Gelardina Prodani

Sekretari i Përgjithshëm i Ministrisë së Mbrojtjes të Republikës së Shqipërisë 2022 -

Zonja Gelardina Prodani që nga qershori i vitit 2022 është Sekretari i Përgjithshëm i Ministrisë së Mbrojtjes.

Znj. Gelardina Prodani në postin e sekretares së Përgjithshme të Ministrisë së Mbrojtjes së Shqipërisë, që është edhe pozicioni më i lartë i nëpunësit civil, është përgjegjëse për planifikimin dhe menaxhimin e Buxhetit të Mbrojtjes, për Shqipërinë, si afatshkurtër ashtu edhe atë afatmesëm në përputhje me misionin dhe strategjinë e ministrisë për të ruajtur paqen dhe për të forcuar sigurinë. Ajo gjithashtu mbikëqyr investimet në infrastrukturë, pajisje, teknologji inovative dhe talent për ta bërë Shqipërinë më elastike dhe një anëtare më të vlefshme të NATO.

Përpara kësaj detyre, nga viti 2019 deri në vitin 2022, ajo ka qenë sekretare e Përgjithshme e Ministrisë së Shëndetësisë dhe Çështjeve Sociale. Mandati i saj u karakterizua nga kriza të paprecedentë si tërmeti i madh i nëntorit 2019, me qendër në Durrës dhe zonat përreth, si edhe u pasua nga pandemia COVID-19. Znj. Prodani luajti një rol vendimtar në menaxhimin e të dyja krizave, vlerësimin në kohë dhe me efikasitet të dëmeve dhe identifikimin e rreziqeve. Ajo koordinoi përpjekjet mbarëkombëtare duke mbikëqyrur kërkesat për nevojat e buxhetit të shtetit dhe duke siguruar fondet e donatorëve. Aftësitë e saj drejtuese kanë përmirësuar ndjeshëm cilësinë e shërbimit shëndetësor dhe infrastrukturës në Shqipëri. E emëruar Koordinatore Kombëtare e Vaksinave, ajo punoi ngushtë me rrjetin COVAX, duke mbledhur fonde thelbësore si donacione dhe oferta nga të gjitha anët të materializuara përmes punës së saj këmbëngulëse.

Më herët, për një periudhë 21 – vjeçare, znj. Prodani ka mbajtur poste të ndryshme drejtuese në Ministrinë e Financave, ku nga viti 2013 - 2019, shërbeu edhe si Sekretare e Përgjithshme e kësaj ministrie, i cili ishte . posti më i rëndësishëm gjatë kësaj periudhe. Ministria e Financave bëri reforma të thella dhe kritike në fushën e financave publike në atë kohë, të cilat kontribuan në: ruajtjen e stabilitetit makro-fiskal; ngritjen e Sistemit Informativ të Integruar të Menaxhimit Financiar; rritjen e rolit dhe llogaridhënies së të gjithë aktorëve të përfshirë në menaxhimin e financave publike, në pastrimin e detyrimeve financiare, në koordinimin e donatorëve dhe të ndihmës së huaj.

Në të njëjtën kohë (2014-2019), ajo ka mbajtur poste shtesë, si ajo e Drejtoreshës së Shqipërisë në Bordin e Drejtuesve të Bankës së Detit të Zi, në Selanik dhe ka luajtur një rol të rëndësishëm në mbështetjen e projekteve zhvilluese që ndikuan ndjeshëm në zhvillimin ekonomik të vendit dhe të gjithë rajonit.

Znj. Prodani drejtoi gjithashtu Rrjetin e Drejtorëve të Buxhetit, i përbërë nga njëzet e dy vende të Evropës Qendrore dhe Lindore si edhe Azisë Qendrore për Programin e Menaxhimit të Shpenzimeve Publike, të financuar nga Banka Botërore, Zvicra, OECD dhe GIZ (2012-2016).

Para se të bëhej sekretare e Përgjithshme e Ministrisë së Financave, znj. Prodani ishte drejtoreshë e Zbatimit të Buxhetit (2005-2013). Nën iniciativat e saj për të zhvilluar një planifikim buxhetor afatmesëm më të shëndoshë, më strategjik dhe më gjithëpërfshirës, u prezantuan masa themelore për menaxhimin efektiv financiar, monitorimin, kontrollin dhe inspektimin.

Znj. Prodani është autore dhe bashkautore e disa publikimeve në fushën e qeverisjes financiare, qeverisjes dhe përgjegjësisë së korporatave, si dhe biznesit dhe menaxhimit, ndër të tjera.

Ajo u diplomua në Fakultetin Ekonomik të Universitetit të Tiranës (1998) dhe mori një Master në Politikat Ekonomike në Kolegjin Williams, në Shtetet e Bashkuara (2009), si dhe një Master për Studime Ekonomike Evropiane nga Universiteti i Tiranës dhe Universiteti i Bamberg (2011).

Ajo është e martuar dhe ka dy fëmijë.