Shqipëria në NATO Sekretari i Përgjithshëm i NATO bisedon me kryeministrin Rama për Afganistanin dhe Ballkanin
17 shtator 2013
Sekretari i Përgjithshëm i NATO, Andres Fogh Rasmussen diskutoi për misionet e NATO në Afganistan dhe Kosovë, si dhe për sigurinë në Ballkan me kryeministrin shqiptar, z. Edi Rama ditën e martë (17 shtator 2013). “Shqipëria jep një kontribut të çmuar në NATO. Shqipëria jep një kontribut të çmuar në misionet tona në Afganistan dhe Kosovë. Përmes bashkëpunimit tuaj me fqinjët tuaj, po jepni një kontribut të çmuar për sigurinë e rajonit. Ky është një moment shpresash dhe mundësie për Ballkanin Perëndimor, një moment për të ndërtuar të ardhmen, dhe jo për të parë të kaluarën”, - theksoi sekretari i Përgjithshëm.
Sekretari i Përgjithshëm rikujtoi se NATO do të përmbyllë misionin e saj luftarak në Afganistan, në fund të vitit që vjen. Ndërkohë, Aleanca po shton trajnimet dhe stërvitjet. “Tashmë, ne kemi forcat më të afta dhe më të ndërlidhura në historinë e NATO dhe ne do t’i mbajmë ato të forta për t’u siguruar që do të vazhdojmë të jemi gati për t’u përballur me çdo sfidë të sigurisë sonë të përbashkët. Kjo, në veçanti, është e rëndësishme në një kohë kur të gjitha aleatët përballen me vendime të vështira ekonomike. Kështu që, nevojitet të punojmë më shumë së bashku, për të ruajtur dhe arritur kapacitetet, të cilat pak nga ne mund t’i përballonin vetëm, si dhe t’i garantojmë qytetarëve tanë që është shpenzimi më i mirë i mundshëm”, - nënvizoi z. Rasmussen.
Sekretari i Përgjithshëm falënderoi kryeministrin Rama që vizitoi NATO në fillim të mandatit të tij, si një sinjal i fortë i angazhimit të tij personal ndaj Aleancës.
Marrë nga faqja zyrtare e NATO: www.nato.int
