Shtetet e Bashkuara të Amerikës kanë rol vendimtar në modernizimin e Forcave të Armatosura shqiptare. Ministri i Mbrojtjes Niko Peleshi shpreh mirënjohjen për bashkëpunimin në 1 shekull të marrëdhënieve diplomatike mes dy vendeve, por në mënyrë të veçantë në fushën e Mbrojtjes. “Një shekull marrëdhënie diplomatike me SHBA. Mirënjohje për gjithçka që ata kanë bërë për modernizimin e Forcave të Armatosura”, - shkruan Peleshi përkrah videos së publikuar në faqen zyrtare me rastin e 100 - Vjetorit të Marrëdhënieve diplomatike SHBA - Shqipëri.
Ministri Peleshi e cilëson ndër më intensivët bashkëpunimin në fushën e Mbrojtjes dhe një tregues më i fundit është investimi i madh që po bëhet në Bazën Ajrore të Kuçovës, e cila do të jetë tashmë bazë e NATO-s.
Besueshmëria ndaj Shqipërisë si aleat i denjë i NATO-s është shprehur edhe në zhvillimin e një prej stërvitjeve më të mëdha të 30 viteve të fundit në territorin e saj, “Defender 2021”. Ministri Peleshi, në këtë video që tregon marrëdhëniet mes dy vendeve vë në dukje faktin se Shqipëria është rreshtuar përkrah SHBA në misionet ndërkombëtare.
© Ministria e Mbrojtjes 2024 - Të gjitha të drejtat e rezervuara.