Dorian Tola

Zëvendësministër i Mbrojtjes i Republikës së Shqipërisë
2024 -

Z. Dorian Tola prej 05 qershorit 2024 është zëvendësministër i Mbrojtjes i Republikës së Shqipërisë.

Dorian Tola ka një eksperiencë mbi 20 - vjeçare në çështje të Mbrojtjes dhe Sigurisë Kombëtare.

Nga viti 2003-2017 ai ka shërbyer në detyra të ndryshme në radhët e Forcave të Armatosura ku është angazhuar kryesisht me çështje të planëzimit afatgjatë, modernizmit dhe zhvillimit të Forcës Detare si dhe me proceset e planëzimit dhe standardizimit me NATO.

Në periudhën 2012 - 2015 ka kryer detyrën e shefit të Zyrës së Komandantit të Forcës Detare. Më pas, ai është caktuar koordinator i Mbrojtjes në Zyrën Operacionale të Situatës (ZOS) në Kryeministri.
Në periudhën 2017 - 2024 ka ushtruar detyrën e drejtorit të Përgjithshëm të Autoritetit Kombëtar për Sigurinë e Informacionit të Klasifikuar.

Dorian Tola është diplomuar në degën Inxhinieri Elektrike dhe Elektronike në Akademinë e Detarisë në Turqi dhe në Fakultetin e Drejtësisë, Universiteti i Tiranës.

Ai ka përfunduar studimet master shkencor në “Çështjet e Sigurisë Kombëtare” në NPS, Kaliforni, SHBA dhe master shkencor “E Drejtë Penale” në Fakultetin e Drejtësisë, Universiteti i Tiranës. Gjatë karrierës, ai ka kryer kualifikime të shumta për çështje të Mbrojtjes dhe Sigurisë kombëtare.

Në vitin 2022, z. Tola përfundoi “Kursin e Lartë të Sigurisë dhe Mbrojtjes së Përbashkët të Bashkimit Evropian”, organizuar nga Kolegji Evropian i Sigurisë dhe Mbrojtjes (ESDC).

Që nga viti 2017, z. Tola është angazhuar si lektor i jashtëm pranë disa universiteteve kombëtare dhe është trajner për module që lidhen me sigurinë e informacionit.

Ai është autor dhe prezantues në disa konferenca kombëtare e ndërkombëtare në fushën e Mbrojtjes dhe Sigurisë.

Dorian Tola zotëron gjuhën angleze, turke dhe italiane.