Ministri i Mbrojtjes Niko Peleshi priti në një takim të veçantë kryetarin e Komitetit Ushtarak të NATO admiral Robert Bauer, i cili ndodhet për vizitë në Shqipëri me ftesë të shefit të Shtabit të Përgjithshëm të FA, gjeneral brigade Arben Kingji.
Ministri Peleshi e vlerësoi këtë vizitë si të rëndësishme në një kohë të trazuar për situatën e mbrojtjes dhe sigurisë, jo vetëm në kontinentin evropian, por në të gjithë botën mbarë. Më tej ministri i Mbrojtjes e përgëzoi kreun e Komitetit Ushtarak për lidershipin e treguar deri më tani me autoritetet më të larta ushtarake të NATO si dhe për këshillat ushtarake mjaft të vlefshme dhe profesionale, të marra nëpërmjet konsensusit të të gjithë vendeve anëtare dhe rëndësinë e tyre në vendimmarrjen politike.
Ministri Peleshi theksoi mbështetjen e pakursyer të vendit tonë në aspektin politik, diplomatik, ushtarak dhe ekonomik si dhe vijimin e kësaj mbështetje brenda mundësive dhe kapaciteteve tona për aq kohë sa të nevojitet.
Ministri i Mbrojtjes garantoi kreun e Komitetit Ushtarak për përmbushjen e zotimit për arritjen e Buxhetit të Mbrojtjes në 2% deri në vitin 2024, ndonëse kjo shifër, për situatën aktuale të sigurisë nuk është e mjaftueshme.
Një vëmendje të veçantë, gjatë bisedës mori edhe situata e sigurisë në Kosovë, e cila nuk duhet lënë jashtë vëmendjes së Aleancës, aq më tepër në një kohë kur retorika pro ruse në Ballkan shtohet dita-ditës.
Në përfundim të takimit, të dy bashkëbiseduesit ranë dakord për të zbatuar vendimet e marra nga kryetarët e shteteve dhe qeverive të vendeve të NATO-s gjatë Samitit të Madridit, vitin e kaluar, por edhe për çështjet që do të diskutohen në Samitin e ardhshëm në Vilnius, Lituani, më 11 - 12 korrik 2023.
© Ministria e Mbrojtjes 2024 - Të gjitha të drejtat e rezervuara.