Newsroom Ministrja Kodheli i dorëzon dokumentin e pronësisë misionit “Motrat e Nënë Terezës” në Pukë
Ministrja e Mbrojtjes, znj. Mimi Kodheli, ishte në qytetin e Pukës ku i dorëzoi misionit të bamirësisë “Motrat e Nënë Terezës” dokumentin e pronësisë së një ndërtese ish-pronë e Ministrisë së Mbrojtjes, e cila tashmë kalon në pronësi të këtij misioni fetar.
Në ceremoninë e organizuar me këtë rast ishin të pranishëm deputeti i zonës Mark Frroku, imzot Lucian Avgustini ipeshkëv i Dioqezës së Sapës, komandanti i Komandë Mbështetëse, gjeneral brigade Ylber Dogjani, përfaqësues të misionit “Motrat e Nënën Terezës”, si dhe banorë të qytetit të Pukës.
Pas përshëndetjes që bëri imzot Lucian Avgustini, ipeshkëv i Dioqezës së Sapës, fjalën e mori ministrja Kodheli, e cila ndër të tjera theksoi se, jam e nderuar që vij sot këtu, në një vend të mrekullueshëm dhe me njerëz të mrekullueshëm që meritojnë shumë më tepër. Meriton shumë më tepër edhe kisha që shërben në këtë vend të ashpër nga natyra, por jo nga bujaria dhe devotshmëria. Unë kam pasur nderin e jashtëzakonshëm dhe fatin e madh ta takoj të paktën dy herë në jetën time Nënë Terezën. Është detyrimi im si ministër i qeverisë që unë përfaqësoj, ka vijuar më tej ministrja Kodheli, që të mundësoja shumë pak për një dokument, i cili duhet të ishte bërë, marrë dhe siguruar, dekada më parë. Është pak të them se është turpi i atyre që kanë drejtuar politikën shqiptare për të mos siguruar këtë objekt, që i shërben të paktën 60 familjeve të varfëra, që janë në nevojë ekonomike. Ne jemi gati t’u përgjigjemi të gjithë njerëzve të thjeshtë, shqiptarëve kudo që janë të çdo besimi që kanë. E rëndësishme është që të respektojmë njeri - tjetrin dhe ky është vetëm fillimi i një bashkëpunimi të mbarë që qeveria shqiptare ka me kishën katolike dhe me gjithë institucionet e tjera fetare për ta ndërgjegjësuar këtë marrëdhënie gjithnjë dhe më të bukur, për ta çuar më përpara shërbesën e njerëzve besimtarë, të cilët kanë merituar dhe meritojnë shumë më tepër në gjithë këto vite.
“Misioni juaj është fisnik, njerëzor, human dhe besoj se ky dimension duhet ruajtur, për të ngritur në majat e respektit, mbarë botën. Ju falënderoj që ekzistoni, për çka bëni për njerëzit dhe shpresoj shumë që bashkëpunimi ynë të jetë gjithmonë i frytshëm, i devotshëm, i ngushtë në shërbim të qytetarëve, të besimit të fortë që duhet të keni se gjërat në Shqipëri do të bëhen më mirë, do të bëhen më bukur”, ka përfunduar fjalën e saj ministrja Kodheli.
Më pas, ministrja Kodheli i dorëzoi përfaqësueses së misionit “Motrat e Nënë Terezës” në Pukë, dokumentin e pronësisë me nr. 13, datë 9.12.2014, nëpërmjet të cilit objekti tashmë figuron në pronësi të këtij misioni bamirës. Pas këtij akti, ministrja e Mbrojtjes Kodheli dhe imzot Lucian Avgustini zbuluan pllakën e vendosur në hyrje të këtij institucioni fetar me mbishkrimin: “Dhuratë e ministres së Mbrojtjes për “Motrat e Nënë Terezës” me falënderimet për veprën e tyre të jashtëzakonshme. Zoti ju bekoftë! Mimi Kodheli”.
Në vijim të qëndrimit të saj në Pukë, ministrja e Mbrojtjes Mimi Kodheli i dhuroi tre familjeve të varfëra që jetojnë në periferi të këtij qyteti ndihma në ushqime, veshmbathje dhe materiale sanitare.
