Intervistë e ministres së Mbrojtjes znj. Olta Xhaçka në Report TV

e enjte, 03 Maj 2018 14:04

Doja ta nisja me propozimet që ju i keni bërë sekretarit Mattis, cila kanë qenë këto propozime?

Në fakt doja ta nisja me një parathënie për të thënë se Shqipëria, si një vend anëtar i NATO, është një aleat shumë i besueshëm për Aleancën, por edhe për partnerin e saj strategjik SHBA, është një partner i besueshëm edhe për shkak të gatishmërisë së saj edhe rritjes së operacionalitetit të Forcës së Armatosur, por edhe të gjithë angazhimeve në operacione dhe misione të Aleancës apo edhe të BE; është një aleat i besueshëm sepse luan një rol të rëndësishëm stabiliteti, luan rol të rëndësishëm në stabilitetin në rajon, promotor i politikës së dyerve të hapura të NATO edhe asistencës ndaj të gjitha vendeve, të cilat në Ballkanin Perëndimor aspirojnë që të bëhen pjesë e Familjes Euroatlantike dhe për ne ky destinacion është shumë i rëndësishëm dhe kemi qenë promotor vërtetë të fuqishëm të kësaj politike dhe të kësaj filozofie. Për këtë arsye duke qenë se Shqipëria në vitet e fundit ka treguar përmes angazhimit të saj operacional, përmes operacioneve dhe misioneve, përmes të qenurit në krahun e duhur, të qenurit pjesë e Aleancës, por edhe përmes angazhimeve të saj për modernizmin e ushtrisë, për rritjen e buxhetit të Mbrojtjes deri në masën 2% deri në vitin 2024, ashtu si kanë qenë në fakt edhe angazhimet e kryeministrit, por edhe të vendeve të tjera në samitin e Uellsit por edhe një kërkesë e vazhdueshme edhe e partnerëve

Aktualisht sa është ky buxhet?
Aktualisht buxheti është 1,2% dhe kemi pasur një trend rritës i cili do të vazhdojë të jetë i tillë deri në vitin 2024. Për të gjitha këto arsye Shqipëria është sot, do të thosha Aleati më i besueshëm në rajon. Dhe duke qenë që NATO nuk ka zhvilluar kapacitete të saja në Ballkanin Perëndimor, pra në rajonin tonë, duke qenë që situata e sigurisë në Ballkanin Perëndimor ka ndryshuar dhe në këndvështrimin tim nevojitet një vëmendje më e madhe e NATO apo e SHBA, propozimi im ka qenë se qoftë në formatin bilateral në SHBA qoftë në formatin NATO, nëse do të kishte zhvillim të kapaciteteve të tyre në rajon, Shqipëria do të ishte natyrshëm një vend kontakti, një aleat i denjë për të pasur një footprint, apo një, unë e kam dëgjuar në media shpesh, një bazë ushtarake. Jo domosdoshmërish një bazë ushtarake, mund të jetë një bazë ushtarake, mund të jetë një qendër stërvitore, por do të ishte gjithsesi një gjurmë e Aleancës apo e SHBA partnerit tonë strategjik, në Shqipëri, e cila do të ishte përfaqësuese për të gjithë rajonin.

Po a kemi infrastrukturën e duhur, i referohem bazave tokësore, ujore. Mesa di unë pjesa ajrore kontrollohet edhe sot e kësaj dite nga vende të NATO, si Italia?
Shiko mundësi ka shumë. Ne ju kemi vënë në dispozicion kapacitetet tona tokësore, ajrore edhe detare. Mundësi ka për të zhvilluar kapacitete në furnizimin me karburant, mundësi ka për të zhvilluar bazat tona detare, mundësi ka për të zhvilluar qendrat tona stërvitore në funksion të stërvitjeve të Aleancës, apo të SHBA, mundësit janë të shumta. Ajo që kam bërë ishte një propozim për të konsideruar këto mundësi.

Cila ishte përgjigjja e sekretarit të Mbrojtjes?
Ai tregoi vërtet mbështetjen e tij për një vend si Shqipëria, do të thosha e edhe mirënjohjen e tij për një vend si Shqipëria, që pavarësisht përmasave gjeografike apo mundësive apo pamundësive të saj ka qenë kontribues vërtet shumë i madh për Aleancën. Vlen të thuhet që angazhimet tona operacionale, misioneve në operacione krahasuar me popullsinë tonë apo me numrin e FA, mbeten ndër më të lartat në Aleancë. Sigurisht ky ka qenë një nga ato element që edhe sekretari Mattis, por edhe drejtues të tjerë të Aleancës e kanë evidentuar në mënyrë të vazhdueshme dhe e kanë përgëzuar gjithmonë me shumë mirënjohje.

A ka plan të afërt SHBA, ose NATO për të vendosur një bazë në Shqipëri ?
Jo, nuk ka asnjë plan të afërt, as të SHBA as të NATO për të vendosur një bazë në Shqipëri. Ishte vetëm një temë e diskutimit që kemi zhvilluar, ishte një propozim i bërë nga ana ime, qoftë për të treguar rëndësinë e zgjerimit të bashkëpunimit tonë strategjik, të partneritetit tonë strategjik, por edhe për të vënë në dispozicion të Aleancës por edhe të SHBA, kapacitet tona, tokësore, detare dhe ajrore. Kjo nuk do të thotë që ka një plan të afërt, absolutisht jo, por një bazë e NATO apo e SHBA do të ishte absolutisht shumë e favorshme për Shqipërinë. Jo vetëm do të çimentonte këtë partneriteti strategjik me SHBA dhe Aleancën, por dot tregonte që Shqipëria është një aleat i besueshëm dhe pikë kontakti për Aleancën në rajonin e Ballkanit Perëndimor dhe njëkohësisht do të sillte investim në atë zonë ku do të bëhej.

Pra do të kishim edhe përfitime ekonomike do të thoni ju...
Pa diskutim, në atë vend ku do të zhvillohej ai projekt.

Në fakt dua t’ju pyes sepse janë bërë pak të shpeshta vizitat e ministrave tanë të Mbrojtjes, para jush ka qenë zonja Kodheli në SHBA. Cili ishte qëllimi i kësaj vizite, pati ndonjë shqetësim nga Pentagoni në raport edhe me sigurinë në rajon, apo ishte një vizitë normale bilaterale?
Nuk është një vizitë normale bilaterale, të tilla vizita nuk janë të shpeshta për Pentagonin...

Prandaj ju pyeta se brenda dy vitesh kanë qenë dy ministra të Mbrojtjes.
Gjatë kësaj vizite është zhvilluar edhe një negociatë bilaterale për të eksploruar të gjitha mundësitë për zgjerimin e bashkëpunimit tonë dhe për suportin që SHBA-të i kanë dhënë vazhdimisht FA, për trajnimin, edukimin dhe modernizimin. Zhvillimi i këtyre negociatave, zhvillimi i këtyre bisedimeve është në kuadër të kësaj mbështetjeje që Amerika na i ka dhënë vazhdimisht dhe vazhdon të na e japë në mënyrë të qëndrueshme dhe gjithmonë në rritje.

Kur flasim për bashkëpunim padyshim që pyetja lind natyrshëm, a ka plane qeveria shqiptare të blejë armatim nga SHBA?
Nuk është çështje planesh. Modernizimi i FA-ve është një sfidë e përditshme. SHBA sapo na kanë dhuruar shumë mjete të blinduara të cilat janë realisht një ndihmë e jashtëzakonshme për mbërritjen e objektivave të kapacitetit, angazhimeve që ne u kemi deklaruar edhe Aleancës, për të bërë FA dhe më saktë gjithë komponentin e këmbësorisë shumë më të ndërveprueshëm me forcat e Aleancës dhe sigurisht shumë më të mirëpajisur edhe më të modernizuar për t’u përballur me sfidat në misione dhe operacione të Aleancës. Kjo ka qenë një ndihmë e jashtëzakonshme. SHBA na kanë dhënë një ndihmë të vazhdueshme në trajnimin dhe edukimin e efektivëve tanë, pasi i gjithë modernizimi apo të gjitha këto mundësi do të ishin të kota nëse ne nuk do të investonim te kapitali njerëzor.

Kemi një shifër sot, sa është numri i këtyre mjeteve (ne i kemi parë edhe në rrugë), kemi një numër të saktë sa do të jetë numri i mjeteve ushtarake që do t’i jepen Shqipërisë dhuratë?
Do të jenë shumë, por sigurisht do të dislokohen në disa momente, por janë disa qindra.

Përsa i përket armatimeve të tjera, parashikohen edhe përsa i përket Forcës Detare dhe Ajrore?
Modernizimi është një proces i vazhdueshëm, është sfidë, sepse është një procesi i lidhur ngushtësisht edhe me buxhetin në dispozicion të Mbrojtjes dhe sigurisht për një vend që nevojat i ka emergjente i ka emergjente për infrastrukturë, për shkolla, për spitale, për rrugë, për shërbime shumë më cilësore, për ndihme ekonomike, për aftësi të kufizuar, etj., është e vështirë që të bësh, le të themi një argument shumë të fortë, për të rritur buxhetin e Mbrojtjes, në kushtet kur nuk ka një armik pas dere apo një rrezik eminent që i paraqitet vendit. Megjithatë, pavarësisht se nuk ka një të tillë, Aleanca, si e tërë, sot përballet me shumë sfida që janë ndryshe nga ato që ishin dje, që janë asimetrike, që janë hibride dhe që janë të një natyre që pa diskutim duan adresuar bashkërisht në një mënyrë kolektive ashtu si po bëjmë. Në këto kushte modernizimi i ushtrisë është sfidë, por njëkohësisht edhe domosdoshmëri. Po tentojmë që të gjejmë një ekuilibër shumë të mirë edhe me angazhimin e kryeministrit edhe me angazhimin e ministrit të Financave por fatmirësisht edhe për shkak të mirëmenaxhimit të financave publike kemi arritur që të paktën këto dy vitet e fundit, buxheti për Mbrojtjen të ketë parë rritjen e parashikuar, për të mbërritur në ato parametra që deri në 2024 përqindja e Prodhimit të Brendshëm Bruto për buxhetin e Mbrojtjes të jetë 2%. Sigurisht 2% do të zgjidhë shumë nga problematikat që kemi. Megjithatë, siç ua thashë, modernizimi është një sfidë e përditshme. Sot jeni kushtet ku mund të themi se jeni në kushtet ku kemi zëvendësuar, ose jemi duke zëvendësuar të gjithë armatimin e vjetër kinez apo rus dhe po pajisemi me armatimin më modern me standardet të NATO. Jemi duke pajisur FA me mjete të blinduara të standardit tonë më të mirë, Policinë Ushtarake me mjete të blinduara të standardit më të mirë, automatikë, murtaja, pajimet e ushtarëve, të cila janë shumë të domosdoshme për të qenë të ndërveprueshëm bashkë me aleatë tanë në një teatër lufte apo në një operacion të përbashkët janë pa diskutim arritje të përditshëm të FA tona, por edhe sfida për të ardhmen.

Megjithatë, jemi ne, në kushte për të blerë edhe avion luftarakë apo është shpejt për të folur për këtë?
Jo, është shpejt për të folur për këtë. Ne keni një Forcë Ajrore, që është e orientuar drejt helikopterëve dhe nevojat tona janë të tilla.

Pse, nuk është pjesë e strategjive, ashtu si kemi pasur kur ishim një vend i izoluar kishim, një flotë ajrore, sot është e panevojshme kjo, duke parë që të gjitha vendet fqinje janë të armatosura në këtë drejtim?
Ka një logjikë edhe zhvillimi edhe modernizimi im FA. Do të ishte shumë mirë të kishim më shumë anije, më shumë avionë, të kishim më shumë automatikë të një kalibri të caktuar.

Por një flotë modeste nuk do ishim keq ta kishim...
Mundësitë modeste që kemi na detyrojnë të shtrimë këmbët aq sa kemi jorganin. Edhe ka edhe një logjikë për mënyrën se si profilizohet një ushtri e një vendi si i joni që është vend anëtar i NATO. Në bashkëpunim me aleatet tanë kemi deklaruar disa që quhen objektiva kapaciteti, kush janë objektivat tanë afatshkurtër, afatmesëm edhe afatgjatë për të modernizuar FA tonë dhe për ta bërë atë të ndërveprueshme dhe ky është një proces që hap pas hapi rakordohet me partnerët tanë. Ata, bashkë me ne, identifikojmë se kush janë nevojat tona më imediate dhe pastaj investojmë bashkërisht për të mbërritur këto objektiva në funksion të qëllimeve të përbashkëta të Mbrojtjes Kolektive

Zonja Ministre për t’ju kthyer edhe njëherë vizitës edhe takimit me Mattis, a ka shqetësim amerikan në raport me çfarë po ndodh në rajon, për ndikim rus apo të aktorëve të tjerë dhe a u shfaq ky shqetësim në takimin që ju kishit?
Pa diskutim që ka shqetësim amerikan dhe shqetësim të Aleancës. Sot aleanca, ua thashë, përballet me një ambient sigurie krejt ndryshe nga ai ç’ka qenë dje, influenca, është zhargon i zakonshëm i Aleancës, influenca që vjen nga Lindja, apo nga Jugu. Vura re që në media retorika ime ose e Aleancës, kërcënimet që vijnë nga jugu, u keqinterpretuan. Dikush shkruante e ka fjalën për Greqinë. Nuk bëhet fjalë për Greqinë. Bëhet fjalë për Rusinë, që është Lindja e Aleancës dhe bëhet fjalë për Lindjen e Mesme dhe Afrikën e Veriut që është Jugu i Aleancës. Dhe të dyja këto pole, le të themi, janë shumë të rëndësishme për çfarë po ndodh sot dhe vëmendja kryesore është tek ato. Sigurisht unë bëra një argument, të cilin, nuk jam e vetme në këtë logjikë, që edhe Ballkani Perëndimor sot ka nevojë për një vëmendje më të madhe të Aleancës për shkak të kërcënimeve asimetrike dhe hibride që vijnë qoftë nga Lindja pra po themi nga Rusia, qoftë përmes një influence më të madhe të saj; qoftë nga Jugu që janë terrorizmi, imigracioni i paligjshëm, që mund të prekë edhe çështjet tona.

Në këtë kontekst ishte edhe propozimi juaj për një bazë të NATO, apo ishte thjesht një dëshirë? Në fakt çdo ministër i Mbrojtjes e ka patur këtë dëshirë. Ishte thjesht dëshirë apo ju dhe qeveria ka parasysh një risk dhe kërkon një lloj proteksioni qoftë edhe nëpërmjet një baze?

Nuk ka absolutisht asnjë lloj risku dhe proteksioni nuk vjen përmes bazës. Ne jemi shumë të mbrojtur sepse jemi një vend aleat i NATO dhe në qoftë se ke cenuar një vend aleat të NATO, ke cenuar gjithë Aleancën. Këtu nuk diskutohet për kërcënim nominal, këtu diskutohet për një situatë sigurie dhe për një rajon i cili destinacionin, në mënyrë absolute, duhet dhe do ta ketë tek Familja Euroatlantike. Nëse aktorë të tjerë e pengojnë këtë destinacion të disa vendeve, ne si faktor stabiliteti, bashkë me partnerët tanë strategjikë, synojmë që këtë proces ta nxisim dhe ta përshpejtojmë drejt këtij destinacioni të natyrshëm.

Ju pak ditë më parë, mos gaboj, keni patur edhe një ceremoni në raport me rekrutimin e disa, le të themi, individëve që t’i bashkohen FA. Zonja Xhaçka, a ka dëshirë për të qenë pjesë e ushtrisë? Dikur ka patur një lloj shkëputje, një lloj mungese vullnetarizmi në raport me këtë, po e quaj profesion, po është degë shumë e rëndësishme e vendit. Si ka ndryshuar kjo? Çfarë kushtesh ofron ushtria për një të ri që dëshiron ose e ka ambicie për të qenë pjesë e ushtrisë?

Unë të falënderoj shumë që ma bën këtë pyetje sepse besoj që është një pyetje jashtëzakonisht e rëndësishme edhe është një shqetësim shumë i posaçëm që kam. Dhe do të tregohem shumë e sinqertë për të thënë që edhe ka, edhe nuk ka interes. Sot, trajtimi i ushtarakëve tanë, nuk është ai që duhet të ishte, nuk është ai që ne do donim që të ishte për ta. Megjithatë, një karrierë në ushtri dhe një profesion si ushtarak, pavarësisht se paraqitet me shumë sakrifica dhe kufizime, është një ndër profesionet më të nderuar, që do të veshë me krenari këdo që e ushtron, por edhe fëmijët e tij, duke qenë se i shërben me devotshmëri dhe më me patriotizëm se kushdo tjetër atdheut të vet. Është një profesion, i cili të ofron shumë mundësi. Ndoshta është e vështirë për një të ri, i cili nuk e njeh ushtrinë sepse përgjithësisht është një nga ato institucione puna e të cilit nuk duket, pra nuk është fort vizibël, edhe ndoshta është e vështirë edhe të tregosh realisht se si është puna e një ushtaraku dhe kush janë kushtet e tij për të përparuar në karrierë. Por, po të shohim edhe vende të tjera, vende aleate, se si përparon një ushtarak në karrierë, për të qenë edhe në rangjet më të larta dhe çfarë përfitimesh ka nga sistemi arsimor apo nga trajnimet e jashtëzakonshme që nuk merren vetëm në vendin tonë, por në vendet tona aleate. Mundësi për shkollim, bursave dhe masterave në qendrat më të rëndësishme ushtarake në botë, në shkollat më prestigjioze ushtarake në botë, me mundësi të jashtëzakonshme për të përparuar jo vetëm si njeri, si intelekt, por edhe si një profesionist vërtet shumë i mirë, janë të panumërta për dikë që ka vullnetin edhe dëshirën për të përparuar në karrierën e vet si ushtarak.

Atëherë çfarë e pengon një të ri, i cili është dhe pa punë, rri kafeneve e vërtitet, çfarë e pengon t’i bashkohet ushtrisë?
Ndoshta një njohje më e mirë e saj dhe për këtë, kemi edhe ne shumë për të bërë, për të promovuar ushtrinë ashtu siç duhet edhe për të promovuar tek këta të rinj mundësitë e jashtëzakonshme që ushtria dhe FA ofron. Njëkohësisht kemi shumë për të bërë për t’u ofruar ushtarakëve tanë një trajtim më të mirë, që do të thotë edhe një pagë më të mirë dhe jam shumë e kënaqur që, kryeministri vetë, u premtoi të gjithë efektivëve të FA që ky do të ishte viti i fundit, që do të kishte një diferencë aq të madhe të pagës mes ushtarakëve dhe forcave të policisë. Dhe ky pa diskutim është një angazhim shumë i rëndësishëm për të treguar respekt ndaj një profesioni të vështirë, por ndaj disa njerëzve që e bëjnë punën e tyre me shumë ndershmëri, me shumë devocion dhe me shumë krenari për të gjithë ne. I keni parë, kam përshtypjen, vërtet është një profesion që nuk duket, por përmes ndihmës që i kanë dhënë komunitetit gjatë kësaj periudhe shumë më e dukshme dhe shumë më e posaçme, me kontributin e jashtëzakonshëm dhe përkushtimin e jashtëzakonshëm gjatë emergjencave civile por edhe në kohë, le të themi më pak të vrullshme, me ndihmesën e tyre në komunitete të ndryshme, qoftë me ndërtimin e urave, qoftë me zgjerimin e rrugëve në fshatrat më të izoluar, qoftë me ofrimin e ndihmës për shërbime shëndetësore përmes mjekëve tanë ushtarakë ju kemi ndenjur shumë më pranë njerëzve dhe besoj që ka filluar të jetë pak më e dukshme puna e jashtëzakonshme, përkushtimi, sakrifica në dobi të të mirës së përbashkët, në dobi të siguri të jetës, në dobi të atdheut. Dhe në këtë kuptim besoj që ka sot një detyrim edhe të shoqërisë por edhe të qeverisë për këta njerëz.

Për këta ushtarakë dhe punonjës që shërbejnë në FA që na ndjekin në këto moment zonja Ministre, pse kjo diferencë vlerësimi në raport me Policinë? Dhe ju thatë që ka një angazhim qeveritar, do të fillojë të ndjehet ky këtë vit, në raport edhe me pagat e tyre?
Do të fillojë të ndihet në vitin tjetër. Të paktën ky është parashikimi që kemi për momentin. Nuk di t’ju them arsyet pse, por di t’ju them se ka shumë vite që….

Kjo nuk i përket vetëm kësaj qeverie, ka 20 e ca vite që Ushtria qëndron në harresë. A ka ndryshim në konceptin e vlerës së Ushtrisë?
Po. E keni dëgjuar edhe nga goja e kryeministrit. E dëgjoni në mënyrë të tërthortë edhe nga ministri i Financave, i cili dedikon buxhet të posaçëm Mbrojtjes edhe në sajë të angazhimit për të pasur një rritje të buxhetit përkundrejt premtimit dhe angazhimit që kemi tek aleatët tanë. E dëgjoni nga ministri i Mbrojtjes në mënyrë të vazhdueshme edhe besoj që është një nevojë e dukshme që shumë shpejt gjithë bashkarish do t’i përgjigjemi.

Sa është numri i Forcave tona të Armatosura sot?
Është plus 8 mijë.

8 mijë efektivë. Po Forca Komando? Ato që cilësohen si forcat elitë, sa është numri i tyre aktualisht zonja Xhaçka dhe çfarë komunikimi keni me ta?
Po çfarë lidhje ka kjo?

Jo, në sensin çfarë komunikimi ka, sepse ka një shqetësim sidomos nga ata që mbarojnë misionet, mbeten edhe pa punë...
Kjo nuk është e vërtetë.

Nuk është e vërtetë që ata kur kthehen nga misionet e tyre nuk kanë punë?
Jo. Ka një ligj që orienton FA. Për ata që nuk përparojnë dot në gradë, mbas x vitesh kontribut, duhet të dalin nga skema. Në qoftë se dikush është i Forcave Komando dhe nuk përparon dot në gradë se nuk ka kapur parametrat, unë e shoh të vështirë.

Pavarësisht se ka shërbyer në Irak e Afganistan për shembull?
Pavarësisht. Ka dashur të dalë ose nuk ia ka dalë të përparojë një gradë më tutje. Por FA është përparim në karrierë edhe rregullohet nga një ligj i posaçëm, i cili nuk të lejon ta shkelësh kur dikush nuk përparon. Ose kap moshën ose nuk kap gradën.

Një lajm i pak ditëve më parë kishte të bënte edhe me kolonel Demiraj, Dritan Demirajn, i cili ka shërbyer, për ata që e njohin, edhe si ministër i Brendshëm për një periudhë të shkurtër, ministër teknik i PD. A është rikthyer me një firmë tuajën në FA? Çfarë ka ndodhur realisht? Ju keni reflektuar Vendimin e Gjykatës, apo ka pasur një, le të themi, një hapje e dyerve që ju i keni bërë rikthimit të tij në forcat e ushtrisë?
Atëherë, ka një rregull shumë të fortë në FA, që është zbatimi i ligjit. Ka një Vendim Gjykate të formës së prerë

Ka shumë vendime gjykate që nuk zbatohen me rikthim në detyrë.

Jo jo zbatohen. Në FA je i detyruar që t’i zbatosh.

Nuk ka përjashtime.
Absolutisht jo. Nuk njoh unë një sot, që të ketë vendim gjykate dhe, të mos jetë kthyer.

Në Ministri të tjera ka. Ushtria mbase ka një rregull tjetër.
Nuk besoj ta keni dëgjuar ndonjëherë këtë konfliktin politik në FA. Rregulli është shumë i qartë. Në zbatojmë ligjin në mënyrë rigoroze. Përsa kohë ka një vendim gjykate të formës së prerë, kolonel Demiraj duhet të kthehet në FA. Dhe në momentin që dikush është pjesëtar i Forcave tona të Armatosura edhe bën betimin për t’i shërbyer atdheut, është zhveshur nga uniforma e politikës dhe ka veshur ngjyrat e flamurit. Kështu që në këtë pikë, nuk ka absolutisht asnjë ekuivok, Ushtria është e përbërë nga njerëz, bindjet e të cilëve unë nuk i njoh edhe nuk dua t’i njoh. Jemi atje për një mision shumë më të lartë.

Zoti Demiraj e ka një problem qoftë edhe moral, sepse ka qenë përfaqësuesi i një partie politike në qeveri. Nuk përbën problem për FA ky fakt?

Nuk përbën asnjë problem për sa kohë që nuk ka qenë efektiv aktiv i FA. Në momentin që është efektiv i FA, ligji nuk ia njeh më të drejtën për të qenë qoftë i përfshirë politikisht, qoftë për të pasur një opinion të shprehur politik. Kështu që në këtë pikë jua thash, ushtarakët tanë janë të zhveshur nga ngjyrat politike edhe janë shërbëtorë të atdheut.

Çfarë bën apo jeni akoma në procedura?
Jemi në procedura.

Ai ju ka bërë një falënderim publik në fakt. Nuk e di nëse keni komunikuar me të.
Jo, nuk ka komunikuar me të.

Po çfarë mund të bëjë ai për shembull, nuk e di, do rikthehet sërish në misione ndërkombëtare apo mbetet për tu diskutuar pozicionin i tij në ushtri? Apo është pjesë e shefit të Shtabit të Përgjithshëm.

Pozicioni i tij në ushtri, është pjesë e Shtabit të Përgjithshëm, është edhe pjesë e ministrit. Por sigurisht që propozimi vjen nga Shtabi i Përgjithshëm, miratimi vjen nga ministri në rastin e kolonelëve. Dhe do të bëjë një detyrë që është e përshtatshme për gradën e tij.

E qartë. Mirë, do doja t’ju pyesja pak edhe për një shqetësim qoftë edhe publik, qoftë edhe qytetar. Ka edhe disa njerëz, qytetarë që nuk janë dakord me përfshirjen e Ushtrisë në pastrimin e territorit, apo atë, le ta themi më shqip, heqjen e mbeturinave, plehrave në pjesë të ndryshme të Shqipërisë. Pse edhe ju si ish – ministrja Kodheli e keni vazhduar këtë traditë për ta përdorur Ushtrinë në këto lloj operacionesh? Është pak ulje e dinjitetit të tyre apo si e gjykoni ju?

Në fakt terminologjia është e gabuar. Nuk është përdorje e ushtrisë. Kemi të bëjmë, mund edhe ta quash një emergjencë civile, mund edhe ta quash një emergjencë kombëtare faktin që Shqipëria sot është e zhytur në plehra. Dhe ky nuk është një aksion i ushtrisë, është një aksion vullnetar i të gjithëve: edhe i efektivëve tanë, edhe i mësuesve tanë, edhe i nxënësve tanë, edhe i Administratës, edhe i punonjësve të Bashkisë, edhe i intelektualëve, edhe i qytetarëve të atyre komuniteteve. Është një aksion vullnetar i të gjithëve. Dhe në këto kushte, pa diskutim që edhe ne do t’i përgjigjemi me shumë pozitivitet dhe me kapacitetet tona një emergjence civile, kombëtare, e cila pa diskutim është shumë e rëndësishme për t’u adresuar në të mirë të përgjithshme të gjithë secilit prej nesh.

Megjithatë ne kemi edhe aprovimin e FA, e kolonelëve, e gjeneralëve? Se ju jeni pjesa politike. Ju ndoshta mund ta kërkoni këtë, po në fund të fundit duhet të vendosë pjesa ushtarake për këtë. Keni një aprovim, apo keni një mirëkuptim për këtë?

Po ju si mendoni se lëvizin efektivët tanë ushtarakë në qoftë se komanda e tyre e menaxhimit…

Mund t’ju jap një informacion zonja Xhaçka, që ka patur fërkime, përplasje, mes ish – ministres dhe pjesës ushtarake. Ndoshta me ju ka ndryshuar kjo, por, mes tyre ka patur.

Për hir të së vërtetës nuk e kam as këtë informacion që po citoni ju, por të jeni të bindur që të paktën në ushtri, historia e disiplinës, e komandës dhe e hierarkisë, funksionon në mënyrën më të mirë të mundshme. Edhe nuk ka lëvizje të ministrit, që anashkalon hierarkinë: gjeneralët, kolonelët, komandantët apo këdo, i cili është në atë piramidë, sikundër, nuk ka veprime të tjera, të cilat anashkalojnë ministrin.

Më vjen mirë dhe ju e dini, e kaluara ka treguar që është anashkaluar pjesa e gjeneralëve. Për shembull rasti i Gërdecit është një rast i pastër ku ajo pjesë ishte e anashkaluar. S’dua të bëj ndonjë analogji, por komunikimi po thoni është i ndërsjellët mes jush dhe pjesës ushtarake.

Shiko nuk kemi të bëjmë për gjëra të kësaj natyre, ndaj them që analogjia nuk qëndron. Në mandatin tim, bashkë me shefin e ri të Shtabit kemi pasur një fokus shumë të veçantë tek trajtimi i mirë dhe tek meritokracia, që do të thotë: trajnim, edukim edhe përparim në karrierë sipas meritës. Në këto kushte, me këtë moto, më këtë filozofi, nuk ka vend për të anashkaluar askënd, por ka shumë vend për të krijuar sinergji në marrjen e vendimeve të përbashkëta, sigurisht duke respektuar hierarkinë, duke respektuar disiplinën ushtarake, duke respektuar misionin e FA dhe gjithë sa mund të bëjmë për t’i ardhur në ndihmë komunitetit që në fakt është një shtojcë e misionit tonë për t’i shtuar sigurisë dhe mbrojtjes së përbashkët.

Znj. Ministre nëse mund t’iu pyes pak për infrastrukturën e Forcave tona të Armatosura. Si është cilësia e bazave tona ushtarake? Janë të mirëmbajtura, i kemi në gjendje të mirë pune apo ka probleme?

Mos harroni, jemi një vend anëtar i NATO dhe kemi standarde shumë specifike për të mbërritur edhe për të pasur. Jemi një forcë operacionale, e cila modernizimin dhe përparimin e saj në shumë dimensione e ka një sfidë të përditshme, por kjo nuk do të thotë që nuk jemi sot të aftë për të qenë realisht një partner i denjë dhe jemi në partner i denjë, i cili ka treguar që me një forcë, e cila është e mirëtrajnuar, e mirëedukuar, e mirëpajisur ka qenë e ndërveprueshme krah aleatëve tanë në shumë operacione dhe misione. Sot jemi në Kosovë, vjet dyfishuam kontributin tonë në KFOR. Sot jemi në Afganistan. Sërish ka pasur një kërkesë të aleatëve dhe po dyfishojmë kontributin tonë në Afganistan. Sot jemi në Letoni ku përfaqësohemi me një kontingjent shumë dinjitoz. Sot jemi në detin Egje me një anije patrulluese, e cila është atje për vitin e saj të dytë duke sjellë një precedent shumë pozitiv edhe për Forcën Detare, e cila nuk ka qenë më parë e përfshirë në të tilla operacione jashtë vendit; sot jemi në Mali jemi në Bosnje-Hercegovinë...

Në çfarë operacionesh marrin pjesë, meqë përmendët Egjeun?

Është një anije patrulluese, e cila ka shpëtuar më shumë se 1000 emigrantë, të cilët vijnë nga Lindja e Mesme ose nga Afrika, me gomone për të kapur brigjet e Turqisë apo të Greqisë. Forcat tona kanë shpëtuar sot jetën e mbi 1000, ndoshta për të qenë më preciz 1200 nënave, fëmijëve, kryesisht emigrantë që vijnë nga vendet e Afrikës. Nëna, fëmijë, burra, djem, vajza, të cilët lufta, pamundësia dhe kushtet jashtëzakonisht të vështira i detyrojnë që të marrin një rrugë jashtëzakonisht të vështirë. Forcat tona, anija jonë patrulluese ka pasur një kontribut të jashtëzakonshëm, të përgëzuar nga të gjithë aleatët tanë.

Një pyetje të fundit përsa i përket raportit me ushtrinë, meqenëse folëm për gjeneralët. Po marrëdhëniet me komandantin e Përgjithshëm të FA që është edhe presidenti, si i keni? A keni komunikim me të?

Patjetër, kam pasur komunikim me të. Ka qenë një komunikim shumë korrekt për detyrat tona të ndërveprueshme.

Keni komunikim periodik apo vetëm kur ka shqetësime nga Presidenca, ose nga ju?

Kemi komunikim periodik. Komunikim përmes Komisionit të Sigurisë, që do të zhvillohet tani shpejt, kemi komunikim për gradimet të gradave “gjeneral”. Kemi komunikim të vazhdueshëm për çështje të ushtrisë për të cilat presidenti duhet të jetë gjithmonë i njohur.

Pyes, sepse më parë ka pasur probleme midis dy institucioneve, besoj ju e dini?

Ka pasur një komunikim institucional shumë korrekt.

***
Për të folur në këtë pjesë të dytë edhe pak politikisht me ministren Olta Xhaçka, e cila është edhe anëtare Kryesisë së Partisë Socialist. Përpara se të vijojmë me këtë pyetje, do të ndjekim një material se çfarë ka ndodhur. Zonja Ministre duket se këto asamble po kthehen në pak të frikshme politikisht, në sensin që edhe juve, apo e prisnit këtë fjalim të ashpër të kryeministrit?

Shiko kjo ka qenë filozofia e kryeministrit që nga dita e parë që unë kam punuar në Kabinetin e tij.

Edhe në Asamblenë e Shtatorit shumë nuk e dinin që do ishin edhe kandidatë për ministra, apo jo?

Kjo nuk ka lidhje fare. E rëndësishme është që kjo filozofi e ka shoqëruar kryeministrin që nga dita e parë. Unë nuk di të ma ketë bërë këtë detyrë fushë me lule, përkundrazi, më ka thënë që do të jem personalisht në një sfidë të përditshme, për të shpërblyer besimin që më ka dhënë jo ai, por besimin që na kanë dhënë votuesit, në Zgjedhjet e shkuara Parlamentare për të qenë këtu dhe, për të bërë atë, që ata presin nga ne. Sigurisht, kjo nuk është e lehtë për një vend që ka shumë pamundësi, nuk është e lehtë për një buxhet që është shumë më pak nga çdo donim të ishte për të adresuar për ato sfida që janë emergjente në shoqërinë tonë e, megjithatë, ky nuk është justifikim që ne të mos bëjmë maksimumin tonë si të zgjedhur, si të besuar në këto detyra për të përmbushur pritshmëritë që votuesit kanë nga ne. Në këtë filozofi mua nuk më bën habi kjo retorikë e kryeministrit, e keni dëgjuar edhe në të shkuarën, por sot, duket sikur po thotë një gjë të re në fakt por esencialisht e ka thënë vazhdimisht këtë gjë edhe e ka bërë edhe përpara zgjedhjeve, edhe përpara mandatit të dytë.

Dakord, por Qeveria nuk ka as 6 muaj zonja ministre...

Ka pasur dhe një mandat të parë, ky është mandati i dytë. Edhe para mandatit të dytë kemi parë disa fushata llogaridhënie të të gjithë të zgjedhurve deri dhe tek Kabineti. Unë nuk e di nëse ka arsye për t’u riparë Kabineti në shtator, ndoshta rishikohet, ndoshta nuk rishikohet. Por di që kemi një kontratë, gjithsecili prej nesh me kryeministrin, me disa objektiva shumë ambiciozë për të mbërritur; e kemi firmosur atë kontratë dhe kemi marrë përsipër që do të bëjmë atë që kemi thënë se do të bëjmë. Besoj se është mjaftueshëm arsye për të vlerësuar se si kemi bërë punën në krye të një viti, se sa kemi përmbushur nga ato objektiva që kemi marrë përsipër edhe nga ai plan - pune që kemi marrë përsipër për të kryer, sigurisht për të shpërblyer besimin e madh dhe për të bërë atë punë që shqiptarët presin.

Megjithatë ju a ndiheni pak në presion nga këto fjalë të kryeministrit, duket sikur deri në shtator do jeni disi në ankth? Se, gjithëçka është në dorën e një individi, të kryeministrit dhe kjo nuk është aq demokratike. N.q.s. ai mendon se ka nevojë për ndryshime do ju heqë, n.q.s. jo, atëherë, do qëndroni ministre ? A është normale kjo?

Pa diskutim! Ai ka përgjegjësinë, ai ka lidhur një kontratë me Kabinetin e vet, ne jemi të përzgjedhurit e tij për të çuar përpara vizionin e tij dhe të qeverisë së tij . Nëse jemi të paaftë për të çuar përpara vizionin e tij, pa diskutim që dikush tjetër më i aftë duhet të marrë përsipër këtë detyrë. Nga ana tjetër ju më pyesni se a ndjehem në presion?
Po ndihem në presion dhe ndjehem në presion çdo ditë, siç jam e bindur se dhe kolegët e mi ndihen, por jo kundrejt kryeministrit, sepse nuk diskutohet fati individual i ministrave, të Ramës, as fati individual i secilit prej nesh për të qenë o ministër o rashë e vdiqa, këtu diskutohet përgjegjësia e jashtëzakonshme mbi shpatullat e gjithsecilit prej nesh që për të çuar përpara një vizion, që çon përpara Shqipërinë; që na afron më shumë me aspiratat e shqiptarëve; që çon përpara ato interesa madhore të të gjithëve ne, përmes një politik bërjeje shumë më të përgjegjshme, shumë më të zotë, shumë më të aftë dhe shumë më afër interesave të qytetarëve. Ky është presioni që ndjej përditë. Nëse nuk mund të bëj dot këtë, fati im nuk ka ndonjë konsekuencë të jashtëzakonshme.

Më vjen mirë që e merr kaq lehtë pasi politika në fund të fundit kështu duhet të jetë…gjë normale… Po punën e kryeministrit kush e gjykon?

Punën e kryeministrit e gjykojnë votuesit, e gjykojnë çdo 4 vjet kur votojnë për vizionin e tij qeverisës për objektivat e tij programorë, për ku do ta çojë vendin, çfarë do t’u afrojë shqiptarëve, si do çojmë përpara aspiratat e mëdha si do ta integrojmë Shqipërinë sa më parë në familjen e madhe europiane, si do ta zhvillojmë këtë vend më shumë, si do ta zhvillojnë dhe do ta rrisim ekonominë më shpejt, si do hapim më shumë vende pune dhe, për të gjitha ato, që janë probleme të përditshme të shqiptarëve. Sigurisht, kryeministri është personi, i cili është nën skrutinitetin, nën lupën e të gjithëve. Ndërsa gjithsecili prej nesh, fati ynë a ministër, apo deputet është krejt pa konsekuencë në lëmin e madh të interesave dhe aspiratave të shqiptarëve dhe të asaj që presin prej nesh si qeveri. Dhe besoj se kjo është gjëja që duhet të na shqetësojë maksimalisht më tepër se sa fati i njërit apo tjetrit.

Pra ju nuk jeni e shqetësuar edhe nëse në shtator kryeministri vendos shkarkimin tuaj?

Unë besoj se jam në këtë detyrë, jam në këtë parti, mbështes këtë kryeministër për arsyet e duhura dhe arsyet e duhura nuk janë ambicia ime profesionale është dëshira për të qenë bashkë dhe për të bërë më të mirën për Shqipërinë dhe shqiptarët.

Megjithatë zonja Ministre ne nuk jemi aktualisht në fushatë. Por ju e keni nisur fushatën, që ju e quani llogaridhënie, por shumë kush mund ta interpretojë edhe si nisje e fushatës elektorale për zgjedhjet lokale. Çfarë është kjo fushatë dhe normalisht, në çdo vend të BE, normalisht marr atë që kanë standarde dhe që janë, një qeveri që merr votëbesimin nuk duhet të bëjë fushatë, ju çfarë bëni aktualisht?

Po, japim llogari.

Por llogari qeverie ka në katër vjet?

Jo, nuk jepen njëherë në 4 vjet. Jepen në mënyrë të vazhdueshme dhe ndoshta ajo protesta e Kukësit ka evidentuar disa problematika që të gjithë po i adresojmë. I keni dëgjuar edhe nga kryeministri, i keni dëgjuar edhe nga ministrat e linjës, sigurisht do ta dëgjoni nga gjithsecili prej nesh, që nuk ka më vend për mungesë transparence. Nuk do të ketë lodhje për të njoftuar, për të sensibilizuar për të informuar shqiptarët për të gjitha këto që po bëjmë dhe të gjithë këto vendime të marren bashkë, që këto vendime të jenë kolegjiale dhe që ata të kuptojnë se çfarë hapash po ndërmarrim dhe ku duam ta çojmë këtë vend dhe ku do na nxjerrin hapat që po ndërmarrim. Dhe kjo nuk është një fushatë, se nuk po bëjmë një fushatë me kundërshtarë përballë, se nuk ka afruar akoma, është shumë larg edhe fushat për pushtetin vendor, është thjesht një fushatë llogaridhënie për gjithë sa kemi bërë, në këtë 6 - mujor. Këtë analizë e kemi bërë edhe si ministra në Kryeministri, e kemi bërë edhe para grupit parlamentar, e kemi bërë edhe në rrethe më të gjera.

Atëherë çfarë meraku keni që e bëni këtë? Keni merakun se nuk ju besojnë më qytetarët, që duhet kjo llogaridhënie?

Jo, nuk ka lidhje fare. Kjo është përgjegjshmëri. Thjesht përgjegjshmëri. Japim llogari për gjithë sa kemi bërë dhe marrim inputin e tyre për çfarë mund të bëjmë më mirë. Është kaq e thjeshtë. Llogari. Një analizë 6 - mujore nëse doni ti vini një emër banal. Një analizë 6-mujore. Llogaridhënie, dialog, komunikim me qytetarët. Kaq është sa kemi bërë, këto ishin mundësitë dhe pamundësitë, na gjykoni nëse kemi bërë mirë apo ka më tepër për të bërë. Edhe na jepni rekomandimet tuaja se si mund ta bëjmë më mirë. Çfarë do donit të bënim ndryshe! Një fushatë intensive komunikimi dhe llogaridhënie.

Po i jepni më shumë rëndësi zonja Xhaçka partisë se sa qeverisjes? Pra partia është në punë gjithmonë, nëse marrim sistemin amerikan që ju e njihni shumë mirë aty partitë janë elektorale dhe mblidhen njëherë në katër vjet dhe vetëm kaq…

Jo edhe njëherë, ju lutem, se po keqkuptoheni. Kjo nuk ka lidhje vetëm me partinë.

Z. Rama tha se çdo kryetar partie duhet të bëjë këtë, duhet të bëjë atë...

Z. Rama është kryetar partie dhe do të bëjë gjithë analizën e partisë dhe kjo nuk diskutohet. Unë, si ministër i Mbrojtjes kam një detyrim shumë të posaçëm, ndaj gjithë shqiptarëve dhe, do mundohem të xhongloj sa më mirë të jetë e mundur edhe detyrat e mia ekzekutive, por edhe komunikimin e vazhdueshëm qark më qark me të gjithë shqiptarët për t’u thënë se çfarë po bëjmë ne sot, ose si mund ta bëjmë më mirë nesër, ose çfarë mund të bëjmë më mirë nesër sipas rekomandimeve të tyre. Edhe për t’u dhënë llogari si e kemi bërë pse e kemi bërë. Pse nuk e bënim dot më mirë. Si mund ta bëjmë më mirë?

Kur flasim për parimet e demokracisë apo Shtetit të së Drejtës zonja Ministre. Unë kam pak një merak në këtë bashkëqeverisje. Nuk arrij ta kuptoj pse duhet të bëhem pjesë e koalicionit të bashkëqeverisjes me qytetarët kur unë kam një institucion me të cilin e paguaj, jo vetëm unë, por të gjithë taksapaguesit. Pra i kthehem dhe njëherë kësaj që është pesha e partisë dhe pesha e institucionit. Pse duhet të regjistrohem unë tek portali? Ka institucione që duhet, presupozohet të më zgjidhin problemet?

Tek portali. Presupozohet se, historia ka treguar se, gjatë gjithë tranzicionit ajo që presupozohej të ishte një e drejtë, të cilën mund ta gjeje shumë kollaj në zyrat e shtetit, do të sorollatej padrejtësisht, për vite të tëra, pa gjetur rrugëzgjidhje. Sot, falë atij portali, ti mund të vendosësh mos të regjistrohesh, por ka pasur shumë njerëz, ka pasur mijëra njerëz, që janë regjistruar dhe, falë atij portali, jo vetëm kanë marrë përgjigjen e merituar, nëse bëhet apo s’bëhet, nëse shqetësimi i tyre është i drejtë apo jo i drejtë ..

Nëse ju nesër nuk jeni në pushtet, çfarë do ndodhë me këtë portal? Qeveria tjetër nuk do merret me portalin tuaj?

Edhe njëherë. Ne mbajmë përgjegjësi për atë që bëjmë vetë. Nëse nesër nuk do të jemi në qeverisje...

Se ju nuk do qeverisni për një kohë shumë të gjatë? Do ishte fatale për Demokracinë?

Unë jam e bindur që do qeverisim shumë gjatë, por sa të gjatë nuk di tua them. Por di t’ju them se nëse kjo metodë pune dhe kjo eficencë ndaj kërkesave të qytetarëve nuk do të gjente vend në një qeveri të ardhshme të jeni të bindur që qytetarët nuk do të kërkonin asgjë më pak se një e drejtë e fituar, një standard shumë më cilësor në trajtimin e problemeve dhe ankesave të tyre. Nuk do të lejonin askënd që t’i rikthehej pas edhe njëherë avazit të vjetër të sorollatjes kot institucion më institucion pa gjetur zgjidhje. Sot, afër atij portali, nëse shqetësimi është i drejtë, gjen zgjidhje brenda 10 ditëve . Dhe kur them gjen zgjidhje, po them për të gjithë ata që nëpër hipoteka janë lodhur dhe nuk kanë çarë dot me drejtësi ndonjëherë nuk kanë çarë as me taraf, kanë gjetur zgjidhje brenda 10 ditëve përmes portalit.

Kjo bëhet për të afruar sa më shumë simpatizantë afër PS?

Këtë mund ta konsiderosh si të duash, por në thelb në thelb, është një shërbim cilësor, ashtu siç duhet të ishte administrata e shtetit përkundrejt qytetarëve të saj.

Shërbim jashtëinstitucional?

Jo, absolutisht jo. Portali është vetëm një link që të çon tek institucionet. I vetmi problem është se ka dhe syrin e kryeministrit. Dhe asnjë nga këta që deri dje mund të ketë sorollatur dikë, mund t’i ketë kërkuar para dikujt, apo mund të ketë patur lloj-lloj arsyesh të paqena për të mos i dhënë shërbimin që e meritonte nuk do guxoj ta bëjë më. Është kaq e thjeshtë. Kush ka guxuar të vazhdojë avazin e vjetër sot përballet me Prokurorinë.

Kjo fushatë në një farë mënyre është edhe përsa i përket zgjedhjeve lokale; a është e përgatitur PS për këto zgjedhje, zonja Ministre?

Ua thashë dhe më përpara se nuk ka lidhje me zgjedhjet lokale pasi janë shumë larg zgjedhjet lokale.

Po ja erdhi vera në shtator fillojnë. Ndoshta vetëm opozita e shikon shumë larg këtë fushatë se e kam pyetur dhe opozitën...

Kemi minimalisht edhe një vit nga tani. Është një kohë goxha e gjatë për t’i hyrë një fushate elektorale. Jemi në fund të 6 - mujorit të parë të qeverisjes dhe po bëjmë një fushatë të mirëfilltë informimi dhe llogaridhënie. Vetëm kaq.

Të jetë test dhe një kohë për të zgjedhur kandidaturat për zgjedhjet lokale? U fol në Asamble se kjo kohë do jetë një test edhe për kryetarët e bashkive?

Do jemi në test të gjithë sa i takon shërbimeve, pritshmërive se si i kemi përmbushur, detyrës si e kemi bërë përgjegjshmërisë qe kemi marrë përsipër, sa ia kemi dalë për t’u shërbyer qytetarëve sipas pritshmërive dhe aspiratave që ata kanë. Për këtë jemi në test të gjithë, që do të thotë që, kjo është një gjë shumë e mirë, që një parti të shikojë brenda vetes së vet me tendencën për të përmirësuar duke pasur parësor në çdo moment interesin e qytetarëve edhe hallet e tyre

Opozita në fakt po e quan fasadë këtë që ju po bëni. Fushatën e llogaridhënies madje z. Spaho e ka deklaruar. Si është komunikimi me Opozitën? Do jemi prapë dëshmitar i atyre seancave në Parlament?

Për këtë duhet të pyesni Opozitën, por nuk kuptoj se çfarë është fasadë tek dëshira për të qenë pranë njerëzve. Tek kuraja për t’u ballafaquar me ta edhe për ato gjëra që nuk i ke bërë mirë. Se çfarë mund të ketë fasadë këtu, vetëm opozita mund ta dijë.

Zonja Xhacka, është folur kohët e fundit për një ftohje mes Ramës dhe Veliajt, ju që i njihni shumë mirë të dy politikanët, si janë marrëdhëniet e tyre?

Një pyetje krejt e pa vend edhe për llojin e intervistës që kemi zhvilluar.

Pse është e pavend?

E para, se unë nuk marr dot thashetheme mediash dhe t’i sjell në një studio televizive, kur nuk kam absolutisht as informacionin më të vogël përsa po thoni dhe më duket e shëmtuar t’i japim shumë rëndësi apo ta trajtoj...

Do të ishit dakord të rikandidonte z. Veliaj?

Absolutisht, pse jo! Z. Veliaj, sipas të gjitha sondazheve, sipas mbështetjes që ka nga qytetarët, punën e vet të palodhur, i ka të gjitha arsyet dhe meritat për të qenë kandidati i ardhshëm i Tiranës. Nuk e kuptoj pse kjo ka tërhequr dhe vëmendjen për ta diskutuar.

Jua kërkova për opinion, se kryeministri e vendos...

Më kërkuat mendimin tim, jua dhashë.

Portali jonë “shqiptarja.com”, ka përgatitur që sot një sondazh ku është dhe emri juaj për ministrin me performancën më të keqe e kemi trajtuar si pyetje? Sipas sondazhit ministri me performancë më të ulët rezulton z. Xhafaj, ndërsa ju jeni poshtë, cilësoheni si performancë e mirë. Sa më poshtë të jesh, aq më e mirë është performanca e ministrit, atëherë, cili është komenti juaj për këtë performancë? Vetë ju si e cilësoni performancën e qeverisë në këto 6 muaj?

Mendoj se kemi bërë një punë jashtëzakonisht të madhe.

Ja ku e keni grafikun ju nuk jeni me performancë të keqe?

Mos po më mbani me hatër se më keni ftuar këtu në studio?

Jo, jo. Pak orë ka sondazhi që ka nisur dhe nuk di kush është ministri fundit nuk di nëse regjia më ndihmon? Apo jeni ju?

Jo është Peleshi.

Po, zoti Peleshi që dhe ai është popullor si ministër. Ju jeni në listën e ministrave të mirë të kësaj qeverisje.

Unë do të thosha se kemi nisur një punë që nga dita e parë me ambicie për të qenë realisht me objektiva shumë ambiciozë dhe me dëshirën për të këtë maksimumin madje përtej mundësive tona.

Unë di të them që për Ministrinë time kam bërë maksimumin e mundshëm edhe për t’i dhënë efektivave të FA, realisht vëmendjen që u takon tek ajo që është gjëja kryesore për ta, tek trajnimi, edukimi dhe përparimi në karrierë, por edhe trajtimi financiar, i cili është në vëmendjen time shumë të posaçme, fatmirësisht edhe në vëmendjen e qeverisë dhe të kryeministrit. Kemi bërë një përpjekje jashtëzakonisht të madhe për ta bërë Forcën e Armatosur një instrument të besueshëm për ndihmën ndaj komunitetit. Për një prezencë të shtuar për t’u ardhur në ndihmë të gjithë të pamundurve. E kemi bërë të gjithë këtë, do të thosha, me njëfarë suksesi gjatë emergjencave civile. Themi një farë suksesi, se nuk diskutohet çështja e ardhjes në ndihmë, ku ka akoma shumë për të bërë, për të ardhur bashkë të gjithë faktorët se nuk është vetëm FA, por është dhe pushteti vendor por edhe aktorë të pushtetit qendror, gjithsecili sipas fushës së vet të përgjegjësisë të rakordojë për të marrë masa edhe parandaluese që fatkeqësitë natyrore të mos kenë pasoja si ato që kemi parë deri tani apo dëme të konsiderueshme për familjet, të cilat janë pjesë, apo për buxhetin e shtetit.

Kështu që në këtë pikë kemi ende shumë për të bërë, por ama kemi bërë maksimumin që në këtë kohë ushtrinë ta kthejmë në një instrument të besueshëm për ardhjen në ndihmë, për sigurinë e komuniteteve tona. Dhe një sondazh i fundit që unë kam lexuar në ndihmën e UNDP e nxirrte FA, Ministrinë e Mbrojtjes, institucionin më të besueshëm në këndvështrimin e qytetarëve. Kjo është një arritje e rëndësishme.

Dhe jemi shumë të angazhuar që gjithë sa kemi bërë të jetë një porcion i vogël i gjithë asaj sa duam të bëjmë edhe sa do të bëjmë në muajt dhe në vitet në vijim.

Në 27-vite kjo është qeveria e parë që ndërtohet vetëm me një parti politike. Është më mirë, apo është më e vështirë të qeverisësh i vetëm?

Sigurisht është pa diskutim shumë e vështirë të qeverisësh vetëm, sepse përgjegjësia tanimë është vetëm e jona, për gjithçka që shkon dhe për gjithçka që nuk shkon.

Zonja Ministre ju falënderoj për intervistën në Report tv dhe në shtator do na jepni sërish kënaqësinë të diskutojmë për llogaridhënien që po vazhdon.

Ju faleminderit për ftesën!