë ditë, kur kjo Akademi do të hapte dyert e saj. Por t'ju them të drejtën, kurrë nuk e kisha imagjinuar që hapja e dyerve të kësaj shkolle me një histori kaq të pasur, do të ndodhte në kushte të tilla, mes një pandemie që s'na lejon më as të futemi fizikisht në ambientet e kësaj ndërtese. Për këtë më vjen vërtet keq, por jam e bindur që edhe pse do të na i bëjë punën pak më të vështirë, sigurisht që shkolla do të vazhdojë ashtu si në çdo universitet tjetër, duke u përshtatur me situatën ku ndodhemi.
Nëse kam mësuar një gjë nga drejtuesit e FA, është që një ushtarak i mirë duhet të jetë fleksibël dhe të dijë gjithmonë të përshtatet me çdo surprize e të papritur që mund t'i dalë përpara. Prandaj, le ta shohim edhe këtë fillim kaq të pazakontë të vitit shkollor si një sprovë më tepër për të gjithë ne.
Ju uroj shumë suksese!
