Konferenca Shkencore “Komponenti rezervist në FARSH”, Skana: Forca rezerviste, vlerë e shtuar për mbrojtjen kombëtare

Akademia e Forcave te Armatosura (AFA) organizoi Konferencën Shkencore Ndërkombëtare me temë “Komponenti rezervist në FARSH: Integrimi, qëndrueshmëria dhe përdorimi efektiv i tij.

Fotogaleria

Gjatë konferencës u diskutua mbi rolin e komponentit të rezervistëve si pjesë e integruar e forcës aktive, si një element kyç i qëndrueshmërisë kombëtare, gatishmërisë operacionale dhe mbrojtjes kolektive, në përputhje me standardet e NATO-s.

"Ambicia jonë" - u shpreh gjatë fjalës zëvendësministrja e Mbrojtjes znj. Pranvera Skana, "është të ndërtojmë një komponent rezervist të organizuar, të trajnuar, të motivuar dhe të integruar me forcën aktive."

“Përtej numrave, ajo që ka më shumë rëndësi është cilësia e këtij kapaciteti dhe gatishmëria e tij për të vepruar kur kërkohet. Rezervisti sjell një vlerë të veçantë. Ai mund të sjellë në Forcat e Armatosura jo vetëm përvojën e ish-ushtarakëve, por edhe njohuri dhe ekspertizë nga profesione të ndryshme të shoqërisë civile. Pikërisht kjo ndërthurje e kapaciteteve ushtarake me ekspertizën civile mund ta bëjë forcën tonë më fleksibile dhe më të aftë për t'iu përgjigjur sfidave të reja.” - u shpreh Skana.

Një komponent rezervist i mirëorganizuar, me role dhe detyra të përcaktuara qartë, rrit kapacitetet mbrojtëse të vendit dhe kontribuon në përmbushjen e detyrimeve tona në NATO, u shpreh zëvendësministrja e Mbrojtjes Skana.

“Si vend anëtar i NATO-s, Shqipëria ka përgjegjësinë të vazhdojë forcimin e kapaciteteve të saj mbrojtëse dhe kontributin në sigurinë kolektive. Në këtë kuadër, një komponent rezervist modern, i përgatitur dhe funksional është një vlerë e shtuar për mbrojtjen kombëtare dhe për përmbushjen e angazhimeve tona në Aleancë. Prandaj, sfida jonë nuk është vetëm të rekrutojmë rezervistë. Sfida është të ndërtojmë një sistem që i përgatit, i motivon dhe i mban ata të gatshëm për t'i shërbyer vendit kur kërkohet.” - tha Skana.

Gjatë konferencës u shkëmbyen përvojat, praktikat më të mira dhe perspektivave analitike ndërmjet vendeve aleate dhe partnere, duke mbështetur integrimin efektiv te forcave rezerviste me komponentet aktive dhe duke rritur kontributin e Shqipërisë në siguriné rajonale dhe euro-atlantike.

Të pranishëm në konferencë ishin zëvendësministrja e Mbrojtjes znj. Pranvera Skana, shefi i Shtabit të Përgjithshëm të Forcave të Armatosura, gjenerallejtënant Arben Kingji, komandanti i Akademisë së Forcave të Armatosura, gjeneral major Ferdinand Dimo, drejtues të lartë të FA, përfaqësues të vendeve aleate dhe partnere, studentë të AFA dhe pjesëmarrës të tjerë.