Direktiva e Mbrojtjes 2023
Pandemia e Covid-19, me të cilën bota u përball për rreth dy vjet, si edhe agresioni i armatosur dhe i pajustifikuar i Rusisë ndaj Ukrainës, kanë ndryshuar në mënyrë drastike mjedisin e sigurisë dhe perceptimin e tij te qytetarët.
Agresioni rus mbi Ukrainën, reflektohet edhe në rajonin e Ballkanit, ku ndasitë etnike, demokracitë e pakonsoliduara, krizat politike, etj. mund të konsiderohen faktorë të rëndësishëm për destabilizim dhe krijim konfliktesh. E ndërsa konfliktet e armatosura rishfaqen pas shumë kohësh në kufijtë e BE, kërcënime të reja ndaj sigurisë tashmë janë materializuar, duke përfshirë sulmet kibernetike, kërcënimet hibride, terrorizmin, dezinformimin, ndryshimet klimatike, krizën ekonomike dhe atë të energjisë apo edhe inteligjencën artificiale.
Gjatë vitit 2022 Ministria e Mbrojtjes dhe Forcat e Armatosura treguan një nivel të lartë përgjegjshmërie dhe profesionalizmi. Pati zhvillime të rëndësishme financiare dhe ligjore, që lidhen drejtpërdrejt me trajtimin e personelin ushtarak, duke filluar nga rritja në një masë të konsiderueshme të pagave të tyre te një trajtim më gjithëpërfshirës financiar dhe logjistik për personelin civil dhe ushtarak të MM dhe të FA. Progres të rëndësishëm bëmë këtë vit edhe në fushën e modernizimin me zgjerimin e kapaciteteve të Forcave të Armatosura, duke nisur me shtimin e mjeteve ajrore, si dhe rritjen e aftësive zbuluese në hapësirën detare dhe ajrore.
Për vitin 2023 sfidat dhe angazhimet tona do të vazhdojnë të jenë në të njëjtit intensitet, duke ndjekur me përparësi absolute angazhimin tonë si një vend anëtar i NATO si dhe duke vazhduar prezencën në misionet e OKB dhe BE. Pjesë e rëndësishme do të jetë përgjigja kombëtare dhe kontributi përherë i vyer në mbështetje të popullatës civile, në rastet e mundshme të fatkeqësive natyrore apo emergjencave të tjera civile.
Drejtimet kryesore që do të punohet gjatë 2023 gjenden në dokumentin:
Direktiva e Mbrojtjes 2023 në format pdf
Strategjia për Mbrojtjen Kibernetike
Interneti dhe teknologjitë e reja kompjuterike kanë sjellë ndryshime kolosale në ndërkomunikimin e një shoqërie globale. Transformimi i shkaktuar nga ky digjitalizim krijon varësi të reja. Ekonomia, administrata dhe sigurimi i shërbimeve thelbësore tani mbështeten në integritetin e hapësirës kibernetike dhe në infrastrukturën, sistemet dhe të dhënat që e mbështesin atë.
Edhe pse nuk ka gjasa që një konflikt midis shteteve do të kryhet ekskluzivisht në fushën kibernetike dhe të informacioneve, operacionet në fushën kibernetike dhe të informacionit tashmë po luajnë një rol gjithnjë e më të rëndësishëm në konfliktet ushtarake, trend i cili do të rritet në vitet e ardhshme.
Disponibiliteti, integriteti dhe qëndrueshmëria e kësaj infrastrukture janë vazhdimisht duke u përballur me veprime dëmtuese.
Zbulimi ka zëvendësuar mbrojtjen si strategji. Pjesa më e madhe e hardware-ve dhe software-ve, të zhvilluar fillimisht për të lehtësuar këtë mjedis, ka renditur si prioritet efikasitetin, koston dhe komoditetin e përdoruesit, por nuk ka pasur një siguri të projektuar që nga fillimi. Personat keqdashës, organizatat kriminale ose terroriste mund të shfrytëzojnë pikat e dobëta në sistemet e ndërlidhjes dhe komunikimit dhe minimizimi i këtyre pikave është një prioritet kombëtar.
Trendi aktual tregon se incidentet do të vazhdojnë të rriten, për rrjedhojë kostoja për mbrojtjen, si dhe efektet që shkaktojnë sulmet kibernetike do të rriten me shpejt se përfitimet që vijnë nga shërbimet themelore që ofrojnë SNI-të.
Strategjia për Mbrojtjen Kibernetike 2014-2017 e MM-së kishte si qëllim të siguronte orientime, koherencë dhe fokus, për një qasje gjithëpërfshirëse dhe për të zhvilluar kapacitetet ushtarake në hapësirën kibernetike.
Si rezultat i kësaj përshtatjeje, janë bërë përmirësime të ndjeshme në rritjen e aftësive organizative kundrejt kërkesave të sigurisë kibernetike; gradualisht është siguruar një përqasje gjithëpërfshirëse e strukturave të MM/FA-së, për të pasur një kuptim më të qartë për hapësirën kibernetike dhe dobësitë e saj; janë rritur kapacitetet operacionale të SNI-ve në aspekte të ndryshme të sigurisë kibernetike; është rritur ndërgjegjësimi i personelit në lidhje me sigurinë kibernetike.
Strategjia për Mbrojtjen Kibernetike 2021 - 2023 në format pdf
Strategjia për Mbrojtjen Kibernetike 2018 - 2020 në format pdf
Strategjia e Menaxhimit të Burimeve Njerëzore (2011 - 2015)
SBNJ (2011-2015) e Ministrisë së Mbrojtjes përmban vizionin, parimet dhe konceptet themelore për politikat, planifikimin dhe procedurat që mbështesin ciklin jetësor të burimeve njerëzore për oficerët, nënoficerët, ushtarët dhe personelin civil në Forcat e Armatosura të Republikës së Shqipërisë, kujdesin për familjet e tyre dhe për ushtarakët në rezervë, lirim e pension.
Ajo siguron drejtimin strategjik për politikat dhe planet e burimeve njerëzore të mbrojtjes, mbështet kryerjen e misionit të mbrojtjes kombëtare, përmbushjen e detyrimeve të Ministrisë së Mbrojtjes në kuadrin e NATO, si dhe të angazhimeve në kuadër të BE dhe OKB për pesë vitet e ardhshme...
Strategjia e Menaxhimit të Burimeve Njerëzore (2011 - 2015) në format pdf
Dokumenta për Barazinë Gjinore dhe Shanset e Barabarta në FA
Përkufizuar si barazi midis burrave dhe grave në të gjitha sferat, si publike dhe private, barazi gjinore do të thotë akses dhe kontroll i barabartë mbi burimet dhe përfitimet, pjesëmarrje e barabartë në vendimmarrjen politike dhe barazi me ligj për gratë dhe burrat.
Integrimi gjinor, d.m.th. procesi që siguron që perspektiva gjinore dhe qëllimi për barazi gjinore të jenë në qendër të të gjitha aktiviteteve - zhvillim politikash, kërkime, advokim/dialog, legjislacion, shpërndarje e burimeve si dhe planifikim, zbatim dhe monitorim i programeve dhe projekteve, si një strategji për të promovuar dhe arritur barazinë gjinore, duhet të jetë pjesë e të gjitha politikave sociale, ekonomike dhe politike në Shqipëri. Një strategji e tillë jo vetëm siguron arritjen e një zhvillimi të qëndrueshëm nëpërmjet shfrytëzimit të potencialit të plotë njerëzor të vendit, por edhe garanton që të gjitha grupet shoqërore t’i gëzojnë këto arritje.
