Kodheli tregon gjithçka: Armët, përgjimin, kimiket, korrupsionin, helikopterët*

kodhelillyriaIntervistë ekskluzive e ministres së Mbrojtjes së Shqipërisë, Mimi Kodheli dhënë gazetës “Illyria”.

Mimi Kodheli është e para femër që udhëheq ministrinë e Mbrojtjes në Shqipëri qëkurse ushtria u themelua më 4 dhjetor 1912 me vendimin e qeverisë së Ismail Qemal bej Vlorës

Intervistoi: Denion Ndrenika

Ministrja e Mbrojtjes, Mimi Kodheli nuk iu shmang asnjë çështjeje të shtruar si pyetje. Ministrja Kodheli foli në tërësi për shkurtimin me 30% të personelit dhe ristrukturimin e Forcave të Armatosura si dhe disa çështje të bazave ushtarake detare, ajrore dhe tokësore; pse nuk u arrit niveli 2% i PBB për ushtrinë dhe modernizimin e saj.

“Ushtria shqiptare sot nuk është as e armatosur, sipas standardeve të NATO-s, as e veshur sipas standardeve të NATO dhe relativisht pak e stërvitur sipas standardeve të NATO” - tha ajo.
Zonja Kodheli pohoi synimin për rishikimin e kontratës me kompaninë nga Franca “EuroCopter” për blerjen e helikopterëve “Cougar”; se nuk rishikohet ligji për Shërbimin Informativ të Ushtrisë, që u kritikua nga ish-opozita se mori disa fuqi më shumë; për mbështetjen anmerikane për të hetuar përgjimet e dyshuara të opozitës dhe të diplomatëve…
“Që nga ish-ministri i Mbrojtjes, (Arben) Imami edhe deri te të gjithë ata që janë përfshirë në procedura antiligjore do të vazhdojnë të përgjigjen përpara ligjit" - tha ministrja referuar luftës kundër korrupsionit.
Nuk pritet të ndryshojë as ligji që lejoi çmontimin e predhave nga kompani shqiptare, -  “zanafilla” e tragjedisë së Gërdecit.
Por, po aq e hapur zonja Kodheli u tregua edhe me shpjegimet nëse ka ose jo veprime apo përgatitje të trupave “Komando” për të shoqëruar transportimin e armëve kimike të Sirisë kur tha “nuk e di se çfarë presupozoni me shoqërimin e kësaj gjëje, por Shqipëria ka kapacitete, ekspertë të fushës të trajtimit të mbetjeve dhe lëndëve kimike edhe sot”.
Zonja Kodheli hodhi poshtë zërat për kosto në zhvendosjen e ndërtesës së ministrisë së Mbrojtjes si dhe për dhënien e ndërtesës së Qendrës së Kulturës, Medias dhe Botimeve të Mbrojtjes (QKMBM), e njohur si SHQUP (Shtëpia Qendrore e Ushtrisë Popullore) për seli të Partisë Demokratike.
Temë tjetër në bisedë ishte edhe Kosova si dhe njehsimi i politikave ushtarako-arsimore me Shqipërinë.
Zonja Kodheli qëndroi në vizitën e saj të parë në Kosovë në prag të një mbledhjeje të rëndësishme të qeverisë së Kosovës dhe të Shqipërisë në Prizren.

 --------------------------------

 - Zonja ministre, faleminderit për kohën që gjetët për bisedë me gazetaën “Illyria” të komunitetit shqiptaro-amerikan në Shtetet e Bashkuara!

 - Mimi Kodheli: “Ju faleminderit Juve! Mbase jam vonuar pak me ju në këtë intervistë të parë me ju, por e rëndësishme është se çfarë të themi në intervistë këtë herë”.

 
 -
Atëherë, zonja ministre unë po pres të më thoni menjëherë se si mendoni ta bëni reformimin e Forcave të Armatosura të Shqipërisë dhe të një pjese të personelit civil që ka Ministria e Mbrojtjes.

 - Mimi Kodheli: “Tashmë, ristrukturimi i pjesës civile le të themi apo i ministrisë së Mbrojtjes ka ndodhur, ne kemi në dorë në strukturë të re, e cila është reduktuar me 30%. Këtë e kemi bërë për shumë arsye. Por, çka është më e rëndësishme është fakti që strukturat e ngarkuara jo domosdoshmërisht sjellin produktin më të mirë. Kështu, që sa më të lehta, sa më efektive aq edhe më mirë bëhen punët e shtetit. Dhe, në këtë frymë si dhe në frymën e një austoriteti evident dhe jo për të mos u konsideruar që trashëgojmë për shkak të situatës së keqe financiare, ne kemi qenë në një sens të detyruar që ta rrudhim numrin e ministrisë nëpërmjet një ristrukturimi besoj eficent. Kjo do të pasohet edhe me një ristrukturim që do t’i ndodhë edhe Shtabit të Përgjithshëm dhe Forcave të Armatosura në përgjithësi. Kjo jo vetëm bazuar në dokumentin strategjik që kërkon këtë gjë që të ndodhë, pra që Forcat Armatosura të Shqipërisë nga rreth 10 mijë, në fund të vititi 2015 të shkojnë në 8500, por edhe të një sistemi mund të them apo të një rikonceptimi që do t’i bëhet mënyrës se si Forcat e Armatosura do të funksionojnë këtej e tutje. Sigurisht që kjo involvon në vetvete, përfshin jo vetëm ristrukturimin në vetvete, por edhe ndryshime të bazës ligjore, në të cilat do të mbështetet ky ndryshim.

Më lejoni të ndaj me Ju vetëm dy momente: Shqipëria është futur në NATO në vitin 2009. Ndërkohë që, dy ligjet bazë mbi të cilat mbështetet e gjithë veprimtaria e Forcave të Armatosura dhe Ministria e Mbrojtjes, njera nga viti 2002 dhe tjetra nga viti 2004, nuk e kanë reflektuar këtë ndryshim të madh që ka ndodhur në Shqipëri, që është anëtarësimi në NATO. Kjo do të reflektohet brenda këtij viti me këto ndryshime që do t’i bëhen këtyre dy ligjeve, ashtu siç do të reflektohen edhe të gjitha ngjarjet pozitive apo dështimet që kanë ndodhur në qeveritë e mëparshme, me qëllim përmirësimin e punës”.


 -
Ju përmendët aspektin financiar. A mund të kuptojmë që ka mundësi për t’u prekur apo për të mos u prekur 2 përqindshi  që duhet ndarë nga Buxheti i Shtetit (Prodhimi i Brendshëm Bruto) për ushtrinë? A ka qenë problem për ta respektuar këtë kuotë? Natyrisht, edhe kërkesat duke qenë pjesë e NATO apo partnerëve të tjerë, Shteteve të Bashkuara të Amerikës.

 - Mimi Kodheli: “Atëherë, shumë shkurt. 2 përqindshi është një target jo vetëm për Shqipërinë, por për të gjithë vendet anëtare të NATO. Midis vendeve anëtare të NATO janë shumë të pakta vendet që e kanë cekur këtë shifër. Tentohet drejt kësaj shifre. Por, gjëja e rëndësishme që ne kemi bërë në rastin e buxhetimit 2014, është që kemi larguar nga fondi i Ministrisë së Mbrojtjes, fondin e pensioneve të ushtarakëve. Ky është një fond që i përket fondit të të gjithë pensioneve për të gjithë pensionistët në Republikën e Shqipërisë. Artificialisht ky fond ka rritur shpenzimet në ushtri, vetëm si të deklaruara të tilla. Por, në fakt ishte një fond që nuk harxhohej më tashmë për ushtrinë.

Duke e pastruar buxhetin e ministrisë së Mbrojtjes nga ky fond, kërkesë kjo e përsëritur e NATO, ne sot dimë, publiku di dhe drejtuesit e NATO ë dinë, që fondi që harxhohet sot për Ministrinë e Mbrojtjes dhe Forcat e Armatosura, modernizimin e tyre dhe shërbimin kushtetues dhe institucional që ato japin, është pikërisht kjo sasi parash që ne kemi vendosur sot të harxhojmë, që është në shifrën 1,02% e Produktit Kombëtar dhe që sigurisht për shkak të kërkesave të NATO dhe për shkak edhe të vetë kërkesave që vijnë nga brenda, do të vazhdojë të rritet në vitet në vazhdim”.


 -
Theksin te modernizmi i ushtrisë, Ju zonja Kodheli, e përmendët edhe disa ditë më parë kur folët për Strategjinë e re Kombëtare të Mbrojtjes dhe të Sigurisë. Me këtë duhet të nënkuptojmë përmirësimin e pajisjeve të sotme ushtarake, blerjen e armatimit të ri, mirëmbajtjen e bazave ushtarake, partneritetin, bie fjala me Bazën Ajrore të Kuçovës (në Berat) me Turqinë, Bazën Detare të Pashalimanit (në Vlorë) po me Turqinë, apo Bazën Detare të Bishtit të Pallës (në Durrës) që ka mbetur si një ngrehinë. A përfshihen këto në të gjithë ristrukturim?

 - Mimi Kodheli: “Më së shumti…. Shumica e këtyre që përmendët Ju përfshihen. Ju duhet të keni një gjë parasysh: ushtria shqiptare duhet dhe është në proces transformimi dhe do të vazhdojë të jetë në një proces transformimi  me qëllim rritjen e kapaciteteve operacionale të saj. Kjo fjalë është fjalë që ndoshta thotë pak për publikun. Gjëja që unë mund t’u them sot është që ne kemi një kërkesë të NATO që është modernizimi dhe pajisja e Batalionit numër 2 të Këmbësorisë (b2k) për të qenë e gatshme, për të marrë pjesë në operacione të forcave të NATO. Ka qenë e planifikuar dhe e pranuar si kërkesë e tillë, që në fillim të herës, që në vitin 2009, kur Shqipëria u bë anëtare, për t’u plotësuar (si kërkesë) në vitin 2014. Nuk ka ndodhur një gjë e tillë, madje, në fund të vitit 2013 për të qenë e saktë. Nuk ka ndodhur! Jo vetëm që nuk ka ndodhur, por të gjitha paratë që kanë qenë parà të destinuara për modernizim, kanë kaluar “në drejtim të paditur” them unë ndonjëherë për shaka. Por, në fakt jo! Drejtimi dihet. Kanë sponsorizuar media pranë qeverisë. Kanë sponsorizuar aktivitete kulturore të nevojshme për ushtrinë dhe qytetarët, por jo primare në kërkesë. Kështuqë, kjo e ka bërë vulnerabël këtë diskutim. Kjo e ka bërë vulnerabël ushtrinë shqiptare. Ushtria shqiptare sot nuk është as e armatosur, sipas standardeve të NATO, as e veshur sipas standardeve të NATO dhe relativisht pak e stërvitur sipas standardeve të NATO. Kjo e bën fraxhil, të prekshëm, të cënueshëm këtë diksutim që ne bëjmë.

Ndaj unë jam sot për t’i thënë kujtdo që paratë e modernizimit dhe paratë e përcaktuara në buxhet për të modernizuar ushtrinë shqiptare, Forcat tona të Armatosura do të shkojnë vetëm në një drejtim: në atë drejtim që na i kërkojnë kërkesat e NATO, atë drejtim që na i kërkojnë kërkesat kushtetuese dhe ligjore brendapërbrenda vendit. Me qëllim që, perfeksionimi i produktit që ne nxjerrim, që është siguria kombëtare, që është mbrojtja e territorit shqiptar, që është mbrojtja rajonale, që është pjesëmarrja si në strukturat paqeruajtëse, ashtu edhe në strukturat në frontin e parë të luftimit, të jetë e niveleve që ka sot çdo vend i NATO-. Për të mbërritur deri këtu duhet padyshim një punë e madhe e të gjithë Forcave të Armatosura. Një drejtim i drejtë politik, drejtim, i cili unë mendoj që është në mbështetje të këtyre forcave dhe do të vazhdojë të jetë i tillë për aq kohë sa produkti ynë final do të jetë me të vërtetë ai që kërkohet”.

 
 -
Nuk…
 - Mimi Kodheli:
“Nuk është sot! Nuk është sot! Ai që ne na është kërkuar dhe ai që ne kemi premtuar, nuk janë sot atje ku ne duhet të ishim!”


 -
Në përmirësimin e kuadrit ligjor, përfshihet trajtimi më i mirë i personave që merren me shkatërrimin e mbetjeve kimike?

 - Mimi Kodheli: “Lëndët kimike, po”.


 -
Po për bazën ajrore të Kuçovës, që mund të përdoret për qëllime civile me një pistë shumë të mirë ekzistuese (ndoshta më e mira në Shqipëri, sepse ka mbajtur avionin “Antonov” deri në 6 ton)? Pra, a ka përpjekje nga Ministria e Mbrojtjes, që në kuadrin e legjislacionit ta shfytëzojmë Kuçovën edhe për fluturime civile?

 - Mimi Kodheli: “Ka një projekt që ka mbetur i papërfudnuar. Projekti i përbashkët, ashtu siç edhe ju e thatë, më Turqinë, për ta modernizuar bazën e Kuçovës. Baza e Kuçovës ka disa probleme që vijnë nga vite më parë. Probleme pronësie, probleme të keqmenaxhimit të materialeve, probleme të lënies pas dore të të gjithë atij reparti ushtarak atje. Ka probelme të një inventari të mbetur herët siç janë avionët e vjetër “MIG” që janë përdorur dikur dhe që nuk përdoren më. Do ta shtyjmë më tej përfundimin e projektit të përbashkët me Turqinë dhe jemi në studim e sipër se çfarë do të ndodhë me këtë pasuri të Forcave tona të Armatosura. Ju thoni të përdoret për arsye civile, unë them që mund të përdoret”…

 - Për një shkollë (kupto: shkollë aviacioni)…

 - Mimi Kodheli: “Patjetër për një shkollë. Për qëllime të NATO, ku NATO të mund të ketë një bazë ku mund të ulet, të zbresë, në raste të një nevoje të veçantë. Pra ka disa qëllime të mira se përse mund të përdoret. Ajo çka është për t’u theksuar në këtë rast, me që po diskutojmë për këtë gjë, është që nuk do të lihet siç është lënë deri më sot. Kjo është e sigurtë”!


  - Të ndalemi pak te vizita në Kosovë, një ditë përpara se qeveria e Shqipërisë dhe qeveria e Kosovës të bënin mbledhjen e përbashkët, simbolike për Prizrenin. Çfarë do të thotë për ju dhe në tërësi për politikën re të qeverisë, marrëdhënia me Kosovën?

 - Mimi Kodheli: “Atëherë, e para, më lejoni të them që mbledhja e përbashkët, jo domosdoshmërisht është simbolike”.

 - Për Prizrenin thash, si qytet.

 - Mimi Kodheli: “Ah, ok, po, për Prizrenin… Mendova se si mbledhje. U kërkoj ndjesë! Për mua është e rëndësishme që le të themi takimi im i parë me një nga homologët të bëhet pikërisht në Kosovë. Kosova ka një rrugë akoma të gjatë për të bërë, sidomos kur flasim për çështjet e sigurisë. Ju e dini që Kosova ka një Forcë të Sigurisë (së Kosovës), një forcë të sigurisë kombëtare, por ndërkohë detyrimin e ruajtjes me forcat e armatosura të territorit të Kosovës e kryen KFOR, pra kryhet nëpërmjet NATO. Pra, nga ky moment deri te transforimimi i Forcës së Sigurisë së Kosovës në një forcë mirëfilli të armatosur, ka një copë rrugë për të bërë.

Ku është Shqipëria në këtë rast? Unë mendoj që ka dy gjëra, shumë të rëndësishme që Shqipëria duhet të plotësojë, qeveria shqiptare duhet të plotësojë, Ministria e Mbrojtjes dhe Forcat e Armatosura të Shqipërisë duhet të plotësojnë: E para; duhet të jenë në ndihmë të gjithçkaje që përmbledh fjala “transformim” ose “rrugë” e Forcave të Sigurisë deri te Forcat e Armatosura”…

 - Pra, deri te krijimi i ushtrisë.

 - Mimi Kodheli: “Po, deri te krijimi i ushtrisë. Përpilimi i dokumenteve strategjikë të sigurisë dhe të mbrojtjes kombëtare. Shkollimi, hartimi i koncepteve të stërvitjes për këto forca, përpilimi i vetë strukturave të Forcave të Armatosura bazuar në kërkesat dhe nivelet e NATO, apo jo? Mund të jetë sistemi arsimor, ushtarak i tyre, që mund të ndihmohet apo të unifikohet me atë të Shqipërisë. Programet mësimore, programet stërvitore.
Shkëmbimi i një gjëje që ka ndodhur më përpara dhe që është shumë i rëndësishëm, bëhet fjalë për trupat që asistojnë në emergjencat civile. Ne i kemi kërkuar shpeshherë nga Kosova që të na ndihmojnë, sidomos në vitet e mëparshëm, në ngjarjet traumatike le të themi të përmbytjeve në veri.

Ndërsa, një tjetër është që, Shqipëria është në këtë rajonin tonë të Ballkanit Perëndimor i vetmi vend anëtar i NATO bashkë me Kroacinë. Pra, mund të marrë lidershipin e hapjes së rrugës, dhënies së leksionit (dhe ne jemi në gjendje ta bëjmë këtë sot), për të gjitha ato vende të tjera më së shumti rretherrotull Shqipërisë, që janë në këtë rrugë, duke filluar nga Kosova, Maqedonia dhe te Mali i Zi. Pse jo edhe te Bosnje e Hercegovina më vonë. Bashkëpunimi rajonal dhe kur flas për bashkëpunimin rajonal, absolutisht në vend të parë vë Kosovën. Por, sigurisht bashkëpunimi rajonal edhe me Maqedoninë dhe Malin e Zi, del i një rëndësie shumë të madhe, shumë të veçantë.
Për të mos e shtyrë diskutimin më tutje, NATO bazohet në një koncept të ri sot ri që quhet “Smart Defence”. “Smart Defence” do të thotë që Aleanca parashikon të realizojë një nivel të tillë le të themi të mbrojtjes rajonale, ku dikush bën atë që di më mirë të bëjë dhe me më pak shpenzime; dikush tjetër bën diçka tjetër. Pra, jo domosdoshmërisht duhet të ketë një akademi ushtarake, po marr një shembull, në të gjitha vendet e rajonit, por mund të ketë vetëm një akademi ushtarake për të gjithë vendet e rajonit; ndërkohë që ka një Qendër Simulimi për të gjithë vendet e rajonit; ndërkohë që ka një institucion tjetër për të gjithë vendet e rajonit. Dhe, kjo e bën të realizueshme idenë e “Smart Defence”, sepse në kushtet kur jo vetëm Shqipëria, por të gjithë kanë hyrë dhe nuk kanë dalë akoma nga kriza, kjo del akoma më e nevojshme.
E fundit gjë që dua të them për rajonin është, ne kemi gjëra të përbashkëta që lidhen me sigurinë e rajonit, që lidhen me faktin që kur një trafik prek rajonin, nuk prek një vend, prek disa vende, kur njerëz që kërkojnë azil apo refugjatë prekin disa vende dhe kjo e bën akoma më të nevojshëm bashkëpunimin midis forcave tona të armatosura, bashkëpunimin midis shërbimeve tona të informacionit, bashkëpunimin midis të gjitha struktuarve që në fund të ditës e bëjnë Ballkanin një vend më të sigurtë dhe një vend më të mbrojtur”.


 -
Sa efektiva kemi nga Forca e Sigurisë së Kosovës që trajnohen, që arsimohen në Shqipëri? Keni një raport dhe a do të ndajë qeveria kuota të veçanta për ta? Përfshi këtu edhe shqiptarët në shtetin maqedonas, aq më tepër kur edhe ministrin e kemi shqiptar?

 - Mimi Kodheli: “Ka patur, ka patur, por ju siguroj që nuk ka vetëm nga Kosova, por ka edhe nga vende të tjera, si në Qendrën e Simulimit, që është një qendër në të cilën partnerët tanë strategjikë, Shtetet e Bashkuara të Amerikës, kanë investuar shumë. Kjo ka qenë më shumë e spikatur dhe e zhvilluar kur është folur për mastera dhe për doktoratura. Në fakt, t’u them të drejtën ne jemi duke e riparë sistemin arsimor, sepse ne e ndjejmë që kemi handikapet tona, kemi boshllëqet tona lidhur me një ristrukturim më të drejtë arsimor të Forcave tona të Armatosura. Kemi disa hapësira që na e vështirësojnë punën në përgatitje, sidomos kur flitet për stadin nga “nënoficer” në “oficer” dhe kështu me radhë. Besoj që shumë shpejt do të riformatojmë një logjikë tjetër dhe një strukturë komplet tjetër të mënyrës se si Forcat tona të Armatosura do të arsimohen. Dhe, kur them “do të arsimohen”, flas që nga mënyra se si do të rekrutohen dhe deri te përgatitja qoftë edhe e stafit politik ushtarak për të drejtuar nesër. Në këtë rrugë mendoj që do të mundësojmë edhe një unifikim të sistemit ushtarak për të dy vendet. Sigurisht që kërkon kohë për t’u bërë. Absolutisht!

Mendoj që standardet e Bashkimit Europian dhe të NATO janë një rrugë e përbashkët e jona. Kjo rrugë tashmë ne, na është treguar. Ne duhet vetëm që të kemi inteligjencën e mjaftueshme dhe dëshirën e mirë politike për ta mundësuar këtë gjë. Duhet filluar sot, në mënyrë që nesër ta kemi shumë më të lehtë për të qenë nesër nën një ombrellë që do të jetë padyshim “ombrella NATO”, që është edhe rruga, tek e cila Kosova do të ecë ashtu siç edhe Shqipëria ecën sot”.


 -
Në këtë politikë a përfshihet edhe mundësia e pjesëmarrjes së trupave të Forcës së Sigurisë së Kosovës si pjesë të trupave të Shqipërisë në misionet paqeruajtëse? Është e mundur kjo? A keni diskutuar me kolegët e NATO për këtë çështje?

 - Mimi Kodheli: “Jo, për momentin kjo nuk është e mundur, kjo nuk është disktutar. Por, unë besoj që Forca e Sigurisë së Kosovës, ka një rrugë të mirëpërcaktuar sot që është rruga e transformimit. Ka rrugë akoma për të bërë, kështu që besoj se i ka të mirëpërcaktuara edhe detyrimet që kjo forcë ka sot në raport me NATO”.


 -
Po prani të trupave të Shqipërisë në misionin e KFOR, ka ndonjë diskutim për këtë çështje?

 - Mimi Kodheli: “Ka trupa Shqipëria”…

 - Kemi përfaqësinë…

 - Mimi Kodheli: “Kemi përfaqësinë tonë atje, kemi përfaqësues”.

 - Bëj fjalë për prani me trupa dhe jo thjesht me përfaqësues…

 - Mimi Kodheli: “Jo prani me trupa ne nuk kemi. Ne kemi, ne kemi”…

 - Por, a është diskutuar kjo?

 - Mimi Kodheli: “Jo, jo, jo, jo… Nuk është diskutuar! Përse duhet të ndodhë?! Shqipëria është vend i NATO. Domethënë, Shqipëria përfaqësohet kudo që shkon në misione paqeruajtëse, në ISAF, apo post-ISAF, përfaqësohet si një trup e një vendi të NATO. Pra, brenda këtyre trupave nuk ka amerikanë, shqiptarë, italianë dhe holandezë. Ato janë trupa “NATO”. Misioni është misioni “NATO”.


 -
Shqipëria ka parimin “bashkë kemi hyrë në Afganistan dhe bashkë do të dalim me aleatët”. Po ashtu do të vazhdojë pjesëmarrjen në operacionet paqeruajtës në Çad, në Bosnje e Hercegovinë me “ALTEA”-n e në misionin e ri që pritet të këtij viti. Çfarë domethënie ka kjo kur shumica e vendeve po vazhdojnë t’i tërheqin trupat nga aleanca të ndryshme që kanë në misionet paqeruajtëse?

 - Mimi Kodheli: “Edhe vendet e tjera që kanë tërhequr trupat nuk do të thotë që nuk do të jenë në post-ISAF. Ky është një vendim i marrë në një nga ministerialet e vendeve të NATO dhe “together in, together out” është e vlefshme jo vetëm për Shqipërinë, por për të gjithë forcat aleate të NATO, sigurisht, të një natyre tjetër, për qëllime të tjera, sepse post-ISAF presupozon që do të ketë forca të përgatitura nga forca të armatosura të vendeve të NATO për të asistuar, për të suportuar forcat afgane të sigurisë, që është një mision po aq i rëndësishëm sa ç’është edhe misioni ISAF. Kështuqë, pavarësisht tërheqjes me shumicë të trupave, kjo nuk do të thotë që vendet e tjera të NATO nuk do të jenë të pranishëm në këtë proces post-ISAF. Të gjithë do të jenë atje”.


 -
Zonja ministre, meqënëse çështja e shkatërrimit të armatimit kimik të Sirisë në Shqipëri u bë shumë e përfolur dhe të mos i kthehemi një historie që tashmë e ka marrë një lloj qartësimi, unë po u pyes nëse është e aftë Shqipëria, që të ketë kapacitete bie fjala, për të bërë shoqërimin e transportit të armatimit kimik, nëse do të kërkohet?

 - Mimi Kodheli: “Unë nuk…”.

 - A po stërviten trupat tona “Komando” për këtë detyrë?

 - Mimi Kodheli: “Unë nuk e di se çfarë ju presupozoni me “shoqërimin” e kësaj gjëje. Shqipëria ka kapacitete, ekspertë të fushës, pra të trajtimit të mbetjeve dhe të lëndëve kimike. I ka ato edhe sot. Ne kemi bërë brenda Shqipërisë trajtimin e të gjithë mbetjeve kimike. Sigurisht që pak vetë e kanë kuptuar apo e kanë ndjerë këtë gjë që ka ndodhur. Por, në fakt ka ndodhur! Dhe për fat të mirë ka ndodhur pa asnjë incident! Unë besoj që Shqipëria është një vend që i është përgjigjur pozitivisht kërkesave të NATO, pavarësisht se sa i ka realizuar pastaj deri në fund ato.

Por gjëja, që është më e rëndësishme për t’u thënë, meqë Ju përmendët tashmë të shumëdisktuarën, por besoj çështje të mbyllur të armëve kimike siriane, është: unë mendoj që Shqipëria dhe qeveria shqiptare e ka pasur për nder që i është kërkuar që të jetë pjesë e një procesi sa fisnik edhe të rëndësishëm, që është çlirimi i një rajoni po të rëndësishëm siç është Mesdheu dhe fare pranë vendit tonë, nga një e keqe e madhe siç janë lëndët kimike në duart e një sistemi dikatorial. Ndaj dhe kjo është shumë e rëndësishme që të thuhet. Përfundimi i të mospasurit mundësi që Shqipëria të ishte pjesë aktive, le të themi, e kësaj gjëje, nuk do të thotë asgjë përveçse atë se çfarë Shqipëria është në të vërtetë: ka treguar vullnetin e mirë politik për t’iu përgjigjur pozitivisht kërkesave të partnerit tonë më të rëndësishëm strategjik, Shteteve të Bashkuaar të Amerikës, por, sigurisht edhe kërkesave të rezolutës së Kombeve të Bashkuara, e cila në kushtet e një situate tejet të rëndë që ishte krijuar në Siri, mori vendimin e drejtë që armët kimike të mund të trajtoheshin jashtë kufijve të Sirisë dhe të mos ishin në duart as të regjimit dhe as të rebelëve që ishte një rrezik enorm”.


 -
Zonjë, Shërbimi Informativ i Ushtrisë (SHIU) ka qenë, nuk po them “i sulmuar”, por shpesh nën vëmendje jo vetëm të opozitës, që tanimë Ju jeni në qeveri, por edhe të partnerëve ndërkombëtarë, veçanërisht për disa ndryshime ligjore që iu bënë dhe që besohej se i jepnin disa fuqi më të shtuara këtij shërbimi krahasuar me Shërbimin Informativ të Shtetit (SHISH). A po punon ministria e Mbrojtjes, drejtoria ligjore që Ju keni këtu për t’ia zhveshur ato kompetenca që mendohet se i ka më shumë se ç’duhet? A është kjo një temë e punës Tuaj këtu?

 - Mimi Kodheli: “Përgjithësisht, më lejoni t’u them, të ndaj me Ju opinionin tim se, problemi nuk është se si ligjet shkruhen, problemi është se si ato zbatohen. Shtyrja e kompetencave më shumë se sa ligji ta lejon, bëhet për shkak të qëllimeve të caktuara politike apo për shkak të individëve të caktuar. Ne nuk e kemi të keqen përgjithësisht te ligji. Ne problemin e kemi te mungesa e demokracisë që kemi në mënyrën se si e drejtojmë shtetin. Te mungesa e demokracisë që kemi në mënyrën se si e kemi të organizuar shoqërinë apo pushtetet. Kështu që, tejkalimi i pushteteve është gjithmonë i rrezikshëm kudo dhe kurdoherë. Aq më shumë, kur flitet për një shërbim si ai i inteligjencës”.

 - A është tejkaluar kjo pikë në rastin e dyshimeve për përgjimin e ish-opozitës dhe të diplomatëve në Shqipëri? A ka ministria Juaj përbrenda një hetim për këtë çështje?

 - Mimi Kodheli: “Kjo është…. Kjo është për t’u verifikuar”…

 - Është e zotit Arvizu? (ambasadori amerikan Aleksandër Arvizu. Kupto: Mbështetje nga SHBA).

 - Mimi Kodheli: “Mmm… Kjo është për t’u verifikuar. Por, padyshim ne jemi absolutisht të mbështetur nga Shtetet e Bashkuara të Amerikës, nga homologët tanë, nga homologët e mi, nga Departamenti (amerikan) i Mbrojtjes në luftën tonë kundër korrupsionit, kundër mungesës së transparencës dhe padyshim kundër asaj që deri dje ka ndodhur: vënies së një muri midis ministrisë dhe atij organi që është mbi të gjitha organet dhe që duhet ta kontrollojë ministrinë, që është Parlamenti shqiptar! Kjo nuk do të ndodhë më! Madje, unë i ftoj kolegët e opozitës sot që të jenë prezentë dhe aktivë në kontrollin që si përbërejere të Komisionit të Sigurisë dhe të Mbrojtjes (të Kuvendit) do t’i bëjnë Ministrisë së Mbrojtjes dhe gjithçkaje që ndodh në këto institucione”.


 -
Ju morët një mbështetje dhe një përgëzim nga ambasadori i Shteteve të Bashkuara, Aleksandër Arvizu për luftën kundër korrupsionit. Por, a është lufta kundër korrupsionit vetëm në çështjet e diskutuara dhe tanimë në prokurori, të shpërdorimeve (kupto: të paraardhësit Tuaj, Arben Imami) nëpërmjet reklama të tepërta (në media) apo këtu mund të përfshihen edhe raste të ndryshme siç janë uniformat e ushtrisë, blerje aparaturash apo pajisjesh të ndryshme apo ushqimi për trupat? A ka hetime për këto raste? A ka dyshime që mund të ketë pasur shpërdorime?

 - Mimi Kodheli: “Atëherë, më lejoni ta ndaj përgjigjen në dy pjesë. Po, e para, është e vërtetë që ambasadori Arvizu dhe ambasada e Shteteve të Bashkuara të Amerikës ka dhënë dhe vazhdon të japë mbështetje në këtë ndërmarrje që ne kemi marrë si qeveri apo unë si ministre. Por, unë kam marrë një letër falenderimi dhe një telefonatë të drejtëpërdrejtë nga doktoresha Farkas (Dr. Evelyn N. Farkas zëvendësndihmëssekretare e Mbrojtjes për Rusinë, Ukrainën dhe Euroazinë), e cila është edhe zëvendësndihmësja e Sekretarit të Mbrojtjes, zotit Hegell (Chuck Hagel) në Shtetet e Bashkuara të Amerikës, lidhur me mbështetjen e madhe që institucioni që ajo përfaqëson i jep dhe do t’i japë Ministrisë së Mbrojtjes në këtë proces shumë të rëndësishëm. Thënë kjo, mendoj që mund të ndaj me Ju faktin që aktiviteti i Ministrisë së Mbrojtjes dhe i Forcave të Armatosura vazhdon të auditohet dhe të inspektohet. Kështu, që momentin më të parë që diçka do të dalë nga ky auditim dhe ky inspektim, besoj që mediat do të jenë të parat që do ta dinë, do të jenë në kontakt me këto të dhëna”.


 -
Në një mori problematikash, madje që përfunduan me tragjedi, ishte edhe çështja e çmontimit të armatimit dhe të predhave veç kalibrit të vogël, rasti i Gërdecit (nga shpërthimi në një punishte pranë Tiranës humbën 26 persona, u lënduan mbi 300 dhe më shumë se 4 mijë objekte u dëmtuan më 15 mars 2008). Ligji që këtë çmontim mund ta bënin edhe kompani shqiptare është miratuar në Kuvend. A keni plane që ta hiqni këtë të drejtë, për shkak të ekspertizës më të mirë që ndoshta mund të kenë kompani të huaja apo kjo mund të quhet si një cenim i të drejtës së biznesit shqiptar për të bërë edhe çmontime predhash?

 - Mimi Kodheli: “Atëherë po u them, se ka një sensibilitet të caktuar. Ky është një aktivitet që nuk është si një aktivitet i zakonshëm, sikur të bësh tregtinë e çokollatave. Sigurisht që ligjet që e rregullojnë këtë marrëdhënie janë më strikte dhe më të rrepta. Jam e bindur që e keqja jonë nuk qëndron te ligji, por te mënyra se si zbatohet ai dhe se si është kontrolluar zbatimi i tij. Ajo që unë dua të them është gjëja që unë kam kërkuar që në fillim të herës, pra është rritja e kërkesave të sigurisë dhe ndryshimi i të gjitha rregulloreve të brendshme që kanë të bëjnë me kërkesat e sigurisë në të gjitha reparatet ushtarake brenda kufijve shqiptarë. Dhe, kur them “të gjitha repartet ushtarake”, “repart ushtarak” më lejoni t’u them që konsiderohen edhe uzinat ku demontohet. Tani, sipas të dhënave të para që unë kam, ka një abuzim të madh edhe në këtë fushë, abuzim, i cili diku-diku ka përfunduar me një ngjarje tragjike siç është ngjarja e Gërdecit. Këto raste abuzive do të vazhdojnë të jenë objekt i inspektimit dhe i auditimit. Që nga ish-ministri i Mbrojtjes, (Arben) Imami edhe deri te të gjithë ata që janë përfshirë në procedura antiligjore do të vazhdojnë të përgjigjen përpara ligjit. Duhet vetëm ta presin këtë qetësisht, nëse… Janë institucionet e tjera të pavarura ato që pastaj vendosin nëse Ministria e sotme e Mbrojtjes dhe ministrja e sotme e Mbrojtjes kanë të drejtë apo jo”.


 -
Në këtë, a mund të përfshihet edhe kontrata e kritikuar nga opozita e djeshme, mbi blerjet e helikopterëve, pra me kompaninë “EuroCopter” (nga Franca)?

 - Mimi Kodheli: “Shqipëria duhet të ketë kapacitete dhe Forcat tona të Armatosura duhet të kenë kapacitetet edhe përsa i përket mbrojtjes ajrore, Forcës Ajrore, si edhe në Forcën Navale ose Detare, përveçse në Forcën Tokësore. Për fat të keq, Shqipëria vazhdon të mbetet një vend i vogël me ekonomi fraxhile dhe me mundësi të pakta financiare për të qenë ushtarakisht atje ku duhet. Por, le të themi një drejtim i mençur mund të kishte evituar kosto të larta shpenzimesh. Ne jemi sot posedues të tri helikopterëve “Kugër” (AS 532 “Cougar”). Një tjetër është në prodhim dhe do të vijë në mes të vitit. Ne duhet të rivlerësojmë kontratën me kompaninë franceze “EuroCopter” për një detaj, për një fakt, i cili ka dalë tej kompetencave të të dyja palëve që është fatkeqësia e helikopterit “VIP” dhe që duhet të zëvendësohet me dy helikopterë të tjerë. Jemi në proces të përgatitjes së pilotëve për të mundësuar drejtimin e këtyre mjeteve. Këta helikopterë për momentin kanë fusha të ndryshme veprimi: njeri është për transport, për qëllime shëndetësore, mjekësore, tjetri është për qëllime më ushtarake. Është e vërtetë që një pjesë e mirë e fondit të investimeve për ushtrinë do të shkojë për pagesën e helikopterëve. (Besohet që vlera të jetë rreth 80 milionë euro. Shënim i gazetarit). Ne do të mundohemi ta menaxhojmë këtë situatë, të vështirë le të themi…

Më lejoni t’u them edhe nga një detaj, që më duhet ta përmend. Sot që flasim ne kemi trashëguar 15 milionë euro borxhe që datojnë që nga vitit 2008, borxhe të cilat ne duhet t’i rivlerësojmë, t’i rishikojmë pse kanë ardhur, nga kanë ardhur dhe padyshim t’i paguajmë nëse janë të drejta. Të gjitha këto janë pjesë e punës intensive, me të cilën duhet detyrimisht të merremi dhe t’i japim zgjidhje gjatë këtij viti”.


 -
Zonja ministre mbërritëm në fund. Shumëkush e ka parë jo me çudi, por të paktën ka qenë i interesuar për të marrë vesh, se përse duhet të zhvendosej ndërtesa e Ministrisë së Mbrojtjes për në (ish) Shkollën e Bashkuar (të Oficerëve) siç njihej rëndom. Po ashtu ka parë me interes edhe çështjen e dhënies me një vendim qeverie të (ish) Shtëpisë Qendrore të Ushtisë Popullore (SHQUP) në atë kohë, për selinë e re të Partisë Demokratike (pretendohet edhe si pronësi nga një shtetas shqiptaro-amerikan). A kemi një kosto për të dy këto vendime, që kanë kaluar në drejtime të ndryshme, pra zhvendosja e ministrisë për në këtë shkollë dhe heqja e një prone tjetër të ushtrisë?

 - Mimi Kodheli: “Më lejoni të ndaj këtu me Ju një gjë. Procedura, mënyra se si është proceduar në të dy rastet është e ndryshme, megjithëse në thelb proceset janë të njejtë. Në rastin e parë, pra lejimin e pronësisë së ushtrisë të quajtur rëndom SHQUP nga pronë e Ministrisë së Mbrojtjes te Partia Demokratike, ka qenë një procedurë me shkelje të rënda ligjore. Bazuar në ligj kjo duhet të vijë si një vendimi i Shtabit të Përgjithshëm të Forcave të Armatosura, i cili propozon ta heqë nga Plani i Përhapjes një pronë të ushtrisë; siglohet nga ministri dhe pastaj ky propozim i shkon presidentit, i cili e nxjerr atë jashtë Planit të Përhapjes së Forcave të Armatosura si pronë të ushtrisë dhe pastaj qeveria mundet, që nëpërmjet procedurave të përcaktuara ta tjetërsojë, ta kalojë diku tjetër. Kjo nuk ka ndodhur në rastin e parë.
Por, të jeni të sigurtë që kjo ka ndodhur në rastin e dytë. Pra, është vlerësuar që mundet që Ministria e Mbrojtjes të lëvizë që andej (nga ndërtesa ku ishte, pranë sheshit “Skënderbej” për te Komanda e Doktrinës dhe Stërvitjes, ish-Shkolla e Bashkuar e Oficerëve), për nevoja madhore të shtetit shqiptar. Ju vetë e shikoni që ne jemi këtu në një nga ndërtesat më të bukura që ka në Tiranë, me vlera historike. Mendoj që duke qenë këtu kemi edhe një menaxhim më të mirë të të gjithë institucioneve të ushtrisë. Dhe, përveçse jemi larguar pak më afër Dajtit (Mali i Dajtit) dhe për pasojë shpresoj të kemi pak më ajër të pastër, të gjitha të tjerat funksionojnë si më parë”.


 -
Kjo është gjë shumë e mirë, aq më tepër kur dikush mund të thotë që zhvendosja e ushtrisë dhe elementëve të teknikës që ka pasur, ka kushtuar rreth 1 milion euro kur është bërë në atë kohë.

 - Mimi Kodheli: “Asnjë gjë nuk ka kushtuar asgjë! Ne jemi transportuar falë mjeteve që disponon Ministria e Mbrojtjes dhe Forcat e Armatosura. Transporti është bërë brenda të gjithë parametrave dhe pa i kërkuar qeverisë asnjë lek shtesë. Ne vazhdojmë të punojmë në mënyrë komode këtu dhe do të vazhdojmë ta bëjmë këtë sepse mendoj që ky është spostimi final, i fundit që i bëhet Ministrisë së Mbrojtjes dhe Shtabit”.


 -
Zonja Kodheli, faleminderit edhe një herë për bisedën dhe për kohën!

 - Mimi Kodheli: “Faleminderit ju”!

------------------------------------

Foto: Ministrja e Mbrojtjes, Mimi Kodheli gjatë intervistës me gazetarin e “Illyria”-s, Denion Ndrenika

* Titulli origjinal

Marrë nga website i "Illyria":
http://illyriapress.com/kodheli-tregon-gjithcka-armet-shiu-n-pergjimin-kimiket-korrupsionin-helikopteret/

 

 



Apliko tani! Bëhuni pjesë e FA 16 tetor 2023 - 09 janar 2024 Nisin rekrutimet për ushtarë/detarë në Forcat e Armatosura, Ministria e Mbrojtjes e konsideron thelbësore për Forcat e Armatosura rekrutimin e ushtarëve me një profil sa më të lartë, në kushtet e një profesionalizmi....
Vijnë në Shqipëri helikopterët e parë Black Hawk Janar 2024 Kanë mbërritur në Shqipëri dy helikopterët Black Hawk, si pjesë e parë e porosisë së bërë nga vendi ynë dhe mbështetur nga fondet e ndihmës...
Direktiva e Mbrojtjes 2024Janar 2024 Dokumenti bazë mbi planet dhe programet e punës e të veprimtarive të MM, të FA në përmbushje të misionit kushtetues, si dhe detyrimeve si vend anëtar i NATO...
11 vende të lira pune; Peleshi thirrje ekspertëve: Aplikoni! Janar 2024 Ministri i Mbrojtjes Niko Peleshi ka bërë thirrje për aplikime nga ekspertët e fushave të Teknologjisë së Informacionit dhe Inxhinierisë për 11 vende të reja pune në Qendrën e....
Përurohen mjediset e reja të Muzeut të Forcave të Armatosura Dhjetor 2023 Muzeu i Forcave të Armatosura do të jetë tashmë në mjediset e tij të reja në Bërzhitë. Në ceremoninë e inaugurimit të hapësirave të reja morën pjesë ministri i Mbrojtjes Niko Peleshi, ministri për Evropën dhe Punët e Jashtme Igli Hasani...
Ministeriali i Mbrojtjes së Nismës SHBA-Karta e Atlantikut Nëntor 2023 Në takimin e Ministrave të Mbrojtjes të vendeve të NATO-s në Bruksel, ministri i Mbrojtjes Niko Peleshi mes të tjerave vuri theksin mbi zhvillimet në Veri të Kosovës....
Ministeriali i Mbrojtjes i vendeve të NATO, Bruksel Tetor 2023 Në takimin e Ministrave të Mbrojtjes të vendeve të NATO-s në Bruksel, ministri i Mbrojtjes Niko Peleshi mes të tjerave vuri theksin mbi zhvillimet në Veri të Kosovës....
Shqipëria merr sërish drejtimin e Brigadës së Europës Juglindore Gusht 2023 Ministri i Mbrojtjes, Niko Peleshi ka bërë me dije me anë të një postimi në mediat sociale që nga sot Shqipëria merr drejtimin e Brigadës së Europës Juglindore (SEEBRIG)....
Përmbyllet “Defender Europe ’23” në Shqipëri Qershor 2023 Për mëse një muaj mbi 24 mijë trupa nga 26 vende NATO e partnere nëpërmjet skenarëve strategjikë e operacionale në tokë, ajër e det demonstruan fuqinë në...
Revista Mbrojtja Nr. 01 (2024) Janar 2024Numri i fundit i revistës "Mbrojtja"...
Gazeta Ushtria 08 mars 2024Numri i fundit i të përjavshmes gazeta "Ushtria"...






Arkivi Lajmeve
Mars 2024
Ma En Pr Sh Di
26 27 28 29 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31