Qeveria, me propozim të Ministrisë së Mbrojtjes ka vendosur rritjen në masën 7% të pagës bazë sipas gradës dhe viteve të shërbimit për ushtarakët aktivë të Forcave të Armatosura. Kjo shënon rritjen më të madhe të pagave të ushtarakëve, të cilët një vit më parë morën një tjetër shtesë page për të gjitha kategoritë në masën 30%.
Një grup ekspertësh të DG-Echos nga Brukseli ndodhen në Tiranë, për të marrë pjesë në një workshop dyditor, të organizuar nga AKMC dhe në bashkëpunim me strukturat operacionale, ministritë e linjës, dy prefekturat, Agjencinë Shtetërore të Informacionit dhe Gjeohapësirës, Institutin e Gjeoshkencës, Agjencinë e Menaxhimit të Burimeve Ujore, si dhe agjenci të tjera, që kanë rolin e tyre në Mbrojtjen Civile. Ky bashkëpunim vjen pak kohë pas anëtarësimit të Shqipërisë në Mekanizmin Evropian të Mbrojtjes Civile.
Agjencia Kombëtare e Mbrojtjes Civile (AKMC) certifikoi sot Skuadrën e Vullnetarëve të Reagimit të Shpejtë, të cilët u trajnuan në teori dhe praktikë për disa muaj me radhë, përmes një donacioni të LëvizAlbania. Të rinjtë e kësaj skuadre u pajisën me certifikatat përkatëse nga AKMC dhe konsiderohen pjesë e rrjetit të vullnetarëve në rastet e fatkeqësive natyrore.
Në ceremoninë e zhvilluar me rastin e certifikimit të tyre, drejtori i Përgjithshëm i Agjencisë Kombëtare të Mbrojtjes Civile z. Haki Çako, e vuri theksin tek kjo iniciativë, duke e cilësuar atë, si një vizion dhe vullnet, që i shërben Mbrojtjes Civile, por edhe krijimit të një kulture të përhershme për krijimin, trajnimin dhe ngritjen e rrjeteve të vullnetarëve në Shqipëri.
Ministri i Mbrojtjes Niko Peleshi, i shoqëruar edhe nga shefi i Shtabit të Përgjithshëm të FARSH, gjeneral brigade Arben Kingji priti efektivët që u kthyen nga misioni i solidaritetit në zonat e shkatërruara nga tërmeti i 6 Shkurtit në kufirin mes Turqisë dhe Sirisë.
Në fjalën e tij, ministri Peleshi shprehu mirënjohjen, në emër të Ministrisë së Mbrojtjes, qeverisë dhe popullit shqiptar, për punën e bërë nga pjesëtarët e ekipeve që u angazhuan në terren që në momentet e para, pas thirrjes së lëshuar për ndihmë nga autoritetet turke dhe Mekanizmi Evropian i Mbrojtjes Civile.
