23 tetor 2013
Gjatë ditës së dytë të zhvillimit të punimeve të ministerialit të NATO në Bruksel, ministrja e Mbrojtjes, znj. Mimi Kodheli në fjalën e saj bëri me dije se Shqipëria do të vazhdojë të jetë e angazhuar në Afganistan edhe pas vitit 2014. Ministrja Kodheli ka theksuar gjithashtu se FA të Shqipërisë janë të angazhuara për të marrë pjesë në stërvitjet e përbashkëta me trupa të NATO nga viti 2015 e në vazhdim.
Gjatë qëndrimit të saj në Bruksel, znj. Kodheli realizoi një bisedë telefonike nga selia e NATO me trupat tanë të dislokuar në Afganistan. Ministrja Kodheli u shprehu atyre mbështetjen e qeverisë dhe të Ministrisë së Mbrojtjes për vëmendjen dhe kujdesin e vazhdueshëm që u kushtohet trupave që janë në misione paqeruajtëse, si dhe u uroi atyre suksese në realizimin e detyrave fisnike dhe kthim të shëndoshë në Atdhe.
***
Gjatë qëndrimit në Bruksel, ministrja e Mbrojtjes, znj. Mimi Kodheli zhvilloi një takim me ministrin e Mbrojtjes së Italisë, z. Mario Mauro, me kërkesë të këtij të fundit. Ministri Mauro e uroi zonjën Kodheli për detyrën e re dhe e ftoi atë të vizitojë Romën në një kohë të përshtatshme. Ai vlerësoi lart bashkëpunimin në fushën e mbrojtjes midis dy vendeve tona dhe theksoi nevojën për intensifikimin e mëtejshëm të këtij bashkëpunimi, kryesisht në drejtim të rritjes së kapaciteteve, kontrollit të hapësirës detare dhe në fushën e modernizimit.
Nga ana e saj, ministrja Kodheli theksoi se, ne kemi të njëjtat interesa dhe se lidhjet mes dy vendeve tona janë shumëplanëshe. Sipas saj, bashkëpunimi i deritanishëm ka qenë shumë i mirë, duke vlerësuar në këtë kontekst kontributin e Italisë në fushën e edukimit dhe trajnimit të ushtarakëve të FA shqiptare, si dhe në fushën e logjistikës. Ministrja Kodheli ndau të njëjtin mendim me ministrin italian se duhen eksploruar edhe fusha të tjera bashkëpunimi si: mbrojtja kibernetike, lufta kundër trafiqeve të paligjshme, demilitarizimin etj. Duke e falënderuar kolegun italian për ftesën, ministrja Kodheli u shpreh e gatshme për të realizuar një vizitë në Romë në një kohë sa më të shpejtë.
***
Po sot, ministrja e Mbrojtjes Kodheli zhvilloi një takim pune me ministrin e Mbrojtjes së Greqisë, z. Dimitrios Avramopoulos, me kërkesën e këtij të fundit. Takimi u fokusua në çështje të bashkëpunimit dypalësh në fushën e Mbrojtjes, si dhe në situatën politike në rajonin e Ballkanit. Të dy bashkëbiseduesit ndanë të njëjtin mendim se marrëdhëniet mes dy vendeve tona janë në një nivel të shkëlqyer, të bazuar mbi një arkitekturë të re të bashkëpunimit dypalësh. Duke u ndalur tek fillimi i qeverisjes se re të kryeministrit Rama, ministri Avramopoulos u shpreh se Shqipëria meriton një të ardhme më të mirë dhe beson se kjo do të vijë me lidershipin e guximshëm dhe vizionar të kryeministrit Rama dhe kabinetit të ri qeveritar.
Duke e falënderuar për takimin, znj. Kodheli vlerësoi marrëdhëniet mes dy vendeve në fushën e Mbrojtjes dhe shprehu optimizmin e qeverisë së re për ndryshime të thella drejt një të ardhmeje më të mirë për vendin. Tashmë, sipas saj, të dy vendet jetojnë në një ambient sigurie të stabilizuar, çka e bën më të lehtë bashkëpunimin edhe në fusha të tjera me interes të përbashkët. Ajo e falënderoi homologun grek për ndihmën që Greqia jep në fushën e arsimimit të ushtarakëve të rinj shqiptarë.
***
Në vijim të takimeve dypalëshe që po zhvillon në Bruksel, ministrja Kodheli zhvilloi një takim pune me asistenten e sekretarit të Mbrojtjes për Çështjet Strategjike dhe Globale të SHBA, znj. Madelyn R. Creedon. Duke falënderuar Shqipërinë për bashkëpunimin e shkëlqyer me palën amerikane në bashkëkryesimin e Komitetit të NATO për Mospërhapjen, në formatin e Mbrojtjes për vitin 2012-2013, zonja Creedon u ndal në ecurinë e marrëdhënieve dypalëshe në fushën e Sigurisë dhe Mbrojtjes. Të dy bashkëbisedueset ndanë të njëjtin mendim se marrëdhëniet mes dy vendeve janë në një nivel te shkëlqyer. Me pas, znj. Kodheli e njohu znj. Creedon me prioritet e saj si ministre e Mbrojtjes e Shqipërisë, duke vënë theksin në programet e bashkëpunimit me Shtetet e Bashkuara, veçanërisht në ato të arsimimit, trajnimit dhe përgatitjes së oficerëve të rinj. Po ashtu, znj. Kodheli dhe znj. Creedon u ndalën në domosdoshmërinë e intensifikimit të bashkëpunimit në fushën e Sigurisë, për adresimin e sfidave të përbashkëta në kuadër të Aleancës. Si vend anëtar i Aleancës, Shqipëria ka potencialet njerëzore dhe materiale për të kontribuar më shumë në funksion të paqes dhe sigurisë globale, - u shpreh znj. Creedon. Ndërsa ministrja Kodheli theksoi se, Shqipëria mbetet e angazhuar për të bashkëpunuar me SHBA, si partneri ynë strategjik dhe për të eksploruar fusha apo projekte të reja bashkëpunimi, në funksion të kontributeve që vendi ynë duhet të japë për një botë më të sigurtë, duke rritur kësisoj me tej rolin e Shqipërisë në këtë fushë.
