Plani Afatgjatë i Zhvillimit të Forcave të Armatosura të Republikës së Shqipërisë (PAZH 2024–2033) është dokumenti kryesor për zhvillimin e kapaciteteve të Forcave të Armatosura, si dhe është baza për hartimin e planeve mbështetëse të zhvillimit të Forcave të Armatosura të Republikës së Shqipërisë. Ky plan ka për qëllim të kthejë objektivat e Strategjisë Ushtarake në kapacitete dhe aftësi ushtarake në zbatim të misionit kushtetues, detyrave kombëtare dhe detyrimeve në kuadër të NATO.

Procesi i Planifikimit të Mbrojtjes së vendit tonë dhe Plani Afatgjatë i Zhvillimit të FA-së i referohet elementeve më të rëndësishme të ambicies dhe objektivave të mbrojtjes, dinamikës dhe harmonizimit me proceset e planifikimit të Aleancës (NDPP). Kjo dinamikë do të lehtësojë përcaktimin e fazave të planifikimit dhe zhvillimit të kapaciteteve, si dhe përafrimin me kuadrin normativ të synimeve të dokumenteve kryesore strategjike të sigurisë dhe mbrojtjes. Me miratimin e PAZHFA 2024–2033, strukturat e FA-së do të hartojnë planet e tyre respektivë të detajuara, planin e vendosjes dhe planet mbështetëse sipas fushave.

PAZHFA ka një afat 10-vjeçar, por ai do të rishikohet çdo katër vjet ose sa herë që do të ketë rishikim të dokumenteve strategjike, si Strategjia e Sigurisë Kombëtare (SSK) dhe Strategjia Ushtarake (SU) e Republikës së Shqipërisë.

Ligji nr. 84/2024 PAZHFA në pdf