Si të rekrutohem ushtar/detar aktiv në FA
Vendosja e kapitalit njerëzor si prioritet përmes përmirësimit të trajtimit financiar të ushtarakëve po reflektohet në rritjen e interesit të të rinjve për t’u bërë pjesë e Forcave të Armatosura, të cilat po shndërrohen në një strukturë tërheqëse për karrierë jo vetëm për të rinjtë nga jeta civile, por gjithnjë e më shumë edhe për ata që tashmë shërbejnë në uniformë.
Të rinjtë dhe të rejat që bëjnë pjesë në FA po shprehin një interes të shtuar për të vijuar shërbimin duke ndjekur kurset e karrierës.
Qendra e Personel Rekrutimi (QPR) është institucioni që ka në misionin e vet, ndër të tjera, edhe rekrutimin për t’u bërë pjesë e FA si ushtar/detar aktiv.
Si të bëhem nënoficer aktiv i FA
Në kushtet e një profesionalizmi më të lartë të FA dhe një angazhimi gjithnjë e më të madh në përmbushje të detyrave në mbrojtje të vendit dhe në interes të Aleancës, rekrutimi i nënoficerëve me një profil sa më cilësor është thelbësor dhe ka një impakt të rëndësishëm mbi të ardhmen e FA. Një gjë e tillë mund të arrihet nëpërmjet përsosjes së sistemit të përzgjedhjes dhe instrumenteve të vlerësimit, si dhe motivimit të tyre nëpërmjet pagës dhe mundësive për karrierë.
Strukturat përgjegjëse përzgjedhin nga kategoria e ushtarit IV/detarit IV kandidatët për nënoficerë. Rekrutimi bëhet nëpërmjet konkurrimit të brendshëm. Kërkesa për të marrë pjesë në konkurrim i adresohet komandës së repartit ku ushtari IV/detari IV është duke kryer shërbimin.
Ushtari IV/detari IV, që plotëson kriteret ndjek Kursin Fillestar të Nënoficerit pranë Qendrës së Arsimimit Profesional të Nënoficerëve (QAPN).
Si të bëhem oficer aktiv i FA
Politika e rekrutimit të kandidatëve për oficerë të rinj në Forcat e Armatosura përmban parimet dhe kërkesat ku do të mbështetet planifikimi, pranimi dhe standardet për plotësimin me oficerë të rinj të strukturave të FA, në funksion të misionit të Mbrojtjes Kombëtare si dhe të përmbushjes së detyrimeve dhe angazhimeve ndërkombëtare në kuadrin e NATO, BE, OKB, etj. Ajo është pjesë integrale e Strategjisë së Menaxhimit të Burimeve Njerëzore në FA (SMBNJ). Politika e rekrutimit të kandidatëve për oficerë të rinj në Forcat e Armatosura përbën një nga pjesët themelore të menaxhimit të ciklit jetësor të personelit dhe ka rëndësi jetike për të ardhmen e tyre. Për këtë arsye, rekrutimi brenda strandardeve të NATO është një nga çështjet thelbësore të kësaj politike.
Aktualisht, shtetasit shqiptarë rekrutohen si oficer nga burime kryesore rekrutimi, të cilat përcaktohen në dokumentin “Politikat dhe procedurat e rekrutimit të kandidatëve për oficerë të rinj në FARSH”, miratuar me urdhër të MM nr 1269, datë 19.07.2023", i ndryshuar.
- me arsim parauniversitar për ndjekjen e studimeve në Akademitë Ushtarake të vendeve të NATO, në bazë të marrëveshjeve të bashkëpunimit dypalësh në fushën e arsimimit ushtarak
- me arsim të lartë (përfshihen edhe ushtarët/detarët dhe nënoficerët aktivë të FA), për ndjekjen e studimeve brenda vendit cikli I - bachelor.
- me Kursin e Përgatitjes së Oficerit (KPO) në Akademinë e FA për studentët, që kanë mbaruar minimumi studimet bachelor.
Karriera ushtarake dhe gradat në Forcat e Armatosura
Karriera ushtarake është ecuria në rendin e gradave dhe funksioneve gjatë kryerjes së shërbimit ushtarak aktiv.
Hierarkia ushtarake përfshin rendin e gradave dhe të funksioneve në FA që shkallëzohet nga më i ulëti në më të lartin. Ushtarakët, në varësi të hierarkisë së funksioneve dhe gradave, janë eprorë dhe vartës.
Artikuj nga Newsroom
e hënë, 19 Maj 2025
