NATO
Qëllimi kryesor i NATO (Organizata e Traktatit të Atlantikut të Veriut) është ruajtja e lirisë dhe sigurisë të vendeve anëtare të saj përmes mjeteve politike dhe ushtarake.
Politike – NATO promovon vlerat demokratike dhe inkurajon konsultime dhe bashkëpunimin në lidhje me çështjet e Mbrojtjes dhe Sigurisë, për të shtuar besimin dhe në një kontekst më afatgjatë, për të parandaluar konfliktin.
Ushtarake - NATO është e angazhuar për zgjidhjen paqësore të mosmarrëveshjeve. Nëse përpjekjet diplomatike dështojnë, ajo ka kapacitetet ushtarake të nevojshme për të ndërmarrë operacione për administrimin e krizave. Ato kryhen bazuar në artikullin 5 të Traktatit të Uashingtonit, traktati themelues i NATO, ose bazuar në një mandat të OKB (Organizata e Kombeve të Bashkuara), e vetme ose në bashkëpunim me vende të tjera dhe organizata ndërkombëtare.
Bashkimin Europian (BE)
Ministria e Mbrojtjes koordinon angazhimin e saj në kuadrin e integrimit në BE në bashkëpunim të ngushtë me Ministrinë për Evropën dhe Punët e Jashtme (MEPJ), ministrin e Shtetit dhe kryenegociatorin si edhe institucionet e tjera qendrore dhe strukturat e përbashkëta.
Drejtoria përkatëse në MM ka për detyrë plotësimin e detyrimeve që lidhen me:
- Procesin e integrimit në BE, ndjekjen e zbatimit të Planit Kombëtar për Integrimin Evropian (PKIE) dhe Planit Kombëtar për Aderimin në BE (PKABE), koordinimin e procesit të planifikimeve dhe politikave prioritare të MM në përputhje me acquis communitaire të BE, përgatitjen e progres raporteve për Komisionin Evropian nëpërmjet MEPJ dhe zbatimin e rekomandimeve të raport progresit për Shqipërinë.
- Politikën e Përbashkët të Sigurisë dhe Mbrojtjes (CSDP), pjesëmarrje progresive në misione dhe operacione ushtarake të drejtuara nga BE në fushën e menaxhimit të krizave në bashkëpunim me MEPJ dhe SHPFA.
- Bashkëpunimin dhe pjesëmarrjen në instrumente, nisma dhe projekte të BE-së në fushën e sigurisë dhe mbrojtjes bazuar në prioritetet që burojnë nga Strategjia Sektoriale e Mbrojtjes.
Organizmat Ndërkombëtare dhe Rajonale
Vendet e të ashtuquajturit Ballkani Perëndimor: Shqipëria, Kroacia dhe Maqedonia, si vende anëtare të partneritetit për paqe (PfP) dhe të Këshillit Euroatlantik të Partneritetit (EAPC), pas Samitit të Pragës të vitit 2002, vendosën të ndiqnin të njëjtën rrugë që ndoqën në mënyrë të suksesshme vendet Baltike, të quajtura “Grupi i Vilnusit”. Bashkëpunimi ndërmjet tre vendeve aspirantë për t’u anëtarësuar në NATO, së bashku me SHBA si pjesë e Kartës së A-3, kishte një synim të vetëm: futjen e vendeve aspirantë në NATO.
SEDM, roli, dinamika, angazhimi dhe shtrirja e tij në Europën Juglindore
Southeastern European Defense Ministerial (SEDM) vazhdon të jetë prova e gjallë e urave të konsoliduara të bashkëpunimit dhe të miqësisë, të cilën kemi qenë të aftë ta ndërtojmë nëpërmjet përforcimit të dëshirës së mirë dhe vizionit të përbashkët.
SEDM ose ndryshe procesi i angazhimit të vendeve të Europës Juglindore në nivel Ministerial, paraqet një proces të integrimit dhe të bashkëpunimit në fushat e sigurisë dhe të mbrojtjes rajonale. I themeluar në vitin 1996 në Tiranë, me pjesmarrjen e gjithë vendeve të Europës Juglindore dhe SHBA, SEDM sot shpreh realisht suksesin e bashkëpunimit dhe integrimt rajonal.
Elementi më përfaqësues i procesit të SEDM padyshim është Iniciativa e MPFSEE. MPFSE ose e njohur ndryshe si Forca Shumëkombëshe Paqeruajtëse e Europës Juglindore (SEEBRIG) përbëhet nga 7 vende anëtare: Shqipëria, Bullgaria, Greqia, Italia, Ish-Republika Jugosllave e Maqedonisë, Rumania dhe Turqia ndërsa pesë vendet vëzhguese janë: SHBA, Ukraina, Bosnja-Hercegovina, Sllovenia dhe Kroacia.
Qendra për Bashkëpunim të Sigurisë (RACVIAC)
Statusi ligjor - Marrëveshja e RACVIAC për anëtarësimin e Shqipërisë, është ratifikuar nga Kuvendi i Shqipërisë me Ligjin Nr. 10326, datë 30.09.2010. Qendra ka pronësi rajonale dhe është një organizatë ndërkombëtare me status diplomatik, jo-fitimprurëse, akademike, e përgjegjshme për vendimet e saja politike e drejtuar nga Grupi Ndërkombëtar Këshillimor (MAG).
Artikuj nga Newsroom
e hënë, 19 Maj 2025
