Misioni dhe veprimtaria e Ministrisë së Mbrojtjes

1. Ministria e Mbrojtjes ndihmon ministrin e Mbrojtjes për përmbushjen e misionit të tij kushtetues dhe ligjor.

2. Ministria e Mbrojtjes ka për mision hartimin dhe zbatimin e politikave të përgjithshme shtetërore të sigurisë dhe të mbrojtjes së vendit në përputhje me Kushtetutën, Strategjinë e Sigurisë, Organizatën e Traktatit të Atlantikut të Veriut (NATO), Strategjinë Ushtarake dhe legjislacionin në fuqi në Republikës së Shqipërisë. Ajo përbëhet nga administrata e Ministrisë së Mbrojtjes dhe Shtabi i Përgjithshëm i FA.

3. Ministria e Mbrojtjes ndihmon Ministrin e Mbrojtjes për përmbushjen e veprimtarive të mëposhtme:

a) përfaqësimin në organet e lartë përmendura dhe në Këshillin e Sigurimit Kombëtar, duke dhënë mendim të specializuar për problemet e mbrojtjes dhe zhvillimit të Forcave të Armatosura;

b) pasqyrimin në programin e zhvillimit perspektiv të FA, të politikave dhe direktivave të Këshillit të Ministrave në fushën e mbrojtjes, në fushën sociale, në atë të integrimit, zhvillimit e modernizimit të FA në përputhje me standardet e NATO-s;

c) sigurimin e marrëdhënieve të qëndrueshme e me bazë mirëbesimi në fushën ushtarake, ndërmjet shteteve, duke ndërtuar politika e praktika që favorizojnë bashkëpunimin;

ç) përcaktimin e përparësive dhe synimeve të cilat krijojnë hapësira bashkëpunimi në interes të rritjes së sigurisë së përbashkët dhe plotësimin e interesave të vendit;

d) ndërtimin e politikave të përshtatshme arsimimi për të gjithë personelin e FA duke synuar shkallë të lartë motivimi, standartizim të veprimtarisë së brendshme në FA dhe integrim normal në shoqëri;

dh) sigurimin e mbarëvajtjes së zhvillimeve të brendshme në FA, në perputhje me zhvillimet e tjera shoqerore duke siguruar mirëkujdesje sa më të mirë të burimeve njerëzore, financiare e materiale, me qëllim që zhvillimi e modernizimi i FA të jetë kurdoherë dhe në çdo rrethanë në përputhje me zhvillimet politike e ushtarake të NATO-s;

e) hartimin e programeve të bashkëpunimit me të gjithë institucionet e tjera shtetërore në funksion të detyrimeve të tyre ligjore për zbatimin e kërkesave të Strategjisë së Sigurisë Kombëtare dhe Strategjisë Ushtarake të Republikës së Shqipërisë, si për sigurinë e mbrojtjen e vendit;

ë) pjesëmarrje në operacionet/misionet ushtarake dhe humanitare të drejtuara dhe të organizuara nga NATO, OKB, BE;

f) hartimin e programeve të bashkëpunimit me institucionet e tjera shtetërore qendrore ose vendore dhe me shoqërinë civile në funksion të plotësimit të misionit të Ministrisë së Mbrojtjes.

4. Ministri i Mbrojtjes është përgjegjës gjatë veprimtarisë së tij përpara Parlamentit, presidentit të Republikës dhe Këshillit të Ministrave.